ਟੈਕਸਾਸ ’ਚ ਟਰੰਪ ਤੇ ਡੈਮੋਕ੍ਰੇਟਿਕ ਉਮੀਦਵਾਰ ਦੀਆਂ ਆਹਮੋ-ਸਾਹਮਣੇ ਰੈਲੀਆਂ, ਸੈਨੇਟ ਸੀਟ ਲਈ ਮੁਕਾਬਲਾ ਸਖ਼ਤ
US President Donald Trump and Democratic Senate candidate James Talarico held competing rallies just three miles apart in Lubbock, Texas, ahead of the midterm elections. Talarico has maintained a narrow polling lead over Republican Ken Paxton in a costly race for a Senate seat currently held by John Cornyn.
ਟੈਕਸਾਸ-ਅਮਰੀਕਾ ਦੀਆਂ ਮੱਧਕਾਲੀ ਚੋਣਾਂ ਤੋਂ ਇੱਕ ਹਫ਼ਤਾ ਪਹਿਲਾਂ ਟੈਕਸਾਸ ਦੇ ਲੱਬਕ ਸ਼ਹਿਰ ਵਿੱਚ ਰਾਸ਼ਟਰਪਤੀ ਡੋਨਲਡ ਟਰੰਪ ਅਤੇ ਡੈਮੋਕ੍ਰੇਟਿਕ ਉਮੀਦਵਾਰ ਜੇਮਸ ਟੈਲਾਰਿਕੋ ਨੇ ਇੱਕ-ਦੂਜੇ ਤੋਂ ਸਿਰਫ਼ ਤਿੰਨ ਮੀਲ ਦੀ ਦੂਰੀ ’ਤੇ ਚੋਣ ਰੈਲੀਆਂ ਕੀਤੀਆਂ। ਦੋਵਾਂ ਦਾ ਮਕਸਦ ਸੈਨੇਟ ਦੀ ਉਸ ਸੀਟ ਲਈ ਵੋਟਰਾਂ ਦਾ ਸਮਰਥਨ ਹਾਸਲ ਕਰਨਾ ਸੀ, ਜਿਸ ’ਤੇ ਇਸ ਸਮੇਂ ਰਿਪਬਲਿਕਨ ਸੈਨੇਟਰ ਜੌਨ ਕਾਰਨਿਨ ਕਾਬਜ਼ ਹਨ।
ਟਰੰਪ ਨੇ ਰਿਪਬਲਿਕਨ ਉਮੀਦਵਾਰ ਕੇਨ ਪੈਕਸਟਨ ਦੇ ਹੱਕ ਵਿੱਚ ਰੈਲੀ ਕੀਤੀ ਅਤੇ ਟੈਲਾਰਿਕੋ ’ਤੇ ਨਿਸ਼ਾਨਾ ਸਾਧਦਿਆਂ ਕਿਹਾ ਕਿ ਉਹ ਟੈਕਸਾਸ ਦੇ ਲੋਕਾਂ ਦੀਆਂ ਕਦਰਾਂ-ਕੀਮਤਾਂ ਦੀ ਨੁਮਾਇੰਦਗੀ ਨਹੀਂ ਕਰਦੇ। ਉਨ੍ਹਾਂ ਦਾਅਵਾ ਕੀਤਾ ਕਿ ਟੈਲਾਰਿਕੋ ਦੀ ਜਿੱਤ ਨਾਲ ਤੇਲ ਉਦਯੋਗ, ਹਥਿਆਰ ਰੱਖਣ ਦੇ ਅਧਿਕਾਰ ਅਤੇ ਸਰਹੱਦੀ ਸੁਰੱਖਿਆ ਨੂੰ ਨੁਕਸਾਨ ਪਹੁੰਚੇਗਾ।
ਦੂਜੇ ਪਾਸੇ, ਟੈਲਾਰਿਕੋ ਨੇ ਆਪਣੀ ਰੈਲੀ ਵਿੱਚ ਪੈਕਸਟਨ ਨੂੰ ਟੈਕਸਾਸ ਦੀ ਰਾਜਨੀਤੀ ਦਾ ਸਭ ਤੋਂ ਭ੍ਰਿਸ਼ਟ ਆਗੂ ਕਰਾਰ ਦਿੱਤਾ। ਉਨ੍ਹਾਂ ਪੈਕਸਟਨ ਦੀ ਦੌਲਤ ਵਿੱਚ ਹੋਏ ਵਾਧੇ ਅਤੇ ਉਨ੍ਹਾਂ ਨਾਲ ਜੁੜੇ ਵਿਵਾਦਾਂ ਦਾ ਹਵਾਲਾ ਦਿੰਦਿਆਂ ਕਿਹਾ ਕਿ ਮੌਜੂਦਾ ਪ੍ਰਣਾਲੀ ਦੀਆਂ ਖਾਮੀਆਂ ਕਾਰਨ ਮਿਹਨਤ ਕਰਨ ਦੇ ਬਾਵਜੂਦ ਬਹੁਤ ਸਾਰੇ ਟੈਕਸਾਸ ਵਾਸੀ ਤਰੱਕੀ ਨਹੀਂ ਕਰ ਪਾ ਰਹੇ।
ਚੋਣ ਸਰਵੇਖਣਾਂ ਵਿੱਚ ਟੈਲਾਰਿਕੋ ਨੂੰ ਮਾਮੂਲੀ ਬੜ੍ਹਤ ਮਿਲਦੀ ਰਹੀ ਹੈ। ਇਸ ਮੁਕਾਬਲੇ ਵਿੱਚ ਇਸ਼ਤਿਹਾਰਬਾਜ਼ੀ ਅਤੇ ਚੋਣ ਪ੍ਰਚਾਰ ’ਤੇ 500 ਮਿਲੀਅਨ ਡਾਲਰ ਤੋਂ ਵੱਧ ਖ਼ਰਚ ਹੋਣ ਦਾ ਅਨੁਮਾਨ ਹੈ। ਇਹ ਰਕਮ ਇਸ ਨੂੰ ਅਮਰੀਕਾ ਦੇ ਇਤਿਹਾਸ ਦੀਆਂ ਸਭ ਤੋਂ ਮਹਿੰਗੀਆਂ ਸੈਨੇਟ ਚੋਣਾਂ ਵਿੱਚੋਂ ਇੱਕ ਬਣਾ ਸਕਦੀ ਹੈ।
ਟੈਕਸਾਸ ਪਿਛਲੇ ਤਿੰਨ ਦਹਾਕਿਆਂ ਤੋਂ ਕਿਸੇ ਡੈਮੋਕ੍ਰੇਟਿਕ ਉਮੀਦਵਾਰ ਨੂੰ ਸੂਬਾ ਪੱਧਰੀ ਅਹੁਦੇ ’ਤੇ ਨਹੀਂ ਚੁਣਦਾ ਆਇਆ। ਇਸ ਲਈ ਇਹ ਚੋਣ ਰਿਪਬਲਿਕਨਾਂ ਲਈ ਅਹਿਮ ਮੰਨੀ ਜਾ ਰਹੀ ਹੈ। ਸੂਬੇ ਦੇ ਕਈ ਰਿਪਬਲਿਕਨ ਆਗੂਆਂ ਦਾ ਮੰਨਣਾ ਹੈ ਕਿ ਟਰੰਪ ਵੱਲੋਂ ਮੌਜੂਦਾ ਸੈਨੇਟਰ ਕਾਰਨਿਨ ਦੀ ਥਾਂ ਪੈਕਸਟਨ ਦੀ ਹਮਾਇਤ ਕਰਨ ਨਾਲ ਪਾਰਟੀ ਲਈ ਮੁਸ਼ਕਲ ਵਧੀ ਹੈ। ਪੈਕਸਟਨ ਪਿਛਲੇ ਸਾਲਾਂ ਦੌਰਾਨ ਨਿੱਜੀ ਅਤੇ ਸਿਆਸੀ ਵਿਵਾਦਾਂ ਦਾ ਸਾਹਮਣਾ ਕਰਦੇ ਰਹੇ ਹਨ।
