ਵੈਸਟ ਕੇਲੋਨਾ ਸਿਟੀ ਕੌਂਸਲ ਚੋਣ ਲਈ ਚੈਡ ਗੈਰਰੈਕਟ ਨੇ ਉਮੀਦਵਾਰੀ ਦਾ ਕੀਤਾ ਐਲਾਨ
ਵੈਸਟ ਕੇਲੋਨਾ-ਵੈਸਟ ਕੇਲੋਨਾ ਦੇ ਲੰਬੇ ਸਮੇਂ ਤੋਂ ਵਸਨੀਕ ਚੈਡ ਗੈਰਰੈਕਟ ਨੇ ਇਸ ਸਾਲ ਹੋਣ ਵਾਲੀਆਂ ਨਗਰ ਨਿਗਮ ਚੋਣਾਂ ਵਿੱਚ ਸਿਟੀ ਕੌਂਸਲਰ ਦੇ ਅਹੁਦੇ ਲਈ ਚੋਣ ਲੜਨ ਦਾ ਐਲਾਨ ਕੀਤਾ ਹੈ।ਇਹ ਪਹਿਲਾ ਮੌਕਾ ਹੈ ਜਦੋਂ ਗੈਰਰੈਕਟ ਆਪਣਾ ਨਾਮ ਨਗਰ ਨਿਗਮ ਚੋਣਾਂ ਲਈ ਮੈਦਾਨ ਵਿੱਚ ਉਤਾਰ ਰਹੇ ਹਨ। ਉਨ੍ਹਾਂ ਕਿਹਾ ਕਿ ਉਹ ਸਿਟੀ ਹਾਲ ਵਿੱਚ ਵਿਹਾਰਕ ਲੀਡਰਸ਼ਿਪ, ਜਵਾਬਦੇਹੀ ਅਤੇ ਲੋਕਾਂ ਦੀ ਮਜ਼ਬੂਤ ਆਵਾਜ਼ ਨੂੰ ਤਰਜੀਹ ਦੇਣ ਲਈ ਚੋਣ ਲੜ ਰਹੇ ਹਨ।
ਗੈਰਰੈਕਟ ਨੇ ਕਿਹਾ, "ਵੈਸਟ ਕੇਲੋਨਾ ਸਿਰਫ਼ ਉਹ ਥਾਂ ਨਹੀਂ ਜਿੱਥੇ ਮੈਂ ਰਹਿੰਦਾ ਹਾਂ, ਇਹ ਉਹ ਸ਼ਹਿਰ ਹੈ ਜਿੱਥੇ ਮੈਂ ਵੱਡਾ ਹੋਇਆ, ਆਪਣਾ ਪਰਿਵਾਰ ਵਸਾਇਆ ਅਤੇ ਆਪਣੇ ਭਾਈਚਾਰੇ ਲਈ ਕੰਮ ਕੀਤਾ।"ਉਨ੍ਹਾਂ ਕਿਹਾ ਕਿ ਵੈਸਟ ਕੇਲੋਨਾ ਤੇਜ਼ੀ ਨਾਲ ਵਿਕਸਤ ਹੋ ਰਿਹਾ ਹੈ, ਪਰ ਇਸ ਵਿਕਾਸ ਨੂੰ ਯੋਜਨਾਬੱਧ ਅਤੇ ਲੋਕਾਂ ਦੇ ਹਿੱਤਾਂ ਨੂੰ ਧਿਆਨ ਵਿੱਚ ਰੱਖ ਕੇ ਅੱਗੇ ਵਧਾਇਆ ਜਾਣਾ ਚਾਹੀਦਾ ਹੈ।
ਗੈਰਰੈਕਟ ਦੀ ਚੋਣ ਮੁਹਿੰਮ ਦੇ ਮੁੱਖ ਮੁੱਦਿਆਂ ਵਿੱਚ ਵਿੱਤੀ ਜਵਾਬਦੇਹੀ, ਸੰਤੁਲਿਤ ਵਿਕਾਸ, ਜਨਤਕ ਸੁਰੱਖਿਆ, ਬੁਨਿਆਦੀ ਢਾਂਚੇ ਦਾ ਵਿਕਾਸ, ਆਵਾਜਾਈ ਵਿੱਚ ਸੁਧਾਰ ਅਤੇ ਨਿਵਾਸੀਆਂ ਦੀ ਜੀਵਨ ਗੁਣਵੱਤਾ ਦੀ ਰੱਖਿਆ ਸ਼ਾਮਲ ਹਨ।ਉਨ੍ਹਾਂ ਕਿਹਾ ਕਿ ਸਾਲਾਂ ਤੋਂ ਉਹ ਗੁਆਂਢੀਆਂ, ਸਥਾਨਕ ਕਾਰੋਬਾਰੀਆਂ, ਪਰਿਵਾਰਾਂ ਅਤੇ ਸੀਨੀਅਰ ਨਾਗਰਿਕਾਂ ਨਾਲ ਗੱਲਬਾਤ ਕਰਦੇ ਆ ਰਹੇ ਹਨ ਅਤੇ ਜ਼ਿਆਦਾਤਰ ਲੋਕ ਵਾਜਬ ਟੈਕਸ, ਬਿਹਤਰ ਸੜਕਾਂ ਅਤੇ ਆਵਾਜਾਈ, ਸਥਾਨਕ ਕਾਰੋਬਾਰਾਂ ਨੂੰ ਸਮਰਥਨ ਅਤੇ ਸੁਰੱਖਿਅਤ ਸ਼ਹਿਰ ਦੀ ਮੰਗ ਕਰਦੇ ਹਨ।
ਗੈਰਰੈਕਟ ਨੇ ਵਾਅਦਾ ਕੀਤਾ ਕਿ ਜੇਕਰ ਉਹ ਚੁਣੇ ਜਾਂਦੇ ਹਨ ਤਾਂ ਉਹ ਪਾਰਦਰਸ਼ੀ ਢੰਗ ਨਾਲ ਕੰਮ ਕਰਨਗੇ ਅਤੇ ਹਰ ਨਾਗਰਿਕ ਲਈ ਆਸਾਨੀ ਨਾਲ ਉਪਲਬਧ ਰਹਿਣਗੇ।ਉਨ੍ਹਾਂ ਕਿਹਾ, "ਮੈਂ ਪਹਿਲਾਂ ਲੋਕਾਂ ਦੀ ਗੱਲ ਸੁਣਾਂਗਾ, ਖੁੱਲ੍ਹ ਕੇ ਸੰਚਾਰ ਕਰਾਂਗਾ ਅਤੇ ਪੂਰੇ ਭਾਈਚਾਰੇ ਦੇ ਹਿੱਤ ਵਿੱਚ ਵਿਹਾਰਕ ਫ਼ੈਸਲੇ ਲਵਾਂਗਾ। ਭਾਵੇਂ ਕਿਸੇ ਨੇ ਮੈਨੂੰ ਵੋਟ ਦਿੱਤੀ ਹੋਵੇ ਜਾਂ ਨਾ, ਮੈਂ ਹਰ ਇੱਕ ਦੀ ਗੱਲ ਸੁਣਨ ਲਈ ਹਮੇਸ਼ਾ ਤਿਆਰ ਰਹਾਂਗਾ।" ਆਉਣ ਵਾਲੇ ਮਹੀਨਿਆਂ ਦੌਰਾਨ ਗੈਰਰੈਕਟ ਵੈਸਟ ਕੇਲੋਨਾ ਦੇ ਵੱਖ-ਵੱਖ ਇਲਾਕਿਆਂ ਵਿੱਚ ਜਾ ਕੇ ਲੋਕਾਂ ਨਾਲ ਮੁਲਾਕਾਤ ਕਰਨਗੇ ਅਤੇ ਉਨ੍ਹਾਂ ਦੇ ਸੁਝਾਅ ਅਤੇ ਚਿੰਤਾਵਾਂ ਸੁਣਣਗੇ।ਵੈਸਟ ਕੇਲੋਨਾ ਸਮੇਤ ਬ੍ਰਿਟਿਸ਼ ਕੋਲੰਬੀਆ ਦੀਆਂ 2026 ਨਗਰ ਨਿਗਮ ਚੋਣਾਂ 17 ਅਕਤੂਬਰ 2026 ਨੂੰ ਹੋਣਗੀਆਂ।
