ਅਧਿਆਪਕ ਸਲਾਹਕਾਰ ਪ੍ਰੀਸ਼ਦ ਲਈ ਅਰਜ਼ੀਆਂ ਮੰਗੀਆਂ
ਐਡਮੰਟਨ-ਅਲਬਰਟਾ ਸਰਕਾਰ ਨੇ ਸੂਬਾਈ ਸਿੱਖਿਆ ਨੀਤੀ ਨੂੰ ਹੋਰ ਮਜ਼ਬੂਤ ਬਣਾਉਣ ਲਈ ਅਧਿਆਪਕ ਸਲਾਹਕਾਰ ਪ੍ਰੀਸ਼ਦ (Teacher Advisory Council) ਲਈ ਅਰਜ਼ੀਆਂ ਮੰਗੀਆਂ ਹਨ। ਇਸ ਲਈ ਅਧਿਆਪਕਾਂ ਅਤੇ ਪ੍ਰਿੰਸੀਪਲਾਂ ਨੂੰ ਅਰਜ਼ੀ ਦੇਣ ਲਈ ਸੱਦਾ ਦਿੱਤਾ ਗਿਆ ਹੈ।
ਸਰਕਾਰ ਵੱਲੋਂ ਜਾਰੀ ਖ਼ਬਰ ਰਿਲੀਜ਼ ਮੁਤਾਬਕ, ਅਲਬਰਟਾ ਦੀ ਸਿੱਖਿਆ ਪ੍ਰਣਾਲੀ ਨੂੰ ਦੁਨੀਆ ਦੀਆਂ ਸਰਵੋਤਮ ਪ੍ਰਣਾਲੀਆਂ ਵਿੱਚੋਂ ਇੱਕ ਮੰਨਿਆ ਜਾਂਦਾ ਹੈ ਅਤੇ ਇਸ ਦੀ ਕਾਮਯਾਬੀ ਵਿੱਚ ਅਧਿਆਪਕਾਂ ਦੀ ਕੇਂਦਰੀ ਭੂਮਿਕਾ ਹੈ। ਅਧਿਆਪਕਾਂ ਦੀ ਮੈਦਾਨੀ ਮੁਹਾਰਤ ਅਤੇ ਅਨੁਭਵ ਨੂੰ ਨੀਤੀ-ਨਿਰਧਾਰਣ ਨਾਲ ਜੋੜਨ ਲਈ ਇਹ ਸਲਾਹਕਾਰ ਪ੍ਰੀਸ਼ਦ ਸਥਾਪਤ ਕੀਤਾ ਗਿਆ ਹੈ।
ਇਸ ਕੌਂਸਲ ਵਿੱਚ ਵੱਖ-ਵੱਖ ਸਕੂਲੀ ਸੈਟਿੰਗਾਂ, ਭੂਮਿਕਾਵਾਂ ਅਤੇ ਭਾਈਚਾਰਿਆਂ ਦੀ ਨੁਮਾਇੰਦਗੀ ਕਰਨ ਵਾਲੇ 15 ਸਿੱਖਿਅਕ ਸ਼ਾਮਲ ਹੋਣਗੇ, ਜੋ ਸਿੱਖਿਆ ਅਤੇ ਬਾਲ ਸੰਭਾਲ ਮੰਤਰੀ ਨਾਲ ਆਪਣੇ ਵਿਚਾਰ ਅਤੇ ਤਜਰਬੇ ਸਾਂਝੇ ਕਰਨਗੇ। ਉਨ੍ਹਾਂ ਦੀਆਂ ਵਿਹਾਰਕ ਸੂਝਾਂ ਨਾਲ ਵਿਦਿਆਰਥੀਆਂ, ਅਧਿਆਪਕਾਂ ਅਤੇ ਸਕੂਲਾਂ ਦੀਆਂ ਲੋੜਾਂ ਅਨੁਸਾਰ ਨੀਤੀਆਂ ਤਿਆਰ ਕਰਨ ਵਿੱਚ ਮਦਦ ਮਿਲੇਗੀ।
ਸਿੱਖਿਆ ਅਤੇ ਬਾਲ ਸੰਭਾਲ ਮੰਤਰੀ ਡਿਮੇਟ੍ਰੀਓਸ ਨਿਕੋਲਾਈਡਜ਼ ਨੇ ਕਿਹਾ ਕਿ ਅਧਿਆਪਕ ਕਲਾਸਰੂਮ ਦੀਆਂ ਅਸਲੀਅਤਾਂ ਨੂੰ ਸਭ ਤੋਂ ਚੰਗੀ ਤਰ੍ਹਾਂ ਸਮਝਦੇ ਹਨ ਅਤੇ ਕਲਾਸ ਦੇ ਆਕਾਰ ਤੇ ਗੁੰਝਲਦਾਰ ਚੁਣੌਤੀਆਂ ਨੂੰ ਹੱਲ ਕਰਨ ਵਿੱਚ ਉਨ੍ਹਾਂ ਦੀ ਮੁਹਾਰਤ ਅਹੰਮ ਹੈ। ਉਨ੍ਹਾਂ ਕਿਹਾ ਕਿ ਇਹ ਕੌਂਸਲ ਅਧਿਆਪਕਾਂ ਨੂੰ ਨੀਤੀ-ਨਿਰਧਾਰਣ ਵਿੱਚ ਸਿੱਧੀ ਆਵਾਜ਼ ਦਿੰਦੀ ਹੈ।
ਕੌਂਸਲ ਲਈ ਨਿਯੁਕਤੀਆਂ ਮੰਤਰੀ ਦੇ ਆਦੇਸ਼ ਰਾਹੀਂ 18 ਮਹੀਨਿਆਂ ਦੀ ਮਿਆਦ ਲਈ ਕੀਤੀਆਂ ਜਾਣਗੀਆਂ, ਜੋ ਦੁਬਾਰਾ ਨਿਯੁਕਤੀ ਲਈ ਯੋਗ ਹੋਣਗੀਆਂ। ਮੈਂਬਰ ਸਕੂਲ ਸਮੇਂ ਤੋਂ ਬਾਹਰ ਔਨਲਾਈਨ ਮੀਟਿੰਗਾਂ ਵਿੱਚ ਸ਼ਮੂਲੀਅਤ ਕਰਨਗੇ। ਇਹ ਸਾਰੀਆਂ ਨਿਯੁਕਤੀਆਂ ਸਵੈ-ਇੱਛਤ ਅਤੇ ਬਿਨਾਂ ਭੁਗਤਾਨ ਹੋਣਗੀਆਂ।
ਦਿਲਚਸਪੀ ਰੱਖਣ ਵਾਲੇ ਅਧਿਆਪਕ ਅਤੇ ਪ੍ਰਿੰਸੀਪਲ ਕੌਂਸਲ ਲਈ ਔਨਲਾਈਨ ਅਰਜ਼ੀ ਦੇ ਸਕਦੇ ਹਨ। ਅਰਜ਼ੀਆਂ ਦੀ ਆਖਰੀ ਮਿਤੀ 13 ਫਰਵਰੀ, 2026 ਹੈ। ਕੌਂਸਲ ਦੇ ਮੈਂਬਰਾਂ ਦੀ ਚੋਣ ਸਿੱਖਿਆ ਅਤੇ ਬਾਲ ਸੰਭਾਲ ਮੰਤਰੀ ਵੱਲੋਂ ਕੀਤੀ ਜਾਵੇਗੀ।
