ਇਲੀਨੋਇਸ ਦੀ ਰਿਫਾਇਨਰੀ ਬੰਦ ਹੋਣ ਕਾਰਨ ਅਲਬਰਟਾ ਵਿੱਚ ਪੈਟਰੋਲ ਦੀਆਂ ਕੀਮਤਾਂ ਮੁੜ ਵਧੀਆਂ
Alberta gas prices jumped sharply on Wednesday, with some stations reaching $1.81 per litre in Edmonton and $1.84 in Calgary. Energy analyst Dan McTeague attributed the latest increase mainly to a power outage at Exxon Mobil’s Joliet refinery in Illinois.
ਅਲਬਰਟਾ-ਅਲਬਰਟਾ ਵਿੱਚ ਬੁੱਧਵਾਰ ਨੂੰ ਪੈਟਰੋਲ ਦੀਆਂ ਕੀਮਤਾਂ ਵਿੱਚ ਅਚਾਨਕ ਵਾਧਾ ਹੋਣ ਨਾਲ ਡਰਾਈਵਰਾਂ ਨੂੰ ਝਟਕਾ ਲੱਗਾ। ਕੁਝ ਥਾਵਾਂ ’ਤੇ ਕੀਮਤਾਂ ਵਿੱਚ ਪ੍ਰਤੀ ਲੀਟਰ 30 ਸੈਂਟ ਤੱਕ ਦਾ ਵਾਧਾ ਦਰਜ ਕੀਤਾ ਗਿਆ।
ਐਡਮੰਟਨ ਵਿੱਚ ਕਈ ਪੰਪਾਂ ’ਤੇ ਪੈਟਰੋਲ ਦੀ ਕੀਮਤ 1.81 ਡਾਲਰ ਪ੍ਰਤੀ ਲੀਟਰ ਤੱਕ ਪਹੁੰਚ ਗਈ, ਜਦਕਿ ਕੈਲਗਰੀ ਵਿੱਚ ਇਹ ਲਗਭਗ 1.84 ਡਾਲਰ ਪ੍ਰਤੀ ਲੀਟਰ ਰਹੀ।ਕੈਨੇਡੀਅਨਜ਼ ਫਾਰ ਅਫੋਰਡੇਬਲ ਐਨਰਜੀ ਦੇ ਪ੍ਰਧਾਨ ਡੈਨ ਮੈਕਟੀਗ ਨੇ ਕਿਹਾ ਕਿ ਇਸ ਵਾਰ ਕੀਮਤਾਂ ਵਿੱਚ ਵਾਧੇ ਦਾ ਮੁੱਖ ਕਾਰਨ ਵਿਸ਼ਵ ਪੱਧਰੀ ਤਣਾਅ ਨਹੀਂ, ਸਗੋਂ ਇਲੀਨੋਇਸ ਦੀ ਇੱਕ ਰਿਫਾਇਨਰੀ ਵਿੱਚ ਬਿਜਲੀ ਬੰਦ ਹੋਣਾ ਹੈ।
ਚੈਨਾਹੌਨ, ਇਲੀਨੋਇਸ ਸਥਿਤ ਐਕਸੋਨ ਮੋਬਿਲ ਦੀ ਜੋਲੀਅਟ ਰਿਫਾਇਨਰੀ ਵਿੱਚ ਐਤਵਾਰ ਨੂੰ ਬਿਜਲੀ ਬੰਦ ਹੋ ਗਈ ਸੀ ਅਤੇ ਮੰਗਲਵਾਰ ਦੁਪਹਿਰ ਤੱਕ ਇਸ ਦਾ ਕੰਮ ਮੁੜ ਸ਼ੁਰੂ ਨਹੀਂ ਹੋਇਆ ਸੀ।ਮੈਕਟੀਗ ਮੁਤਾਬਕ ਇਸ ਕਾਰਨ ਪੈਟਰੋਲ ਦੀ ਕੀਮਤ ਵਿੱਚ ਲਗਭਗ 18 ਸੈਂਟ ਅਤੇ ਡੀਜ਼ਲ ਦੀ ਕੀਮਤ ਵਿੱਚ 24 ਤੋਂ 25 ਸੈਂਟ ਪ੍ਰਤੀ ਲੀਟਰ ਦਾ ਪ੍ਰਭਾਵ ਪਿਆ ਹੈ। ਰਿਫਾਇਨਰੀ ਦਾ ਕੰਮ ਹੌਲੀ-ਹੌਲੀ ਮੁੜ ਸ਼ੁਰੂ ਹੋਣ ਨਾਲ ਪੈਟਰੋਲ ਦੀਆਂ ਕੀਮਤਾਂ ਵਿੱਚ ਕੁਝ ਕਮੀ ਆ ਸਕਦੀ ਹੈ।
ਹਾਲਾਂਕਿ, ਮੈਕਟੀਗ ਨੇ ਡੀਜ਼ਲ ਦੀਆਂ ਵਧੀਆਂ ਕੀਮਤਾਂ ਨੂੰ ਲੈ ਕੇ ਚਿੰਤਾ ਜ਼ਾਹਰ ਕੀਤੀ। ਉਨ੍ਹਾਂ ਕਿਹਾ ਕਿ ਡੀਜ਼ਲ ਦੀ ਕੀਮਤ ਪਿਛਲੇ ਸਾਲ ਦੇ ਇਸੇ ਸਮੇਂ ਨਾਲੋਂ ਲਗਭਗ ਦੁੱਗਣੀ ਹੈ, ਜਿਸ ਦਾ ਅਸਰ ਟਰੱਕਾਂ, ਆਵਾਜਾਈ, ਨਿਰਮਾਣ, ਨਗਰਪਾਲਿਕਾ ਵਾਹਨਾਂ, ਰੇਲਾਂ ਅਤੇ ਹਵਾਈ ਸੇਵਾਵਾਂ ਦੀ ਲਾਗਤ ’ਤੇ ਪੈ ਸਕਦਾ ਹੈ।
