ਕੈਲਗਰੀ ਦੀ ਗੈਰ-ਮੁਨਾਫ਼ਾ ਸੰਸਥਾ ਵੱਲੋਂ ਅਲਬਰਟਾ ਰੈਫਰੈਂਡਮ ਵਿੱਚ ਵੱਧ ਤੋਂ ਵੱਧ ਵੋਟਿੰਗ ਦੀ ਅਪੀਲ
A Calgary nonprofit alliance is organizing efforts to increase voter turnout in Alberta’s October 19 referendum. The group is holding meetings and encouraging eligible voters to understand the referendum questions and participate in the vote.
ਕੈਲਗਰੀ-ਕੈਲਗਰੀ ਦੀ ਲਗਭਗ ਤਿੰਨ ਦਰਜਨ ਧਾਰਮਿਕ, ਮਜ਼ਦੂਰ, ਸਿੱਖਿਆ ਅਤੇ ਹੋਰ ਸਥਾਨਕ ਸੰਸਥਾਵਾਂ ਦੇ ਗੱਠਜੋੜ ਕੈਲਗਰੀ ਅਲਾਇੰਸ ਫਾਰ ਦ ਕਾਮਨ ਗੁੱਡ ਨੇ 19 ਅਕਤੂਬਰ ਨੂੰ ਹੋਣ ਵਾਲੇ ਅਲਬਰਟਾ ਰੈਫਰੈਂਡਮ ਵਿੱਚ ਲੋਕਾਂ ਨੂੰ ਵੋਟ ਪਾਉਣ ਲਈ ਉਤਸ਼ਾਹਿਤ ਕਰਨ ਦੀ ਮੁਹਿੰਮ ਤੇਜ਼ ਕਰ ਦਿੱਤੀ ਹੈ।
ਸੰਸਥਾ ਵੱਲੋਂ ਬੁੱਧਵਾਰ ਰਾਤ ਦੱਖਣ-ਪੱਛਮੀ ਕੈਲਗਰੀ ਦੀ ਸਕਾਰਬੋਰੋ ਯੂਨਾਈਟਿਡ ਚਰਚ ਵਿੱਚ ‘ਗੈੱਟ ਆਊਟ ਐਂਡ ਵੋਟ ਅਸੈਂਬਲੀ’ ਕਰਵਾਈ ਗਈ। ਇਸ ਦੌਰਾਨ ਮੈਂਬਰਾਂ ਨੇ ਯੋਗ ਵੋਟਰਾਂ ਤੱਕ ਪਹੁੰਚ ਕਰਨ ਅਤੇ ਉਨ੍ਹਾਂ ਨੂੰ ਵੋਟ ਪਾਉਣ ਲਈ ਪ੍ਰੇਰਿਤ ਕਰਨ ਸਬੰਧੀ ਰਣਨੀਤੀ ਤਿਆਰ ਕੀਤੀ।
ਸੰਸਥਾ ਦੇ ਕਾਰਜਕਾਰੀ ਨਿਰਦੇਸ਼ਕ ਰਿਆਨ ਐਂਡਰਸਨ ਨੇ ਕਿਹਾ ਕਿ ਰੈਫਰੈਂਡਮ ਦਾ ਨਤੀਜਾ ਵੋਟਰਾਂ ਦੀ ਹਾਜ਼ਰੀ ’ਤੇ ਨਿਰਭਰ ਕਰੇਗਾ। ਉਨ੍ਹਾਂ ਮੁਤਾਬਕ ਮੁਹਿੰਮ ਦਾ ਉਦੇਸ਼ ਲੋਕਾਂ ਨੂੰ ਰੈਫਰੈਂਡਮ ਦੇ ਸਵਾਲਾਂ ਅਤੇ ਉਨ੍ਹਾਂ ਦੇ ਸੰਭਾਵਿਤ ਪ੍ਰਭਾਵਾਂ ਬਾਰੇ ਜਾਣਕਾਰੀ ਦੇਣਾ ਅਤੇ ਵੋਟਿੰਗ ਲਈ ਪ੍ਰੇਰਿਤ ਕਰਨਾ ਹੈ।
ਰੈਫਰੈਂਡਮ ਵਿੱਚ ਇਮੀਗ੍ਰੇਸ਼ਨ, ਸੂਬਾਈ ਅਧਿਕਾਰਾਂ ਅਤੇ ਸੰਵਿਧਾਨਕ ਮਾਮਲਿਆਂ ਨਾਲ ਸਬੰਧਤ ਸਵਾਲ ਸ਼ਾਮਲ ਹਨ। ਅਲਬਰਟਾ ਸਰਕਾਰ ਵੱਲੋਂ 19 ਅਕਤੂਬਰ ਨੂੰ ਰੈਫਰੈਂਡਮ ਕਰਵਾਉਣ ਦੀ ਪੁਸ਼ਟੀ ਕੀਤੀ ਗਈ ਹੈ।
ਕੈਲਗਰੀ ਅਲਾਇੰਸ ਫਾਰ ਦ ਕਾਮਨ ਗੁੱਡ ਆਪਣੇ ਆਪ ਨੂੰ ਗੈਰ-ਪੱਖਪਾਤੀ ਗੈਰ-ਮੁਨਾਫ਼ਾ ਸੰਸਥਾ ਦੱਸਦੀ ਹੈ। ਹਾਲਾਂਕਿ, ਇਸ ਨੇ ਜੂਨ ਵਿੱਚ ਰੈਫਰੈਂਡਮ ਦੇ ਪਹਿਲੇ ਨੌਂ ਸਵਾਲਾਂ ’ਤੇ ‘ਨਹੀਂ’ ਵੋਟ ਪਾਉਣ ਦੀ ਅਪੀਲ ਵਾਲੀ ਮੁਹਿੰਮ ਸ਼ੁਰੂ ਕੀਤੀ ਸੀ। ਸੰਸਥਾ ਦਾ ਕਹਿਣਾ ਹੈ ਕਿ ਇਨ੍ਹਾਂ ਸਵਾਲਾਂ ਦਾ ਸਥਾਨਕ ਭਾਈਚਾਰਿਆਂ ’ਤੇ ਪ੍ਰਭਾਵ ਪੈ ਸਕਦਾ ਹੈ।
