ਬਿਲ-21 ਸੁਣਵਾਈ ਦੌਰਾਨ ਮੁੱਖ ਜੱਜ ਵੱਲੋਂ TALQ ਦੀ ਦਲੀਲ ‘ਤੇ ਸਖ਼ਤ ਟਿੱਪਣੀ
ਓਟਵਾ-ਕੈਨੇਡਾ ਦੇ ਸੁਪਰੀਮ ਕੋਰਟ ਦੇ ਮੁੱਖ ਜੱਜ Richard Wagner (ਰਿਚਰਡ ਵਾਗਨਰ) ਨੇ ਕਿਊਬੈਕ ਦੇ ਧਾਰਮਿਕ ਚਿੰਨ੍ਹਾਂ ਸਬੰਧੀ ਕਾਨੂੰਨ ਬਿਲ-21 ਮਾਮਲੇ ਦੀ ਸੁਣਵਾਈ ਦੌਰਾਨ ਅੰਗਰੇਜ਼ੀ ਹੱਕਾਂ ਲਈ ਲੜ ਰਹੀ ਸੰਸਥਾ TALQ ਦੀ ਇੱਕ ਦਲੀਲ ‘ਤੇ ਸਖ਼ਤ ਟਿੱਪਣੀ ਕਰਦੇ ਹੋਏ ਉਸਨੂੰ “ਲਗਭਗ ਅਪਮਾਨਜਨਕ” ਕਰਾਰ ਦਿੱਤਾ।
ਸੁਣਵਾਈ ਦੌਰਾਨ ਜੱਜ ਵਾਗਨਰ ਨੇ ਕਿਹਾ ਕਿ TALQ ਵੱਲੋਂ ਪੇਸ਼ ਦਸਤਾਵੇਜ਼ ਇਹ ਦਰਸਾਉਂਦਾ ਹੈ ਕਿ ਅੰਗਰੇਜ਼ੀ ਕਮਿਊਨਿਟੀ ਫਰਾਂਸੀਸੀ ਭਾਈਚਾਰੇ ਨਾਲੋਂ ਵੱਧ ਵਿਭਿੰਨਤਾ ਵਾਲੀ ਹੈ, ਜਿਸ ਨਾਲ ਉਹ ਸਹਿਮਤ ਨਹੀਂ ਹਨ। ਉਨ੍ਹਾਂ ਨੇ ਉਲੇਖ ਕੀਤਾ ਕਿ ਮਾਂਟਰੀਅਲ ਦੇ ਫਰਾਂਸੀਸੀ ਸਕੂਲਾਂ ਵਿੱਚ ਵੀ ਵੱਖ-ਵੱਖ ਧਰਮਾਂ ਅਤੇ ਦੇਸ਼ਾਂ ਨਾਲ ਸਬੰਧਤ ਬੱਚੇ ਪੜ੍ਹਦੇ ਹਨ, ਇਸ ਲਈ ਸਿਰਫ਼ ਅੰਗਰੇਜ਼ੀ ਕਮਿਊਨਿਟੀ ਨੂੰ ਹੀ ਵੱਧ ਵਿਭਿੰਨਤਾ ਵਾਲਾ ਕਰਾਰ ਦੇਣਾ ਠੀਕ ਨਹੀਂ।
ਹਾਲਾਂਕਿ Julius Grey (ਜੂਲਿਅਸ ਗਰੇ), ਜੋ ਕਿ TALQ ਦੇ ਵਕੀਲ ਹਨ, ਨੇ ਕਿਹਾ ਕਿ ਅਦਾਲਤ ਨੇ ਉਨ੍ਹਾਂ ਦੀ ਦਲੀਲ ਨੂੰ ਗਲਤ ਸਮਝਿਆ ਹੈ। ਉਨ੍ਹਾਂ ਅਨੁਸਾਰ ਉਹ ਸਿਰਫ਼ ਇਹ ਦਰਸਾਉਣਾ ਚਾਹੁੰਦੇ ਸਨ ਕਿ ਅੰਗਰੇਜ਼ੀ ਕਮਿਊਨਿਟੀ ਵੀ ਕਾਫ਼ੀ ਵਿਭਿੰਨਤਾ ਵਾਲੀ ਹੈ।
ਬਿਲ-21 ਅਨੁਸਾਰ ਅਧਿਆਪਕਾਂ, ਪੁਲਿਸ ਅਧਿਕਾਰੀਆਂ ਅਤੇ ਕੁਝ ਹੋਰ ਸਰਕਾਰੀ ਕਰਮਚਾਰੀਆਂ ਨੂੰ ਡਿਊਟੀ ਦੌਰਾਨ ਹਿਜਾਬ, ਕਿਪਾਹ ਅਤੇ ਦਸਤਾਰ ਵਰਗੇ ਧਾਰਮਿਕ ਚਿੰਨ੍ਹ ਪਹਿਨਣ ‘ਤੇ ਪਾਬੰਦੀ ਹੈ। TALQ ਦਾ ਕਹਿਣਾ ਹੈ ਕਿ ਅੰਗਰੇਜ਼ੀ ਸਕੂਲਾਂ ਨੂੰ ਇਸ ਕਾਨੂੰਨ ਤੋਂ ਛੋਟ ਮਿਲਣੀ ਚਾਹੀਦੀ ਹੈ, ਕਿਉਂਕਿ ਇਹ ਘੱਟਗਿਣਤੀ ਭਾਸ਼ਾ ਦੇ ਹੱਕਾਂ ਦੀ ਉਲੰਘਣਾ ਕਰਦਾ ਹੈ। ਮਾਮਲੇ ਦੀ ਸੁਣਵਾਈ ਹਾਲੇ ਜਾਰੀ ਹੈ।
