ਮੱਧ ਪੂਰਬ ਯੁੱਧ ਦੌਰਾਨ ਬਾਜ਼ਾਰ ਸਥਿਰ ਕਰਨ ਲਈ ਕੈਨੇਡਾ ਵੱਲੋਂ 23.6 ਮਿਲੀਅਨ ਬੈਰਲ ਤੇਲ ਦੀ ਸਪਲਾਈ
ਓਟਵਾ-ਕੈਨੇਡਾ ਨੇ ਵਿਸ਼ਵ ਊਰਜਾ ਬਾਜ਼ਾਰ ਨੂੰ ਸਥਿਰ ਕਰਨ ਲਈ 23.6 ਮਿਲੀਅਨ ਬੈਰਲ ਤੇਲ ਮੁਹੱਈਆ ਕਰਨ ਦਾ ਵਾਅਦਾ ਕੀਤਾ ਹੈ। ਇਹ ਕਦਮ 32 ਦੇਸ਼ਾਂ ਵਾਲੀ International Energy Agency ਦੀ ਸਾਂਝੀ ਯੋਜਨਾ ਦੇ ਤਹਿਤ ਚੁੱਕਿਆ ਗਿਆ ਹੈ, ਜੋ ਮੱਧ ਪੂਰਬ ਵਿੱਚ ਚੱਲ ਰਹੇ ਯੁੱਧ ਕਾਰਨ ਵਧ ਰਹੀਆਂ ਤੇਲ ਕੀਮਤਾਂ ਨੂੰ ਕਾਬੂ ਕਰਨ ਲਈ ਬਣਾਈ ਗਈ ਹੈ।
ਇਹ ਐਲਾਨ ਉਸ ਤੋਂ ਦੋ ਦਿਨ ਬਾਅਦ ਆਇਆ ਹੈ ਜਦੋਂ ਕੁਦਰਤੀ ਸਰੋਤ ਮੰਤਰੀ Tim Hodgson ਨੇ ਕਿਹਾ ਸੀ ਕਿ ਕੈਨੇਡਾ ਵਿਸ਼ਵ ਪੱਧਰ ’ਤੇ ਤੇਲ ਦੀਆਂ ਕੀਮਤਾਂ ਘਟਾਉਣ ਲਈ ਆਪਣਾ ਯੋਗਦਾਨ ਪਾਏਗਾ।
ਮੰਤਰੀ ਦੇ ਦਫ਼ਤਰ ਵੱਲੋਂ ਜਾਰੀ ਬਿਆਨ ਅਨੁਸਾਰ ਆਉਣ ਵਾਲੇ ਮਹੀਨਿਆਂ ਵਿੱਚ ਕੈਨੇਡਾ ਵੱਲੋਂ ਕੁਦਰਤੀ ਗੈਸ ਦੀ ਨਿਰਯਾਤ ਵੀ ਵਧਾਈ ਜਾਵੇਗੀ, ਹਾਲਾਂਕਿ ਇਸ ਸਬੰਧੀ ਹੋਰ ਵਿਸਥਾਰ ਨਹੀਂ ਦਿੱਤੇ ਗਏ।
ਬਿਆਨ ਵਿੱਚ ਕਿਹਾ ਗਿਆ ਹੈ ਕਿ International Energy Agency ਦੇ 32 ਮੈਂਬਰ ਦੇਸ਼ਾਂ ਨੇ ਮਿਲ ਕੇ ਆਪਣੇ ਤੇਲ ਦੇ ਭੰਡਾਰ ਜਾਰੀ ਕਰਨ ’ਤੇ ਸਹਿਮਤੀ ਦਿੱਤੀ ਹੈ। ਏਜੰਸੀ ਦੇ ਇਤਿਹਾਸ ਵਿੱਚ ਇਹ ਸਭ ਤੋਂ ਵੱਡੀ ਤੇਲ ਰਿਲੀਜ਼ ਯੋਜਨਾ ਦੱਸੀ ਜਾ ਰਹੀ ਹੈ।
ਦੁਨੀਆ ਭਰ ਵਿੱਚ ਤੇਲ ਦੀਆਂ ਕੀਮਤਾਂ ਇਸ ਕਰਕੇ ਤੇਜ਼ੀ ਨਾਲ ਵਧ ਰਹੀਆਂ ਹਨ ਕਿਉਂਕਿ ਮੱਧ ਪੂਰਬ ਵਿੱਚ ਚੱਲ ਰਹੇ ਯੁੱਧ ਕਾਰਨ ਮਹੱਤਵਪੂਰਨ Strait of Hormuz ਰਾਹੀਂ ਤੇਲ ਦੀ ਆਵਾਜਾਈ ਪ੍ਰਭਾਵਿਤ ਹੋ ਗਈ ਹੈ। ਇਸ ਰਾਹੀਂ ਦੁਨੀਆ ਦੀ ਲਗਭਗ ਪੰਜਵੀਂ ਹਿੱਸੇਦਾਰੀ ਤੇਲ ਸਪਲਾਈ ਗੁਜ਼ਰਦੀ ਹੈ।
