ਭਾਰਤੀ ਕੁਸ਼ਤੀ ਮਹਾਸੰਘ ਤਾਨਾਸ਼ਾਹੀ ਕਰ ਰਿਹਾ, ਉਹ ਡਰਦੇ ਹਨ ਕਿ ਮੈਂ ਮੁੜ ਤਗਮੇ ਜਿੱਤ ਲਵਾਂਗੀ : ਵਿਨੇਸ਼ ਫੋਗਾਟ
ਗੋਂਡਾ-ਭਾਰਤੀ ਮਹਿਲਾ ਪਹਿਲਵਾਨ ਵਿਨੇਸ਼ ਫੋਗਾਟ ਨੇ ਭਾਰਤੀ ਕੁਸ਼ਤੀ ਮਹਾਸੰਘ ਉੱਤੇ ਤਿੱਖਾ ਹਮਲਾ ਕਰਦਿਆਂ ਕਿਹਾ ਹੈ ਕਿ ਮਹਾਸੰਘ ਤਾਨਾਸ਼ਾਹੀ ਢੰਗ ਨਾਲ ਕੰਮ ਕਰ ਰਿਹਾ ਹੈ ਅਤੇ ਉਹ ਡਰਦੇ ਹਨ ਕਿ ਉਹ ਮੁੜ ਤਗਮੇ ਜਿੱਤ ਸਕਦੀ ਹੈ।
ਵਿਨੇਸ਼ ਫੋਗਾਟ ਨੇ ਇਹ ਬਿਆਨ ਗੋਂਡਾ ਵਿੱਚ ਖੁੱਲ੍ਹੇ ਕੌਮੀ ਦਰਜਾਬੰਦੀ ਕੁਸ਼ਤੀ ਟੂਰਨਾਮੈਂਟ ਵਿੱਚ ਹਿੱਸਾ ਲੈਣ ਤੋਂ ਰੋਕੇ ਜਾਣ ਮਗਰੋਂ ਦਿੱਤਾ। ਇਹ ਟੂਰਨਾਮੈਂਟ ਸਾਬਕਾ ਸੰਸਦ ਮੈਂਬਰ ਬ੍ਰਿਜ ਭੂਸ਼ਣ ਸ਼ਰਨ ਸਿੰਘ ਦੇ ਗ੍ਰਹਿ ਇਲਾਕੇ ਵਿੱਚ ਹੋ ਰਿਹਾ ਹੈ, ਜਿਨ੍ਹਾਂ ਉੱਤੇ ਵਿਨੇਸ਼ ਪਹਿਲਾਂ ਜਿਨਸੀ ਸ਼ੋਸ਼ਣ ਦੇ ਦੋਸ਼ ਲਗਾ ਚੁੱਕੀ ਹੈ।
ਵਿਨੇਸ਼ ਆਪਣੇ ਪਤੀ ਸੋਮਵੀਰ ਅਤੇ ਹੋਰ ਪਹਿਲਵਾਨਾਂ ਨਾਲ ਨਵਾਬਗੰਜ ਸਥਿਤ ਨੰਦਿਨੀਨਗਰ ਮਹਾਵਿਦਿਆਲਿਆ ਵਿੱਚ ਮਹਿਲਾ ਫ੍ਰੀ-ਸਟਾਈਲ ਮੁਕਾਬਲੇ ਦੀ ਜਾਂਚ ਪ੍ਰਕਿਰਿਆ ਲਈ ਪਹੁੰਚੀ ਸੀ।ਵਿਨੇਸ਼ ਨੇ ਕਿਹਾ ਕਿ ਉਸਦਾ 10 ਮਹੀਨੇ ਦਾ ਪੁੱਤਰ ਕ੍ਰਿਧਵ ਉਸਦੀ ਜ਼ਿੰਦਗੀ ਵਿੱਚ ਮੁੜ ਖੁਸ਼ੀ ਅਤੇ ਹੌਸਲਾ ਲੈ ਕੇ ਆਇਆ ਹੈ।
ਉਸਨੇ ਕਿਹਾ, “ਪੈਰਿਸ ਓਲੰਪਿਕ ਵਿੱਚ ਫਾਈਨਲ ਤੋਂ ਅਯੋਗ ਕਰਾਰ ਦਿੱਤੇ ਜਾਣ ਮਗਰੋਂ ਮੈਂ ਅੰਦਰੋਂ ਟੁੱਟ ਗਈ ਸੀ। ਮੇਰੇ ਪੁੱਤਰ ਨੇ ਮੇਰੀ ਜ਼ਿੰਦਗੀ ਵਿੱਚ ਮੁੜ ਖੁਸ਼ੀ ਭਰ ਦਿੱਤੀ ਹੈ। ਹੁਣ ਮੈਨੂੰ ਲੱਗਦਾ ਹੈ ਕਿ ਮੈਂ ਮੁੜ ਮੈਦਾਨ ਵਿੱਚ ਵਾਪਸੀ ਕਰ ਸਕਦੀ ਹਾਂ।”
ਵਿਨੇਸ਼ ਨੇ ਕਿਹਾ ਕਿ ਉਸਦਾ ਸੁਪਨਾ ਹੈ ਕਿ ਅਗਲੇ ਓਲੰਪਿਕ ਵਿੱਚ ਉਸਦਾ ਪੁੱਤਰ ਉਸਨੂੰ ਹੌਸਲਾ ਦੇਂਦਾ ਵੇਖੇ।ਦੋ ਦਿਨ ਪਹਿਲਾਂ ਵਿਨੇਸ਼ ਨੂੰ ਕਾਰਨ ਦੱਸੋ ਨੋਟਿਸ ਜਾਰੀ ਕਰਕੇ 26 ਜੂਨ ਤੱਕ ਮੁਕਾਬਲਿਆਂ ਤੋਂ ਬਾਹਰ ਕਰ ਦਿੱਤਾ ਗਿਆ ਸੀ। ਇਸ ਬਾਰੇ ਉਸਨੇ ਕਿਹਾ ਕਿ ਭਾਰਤੀ ਕੁਸ਼ਤੀ ਮਹਾਸੰਘ ਉਸਨੂੰ ਏਸ਼ਿਆਈ ਖੇਡਾਂ ਵਿੱਚ ਹਿੱਸਾ ਲੈਣ ਤੋਂ ਰੋਕਣਾ ਚਾਹੁੰਦਾ ਹੈ।
ਵਿਨੇਸ਼ ਨੇ ਦੱਸਿਆ ਕਿ ਉਸਨੇ ਮਹਾਸੰਘ ਦੇ ਪ੍ਰਧਾਨ ਸੰਜੇ ਸਿੰਘ ਨੂੰ ਕਿਹਾ ਸੀ ਕਿ ਪਹਿਲਾਂ ਉਸਨੂੰ ਖੇਡਣ ਦਿੱਤਾ ਜਾਵੇ ਅਤੇ ਜੇਕਰ 14 ਦਿਨਾਂ ਬਾਅਦ ਵੀ ਜਵਾਬ ਨਾਲ ਸੰਤੁਸ਼ਟੀ ਨਾ ਹੋਵੇ ਤਾਂ ਕਾਰਵਾਈ ਕਰ ਲਈ ਜਾਵੇ।ਉਸਨੇ ਕਿਹਾ ਕਿ ਮਹਾਸੰਘ ਨੇ ਉਸਦੀ ਗੱਲ ਨਹੀਂ ਮੰਨੀ ਅਤੇ ਕਿਹਾ ਕਿ ਪਹਿਲਾਂ ਕਮੇਟੀ ਬਣੇਗੀ, ਫਿਰ ਫ਼ੈਸਲਾ ਹੋਵੇਗਾ।ਦੂਜੇ ਪਾਸੇ ਭਾਰਤੀ ਕੁਸ਼ਤੀ ਮਹਾਸੰਘ ਨੇ ਬਿਆਨ ਜਾਰੀ ਕਰਕੇ ਕਿਹਾ ਕਿ ਵਿਨੇਸ਼ ਨਿਯਮਾਂ ਅਨੁਸਾਰ ਮੁਕਾਬਲੇ ਵਿੱਚ ਹਿੱਸਾ ਲੈਣ ਲਈ ਯੋਗ ਨਹੀਂ ਸੀ।
ਇਸ ਦੌਰਾਨ ਵਿਨੇਸ਼ ਨੇ ਸਮਾਜਿਕ ਮਾਧਿਅਮ ‘ਐਕਸ’ ਉੱਤੇ ਦੱਸਿਆ ਕਿ ਅੰਤਰਰਾਸ਼ਟਰੀ ਜਾਂਚ ਏਜੰਸੀ ਨੇ ਉਸਨੂੰ 1 ਜਨਵਰੀ 2026 ਤੋਂ ਮੁਕਾਬਲਿਆਂ ਵਿੱਚ ਭਾਗ ਲੈਣ ਲਈ ਮਨਜ਼ੂਰੀ ਦੇ ਦਿੱਤੀ ਹੈ। ਉਸਨੇ ਕਿਹਾ ਕਿ ਡੋਪ ਜਾਂਚ ਨਾਲ ਜੁੜੇ ਮਾਮਲਿਆਂ ਵਿੱਚ ਉਸਨੇ ਪੂਰਾ ਸਹਿਯੋਗ ਦਿੱਤਾ ਸੀ ਅਤੇ ਇਹ ਮਾਮਲੇ ਡੋਪਿੰਗ ਨਿਯਮਾਂ ਦੀ ਉਲੰਘਣਾ ਨਹੀਂ ਬਣਦੇ।
