“ਫਾਰਐਵਰ ਕੈਨੇਡੀਅਨ” ਕਮੇਟੀ ਦੀ ਮੀਟਿੰਗ ਹੰਗਾਮੇ ਵਿੱਚ ਖਤਮ

ਕੈਲਗਰੀ- ਅਲਬਰਟਾ ਵਿੱਚ “Forever Canadian” ਪਟੀਸ਼ਨ ਸਬੰਧੀ ਹੋਈ ਵਿਸ਼ੇਸ਼ ਕਮੇਟੀ ਦੀ ਮੀਟਿੰਗ ਉਸ ਵੇਲੇ ਹੰਗਾਮੇ ਵਿੱਚ ਬਦਲ ਗਈ ਜਦੋਂ UCP ਕਾਕਸ ਵੱਲੋਂ ਇੱਕ ਖ਼ਬਰ ਰਿਲੀਜ਼ ਗਲਤੀ ਨਾਲ ਪਹਿਲਾਂ ਹੀ ਜਾਰੀ ਕਰ ਦਿੱਤੀ ਗਈ, ਹਾਲਾਂਕਿ ਵੋਟਿੰਗ ਅਜੇ ਹੋਈ ਹੀ ਨਹੀਂ ਸੀ।

ਇਹ ਕਮੇਟੀ ਥਾਮਸ ਲੂਕਾਸਜ਼ੁਕ ਦੀ ਪਟੀਸ਼ਨ ’ਤੇ ਵਿਚਾਰ ਕਰਨ ਲਈ ਬੈਠੀ ਸੀ। ਲੂਕਾਸਜ਼ੁਕ ਚਾਹੁੰਦੇ ਹਨ ਕਿ “ਕੀ ਅਲਬਰਟਾ ਕੈਨੇਡਾ ਦਾ ਹਿੱਸਾ ਬਣਿਆ ਰਹੇ?” ਵਾਲਾ ਸਵਾਲ ਰੈਫਰੈਂਡਮ ਦੀ ਬਜਾਏ ਵਿਧਾਨ ਸਭਾ ਵਿੱਚ MLAs ਵੱਲੋਂ ਤੈਅ ਕੀਤਾ ਜਾਵੇ।

ਮੀਟਿੰਗ ਦੌਰਾਨ UCP ਮੈਂਬਰਾਂ ਨੇ ਪ੍ਰੀਮੀਅਰ ਡੈਨੀਅਲ ਸਮਿਥ ਨੂੰ ਇਹ ਸਵਾਲ ਪਤਝੜ ਵਾਲੇ ਰੈਫਰੈਂਡਮ ਬੈਲਟ ’ਤੇ ਸ਼ਾਮਲ ਕਰਨ ਦੀ ਸਿਫ਼ਾਰਸ਼ ਵਾਲਾ ਮੋਸ਼ਨ ਪੇਸ਼ ਕੀਤਾ। ਪਰ ਵੋਟਿੰਗ ਤੋਂ ਪਹਿਲਾਂ ਹੀ UCP ਵੱਲੋਂ ਜਾਰੀ ਕੀਤੀ ਗਈ ਰਿਲੀਜ਼ ਵਿੱਚ ਦਾਅਵਾ ਕੀਤਾ ਗਿਆ ਕਿ ਮੋਸ਼ਨ ਪਾਸ ਹੋ ਗਿਆ ਹੈ।NDP ਮੈਂਬਰ ਰਾਖੀ ਪੰਚੋਲੀ ਨੇ ਇਸ ਮਾਮਲੇ ’ਤੇ ਸਵਾਲ ਚੁੱਕਦੇ ਹੋਏ ਕਿਹਾ ਕਿ ਜਦੋਂ ਕਮੇਟੀ ਅਜੇ ਵੀ ਚਰਚਾ ਕਰ ਰਹੀ ਸੀ ਤਾਂ ਨਤੀਜੇ ਪਹਿਲਾਂ ਹੀ ਕਿਵੇਂ ਜਾਰੀ ਕਰ ਦਿੱਤੇ ਗਏ।

ਇਸ ਤੋਂ ਬਾਅਦ UCP ਕਾਕਸ ਨੇ ਸਪਸ਼ਟੀਕਰਨ ਜਾਰੀ ਕਰਦਿਆਂ ਕਿਹਾ ਕਿ ਰਿਲੀਜ਼ “ਗਲਤੀ ਨਾਲ” ਭੇਜੀ ਗਈ ਸੀ। NDP ਮੈਂਬਰਾਂ ਨੇ ਇਸਨੂੰ ਲੋਕਤੰਤਰ ਦੀ ਬੇਇਜ਼ਤੀ ਕਰਾਰ ਦਿੱਤਾ।ਹੰਗਾਮੇ ਕਾਰਨ ਮੀਟਿੰਗ ਬਿਨਾਂ ਕਿਸੇ ਅੰਤਿਮ ਵੋਟ ਦੇ ਖਤਮ ਹੋ ਗਈ। ਹੁਣ ਕਮੇਟੀ ਦੀ ਅਗਲੀ ਮੀਟਿੰਗ ਵੀਰਵਾਰ ਨੂੰ ਹੋਵੇਗੀ, ਜਿੱਥੇ ਇਸ ਮਾਮਲੇ ’ਤੇ ਫਿਰ ਵਿਚਾਰ ਕੀਤਾ ਜਾਵੇਗਾ।ਥਾਮਸ ਲੂਕਾਸਜ਼ੁਕ ਦੀ ਪਟੀਸ਼ਨ ਨੂੰ 4 ਲੱਖ ਤੋਂ ਵੱਧ ਪ੍ਰਮਾਣਿਤ ਦਸਤਖ਼ਤ ਮਿਲੇ ਹਨ। ਦੂਜੇ ਪਾਸੇ, “Stay Free Alberta” ਦੀ ਵੱਖਵਾਦੀ ਪਟੀਸ਼ਨ ਨੂੰ ਅਦਾਲਤ ਵੱਲੋਂ ਪਿਛਲੇ ਹਫ਼ਤੇ ਰੱਦ ਕਰ ਦਿੱਤਾ ਗਿਆ ਸੀ।