ਉੱਤਰੀ ਭਾਰਤ ਦੇ ਜਲ ਭੰਡਾਰਾਂ ਵਿੱਚ ਪਾਣੀ ਦੀ ਸਥਿਤੀ ਬਿਹਤਰ, ਕਮਜ਼ੋਰ ਮਾਨਸੂਨ ਦੀਆਂ ਚਿੰਤਾਵਾਂ ਬਰਕਰਾਰ

ਚੰਡੀਗੜ੍ਹ-ਇਸ ਸਾਲ ਆਮ ਤੋਂ ਘੱਟ ਮਾਨਸੂਨ ਦੀਆਂ ਸੰਭਾਵਨਾਵਾਂ ਦਰਮਿਆਨ ਉੱਤਰੀ ਭਾਰਤ ਦੇ ਜਲ ਭੰਡਾਰਾਂ ਵਿੱਚ ਪਾਣੀ ਦੀ ਸਥਿਤੀ ਫਿਲਹਾਲ ਸੰਤੋਸ਼ਜਨਕ ਦੱਸੀ ਜਾ ਰਹੀ ਹੈ। ਕੇਂਦਰੀ ਜਲ ਕਮਿਸ਼ਨ ਦੀ 14 ਮਈ ਨੂੰ ਜਾਰੀ ਰਿਪੋਰਟ ਅਨੁਸਾਰ ਹਿਮਾਚਲ ਪ੍ਰਦੇਸ਼, ਪੰਜਾਬ ਅਤੇ ਰਾਜਸਥਾਨ ਦੇ ਬੰਨ੍ਹਾਂ ਵਿੱਚ ਪਿਛਲੇ ਸਾਲ ਅਤੇ ਆਮ ਔਸਤ ਨਾਲੋਂ ਵੱਧ ਪਾਣੀ ਮੌਜੂਦ ਹੈ।

ਰਿਪੋਰਟ ਮੁਤਾਬਕ ਦੇਸ਼ ਦੇ 166 ਵੱਡੇ ਜਲ ਭੰਡਾਰਾਂ ਵਿੱਚ ਇਸ ਵੇਲੇ 63.232 ਬਿਲੀਅਨ ਘਣ ਮੀਟਰ ਪਾਣੀ ਸਟੋਰ ਹੈ, ਜੋ ਕੁੱਲ ਸਮਰੱਥਾ ਦਾ ਕਰੀਬ 34.45 ਫੀਸਦੀ ਬਣਦਾ ਹੈ। ਇਹ ਮਾਤਰਾ ਪਿਛਲੇ ਸਾਲ ਦੇ 56.002 ਬਿਲੀਅਨ ਘਣ ਮੀਟਰ ਅਤੇ ਆਮ ਔਸਤ 51.052 ਬਿਲੀਅਨ ਘਣ ਮੀਟਰ ਨਾਲੋਂ ਕਾਫ਼ੀ ਵੱਧ ਹੈ।

ਮੌਸਮ ਵਿਭਾਗ ਅਤੇ ਮੌਸਮੀ ਮਾਹਿਰਾਂ ਨੇ ਚੇਤਾਵਨੀ ਦਿੱਤੀ ਹੈ ਕਿ ਐਲ ਨੀਨੋ ਪ੍ਰਭਾਵ ਕਾਰਨ ਇਸ ਸਾਲ ਦੱਖਣ-ਪੱਛਮੀ ਮਾਨਸੂਨ ਕਮਜ਼ੋਰ ਪੈ ਸਕਦਾ ਹੈ, ਜਿਸ ਨਾਲ ਘੱਟ ਜਾਂ ਅਸਮਾਨ ਬਾਰਿਸ਼ ਅਤੇ ਲੰਬੇ ਸੁੱਕੇ ਦੌਰ ਦੀ ਸੰਭਾਵਨਾ ਬਣ ਸਕਦੀ ਹੈ। ਇਸ ਨਾਲ ਖਰੀਫ਼ ਫਸਲਾਂ ‘ਤੇ ਅਸਰ ਪੈਣ ਦੀ ਚਿੰਤਾ ਜਤਾਈ ਜਾ ਰਹੀ ਹੈ।ਮਾਹਿਰਾਂ ਦਾ ਕਹਿਣਾ ਹੈ ਕਿ ਮੌਜੂਦਾ ਜਲ ਸਟੋਰੇਜ ਹਾਲਾਤ ਰਾਹਤ ਭਰੇ ਹਨ, ਪਰ ਗਰਮੀ ਦੇ ਮੌਸਮ ਵਿੱਚ ਪਾਣੀ ਦੀ ਖਪਤ ਵਧਣ ਅਤੇ ਮਾਨਸੂਨ ਦੀ ਅਣਿਸ਼ਚਿਤਤਾ ਕਾਰਨ ਅਗਲੇ ਮਹੀਨੇ ਚੁਣੌਤੀਪੂਰਨ ਰਹਿ ਸਕਦੇ ਹਨ।