CRA, ESDC ਵਿੱਚ ਸੈਂਕੜੇ ਸਰਕਾਰੀ ਨੌਕਰੀਆਂ ਖਤਰੇ ’ਚ

ਓਟਾਵਾ-ਕੈਨੇਡਾ ਰੈਵੇਨਿਊ ਏਜੰਸੀ ਦੇ ਉੱਚ ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਨੌਕਰੀਆਂ ਵਿੱਚ ਕਟੌਤੀ ਵਧਣ ਨਾਲ ਏਜੰਸੀ ਸੇਵਾਵਾਂ ਪ੍ਰਦਾਨ ਕਰਨ ਦੇ ਯੋਗ ਹੋਣ ’ਤੇ ਪ੍ਰਭਾਵ ਪਵੇਗਾ। ਜਾਣਕਾਰੀ ਮੁਤਾਬਕ ਕਮਿਸ਼ਨਰ ਬੌਬ ਹੈਮਿਲਟਨ ਅਤੇ ਡਿਪਟੀ ਕਮਿਸ਼ਨਰ ਜੀਨ-ਫਰਾਂਸੋਆ ਫੋਰਟਿਨ ਨੇ ਵੀਰਵਾਰ ਨੂੰ ਸਟਾਫ ਨੂੰ ਇੱਕ ਸੰਦੇਸ਼ ਵਿੱਚ ਕਿਹਾ ਕਿ ਏਜੰਸੀ ਵਿੱਚ 280 ਕਰਮਚਾਰੀ ਆਪਣੀਆਂ ਨੌਕਰੀਆਂ ਗੁਆ ਦੇਣਗੇ। ਸਰਕਾਰ ਵੱਲੋਂ ਬੱਚਤ ਲੱਭਣ ਦੀ ਮੰਗ ਨੂੰ ਪੂਰਾ ਕਰਨ ਲਈ ਏਜੰਸੀ ਦੋ ਸਾਲਾਂ ਤੋਂ ਵੱਧ ਸਮੇਂ ਤੋਂ ਆਪਣੇ ਸੰਚਾਲਨ ਬਜਟ ਦੀ ਜਾਂਚ ਕਰ ਰਹੀ ਹੈ।   ਜ਼ਿਕਰਯੋਗ ਹੈ ਕੁਝ ਅੰਦਰੂਨੀ ਸੇਵਾਵਾਂ ਪ੍ਰਭਾਵਿਤ ਹੋਣ ਦੀ ਸੰਭਾਵਨਾ ਜਾਪਦੀ ਹੈ ਅਤੇ ਕੁਝ ਸੇਵਾਵਾਂ ਨੂੰ ਪੂਰੀ ਤਰ੍ਹਾਂ ਖਤਮ ਕਰ ਦਿੱਤਾ ਜਾਵੇਗਾ। ਗੌਰਤਲਬ ਹੈ ਕੈਨੇਡਾ ਰੈਵੇਨਿਊ ਏਜੰਸੀ ਦੀਆਂ ਨੌਕਰੀਆਂ ਵਿੱਚ ਕਟੌਤੀ ਦਾ ਅਸਰ ਸੀਆਰਏ ਦੀਆਂ ਸ਼ਾਖਾਵਾਂ ’ਤੇ ਪਵੇਗਾ ਪਰ ਕਟੌਤੀਆਂ ਮੁੱਖ ਤੌਰ ’ਤੇ ਰਾਸ਼ਟਰੀ ਰਾਜਧਾਨੀ ਖੇਤਰ ਦੇ ਕਰਮਚਾਰੀਆਂ ’ਤੇ ਪੈਣਗੀਆਂ। ਕਾਰਜਕਾਰੀ ਅਹੁਦੇ ਵੀ ਕਟੌਤੀਆਂ ਨਾਲ ਪ੍ਰਭਾਵਿਤ ਹੋਣਗੇ ਅਤੇ ਅਹੁਦਿਆਂ ਦੀ ਪ੍ਰਭਾਵੀ ਸਮਾਪਤੀ ਮਿਤੀ ਜੂਨ ਦੇ ਅੰਤ ਵਿੱਚ ਹੋਵੇਗੀ। ਨਵੀਆਂ ਕਟੌਤੀਆਂ ਦੇ ਮੱਦੇਨਜ਼ਰ, ਟੈਕਸੇਸ਼ਨ ਕਰਮਚਾਰੀਆਂ ਦੀ ਯੂਨੀਅਨ ਦਾ ਕਹਿਣਾ ਹੈ ਕਿ ਉਹ ਕੈਨੇਡਾ ਸਰਕਾਰ ਤੋਂ ਜਵਾਬਦੇਹੀ ਦੀ ਮੰਗ ਕਰ ਰਹੀ ਹੈ ਅਤੇ ਸੀਆਰਏ ਵਿੱਚ ਨੌਕਰੀਆਂ ਵਿੱਚ ਕਟੌਤੀ ’ਤੇ ਤੁਰੰਤ ਰੋਕ”ਲਗਾਉਣ ਦੀ ਮੰਗ ਕਰ ਰਹੀ ਹੈ।