ਮਹਿੰਗਾਈ ਦੀ ਮਾਰ ਹੇਠ ਕੈਨੇਡੀਅਨ, ਬੁਨਿਆਦੀ ਲੋੜਾਂ ਲਈ ਆਨਲਾਈਨ ਫੰਡਰੇਜ਼ਿੰਗ ਦਾ ਵਧਿਆ ਸਹਾਰਾ
ਓਟਵਾ-ਕੈਨੇਡਾ ਵਿੱਚ ਲਗਾਤਾਰ ਵਧ ਰਹੀ ਮਹਿੰਗਾਈ, ਰਿਹਾਇਸ਼ ਦੀਆਂ ਉੱਚੀਆਂ ਕੀਮਤਾਂ ਅਤੇ ਜੀਵਨ-ਨਿਰਵਾਹ ਦੀਆਂ ਵਧਦੀਆਂ ਲਾਗਤਾਂ ਕਾਰਨ ਹਜ਼ਾਰਾਂ ਲੋਕ ਆਪਣੀਆਂ ਬੁਨਿਆਦੀ ਲੋੜਾਂ ਪੂਰੀਆਂ ਕਰਨ ਲਈ ਆਨਲਾਈਨ ਕ੍ਰਾਊਡਫੰਡਿੰਗ ਪਲੇਟਫਾਰਮਾਂ ਦਾ ਸਹਾਰਾ ਲੈਣ ਲਈ ਮਜਬੂਰ ਹੋ ਰਹੇ ਹਨ। ਪ੍ਰਸਿੱਧ ਫੰਡਰੇਜ਼ਿੰਗ ਪਲੇਟਫਾਰਮ GoFundMe ਦੇ ਅੰਕੜਿਆਂ ਅਨੁਸਾਰ ਜਨਵਰੀ ਤੋਂ ਮਈ 2026 ਦਰਮਿਆਨ ਕੈਨੇਡਾ ਵਿੱਚ 15,000 ਤੋਂ ਵੱਧ ਅਜਿਹੀਆਂ ਮੁਹਿੰਮਾਂ ਸ਼ੁਰੂ ਕੀਤੀਆਂ ਗਈਆਂ, ਜਿਨ੍ਹਾਂ ਦਾ ਮਕਸਦ ਭੋਜਨ, ਕਿਰਾਇਆ, ਬਿੱਲਾਂ ਅਤੇ ਹੋਰ ਬੁਨਿਆਦੀ ਲੋੜਾਂ ਲਈ ਵਿੱਤੀ ਸਹਾਇਤਾ ਪ੍ਰਾਪਤ ਕਰਨਾ ਸੀ। ਇਹ ਗਿਣਤੀ ਪਿਛਲੇ ਸਾਲ ਦੇ ਮੁਕਾਬਲੇ ਅੱਠ ਫੀਸਦੀ ਵੱਧ ਹੈ।ਓਂਟਾਰੀਓ ਦੇ ਸਡਬਰੀ ਨਾਲ ਸਬੰਧਤ ਲਿਊਕ ਅਲਬਰਟਨ ਦੀ ਕਹਾਣੀ ਇਸ ਵਧ ਰਹੇ ਆਰਥਿਕ ਦਬਾਅ ਦੀ ਸਪੱਸ਼ਟ ਤਸਵੀਰ ਪੇਸ਼ ਕਰਦੀ ਹੈ। ਟੋਰਾਂਟੋ ਵਿੱਚ ਰਹਿਣ ਵਾਲੇ ਅਲਬਰਟਨ ਨੇ ਦੱਸਿਆ ਕਿ ਅਗਸਤ 2024 ਵਿੱਚ ਨੌਕਰੀ ਗੁਆਉਣ ਤੋਂ ਬਾਅਦ ਉਨ੍ਹਾਂ ਨੂੰ ਰੋਜ਼ਗਾਰ ਬੀਮਾ (ਈਆਈ) ਦਾ ਸਹਾਰਾ ਲੈਣਾ ਪਿਆ।
ਨਵੀਂ ਨੌਕਰੀ ਲੱਭਣ ਵਿੱਚ ਸੱਤ ਮਹੀਨੇ ਲੱਗ ਗਏ, ਜਿਸ ਦੌਰਾਨ ਉਨ੍ਹਾਂ ਦੀ ਬਚਤ ਅਤੇ ਕਰਜ਼ੇ ਦੀ ਸੀਮਾ ਲਗਭਗ ਖਤਮ ਹੋ ਗਈ।ਹਾਲਾਤ ਉਸ ਵੇਲੇ ਹੋਰ ਗੰਭੀਰ ਹੋ ਗਏ ਜਦੋਂ ਨਵੀਂ ਨੌਕਰੀ ਦੇ ਪਹਿਲੇ ਹੀ ਦਿਨ ਉਹ ਇੱਕ ਗੰਭੀਰ ਇਨਫੈਕਸ਼ਨ ਕਾਰਨ ਮੈਡੀਕਲ ਐਮਰਜੈਂਸੀ ਦਾ ਸ਼ਿਕਾਰ ਹੋ ਗਏ। ਆਮਦਨ ਦੇ ਸਾਰੇ ਸਰੋਤ ਬੰਦ ਹੋਣ ਅਤੇ ਖਰਚੇ ਵਧਣ ਕਾਰਨ ਉਨ੍ਹਾਂ ਨੇ GoFundMe 'ਤੇ 9,000 ਡਾਲਰ ਇਕੱਠੇ ਕਰਨ ਲਈ ਮੁਹਿੰਮ ਸ਼ੁਰੂ ਕੀਤੀ, ਜਿਸ ਰਾਹੀਂ ਹੁਣ ਤੱਕ ਕਰੀਬ 4,950 ਡਾਲਰ ਇਕੱਠੇ ਹੋ ਚੁੱਕੇ ਹਨ।GoFundMe ਮੁਤਾਬਕ 2020 ਤੋਂ ਬਾਅਦ ਕੈਨੇਡਾ ਵਿੱਚ ਉਨ੍ਹਾਂ ਫੰਡਰੇਜ਼ਿੰਗ ਮੁਹਿੰਮਾਂ ਦੀ ਗਿਣਤੀ 274 ਫੀਸਦੀ ਵਧੀ ਹੈ, ਜਿਨ੍ਹਾਂ ਵਿੱਚ ਜੀਵਨ-ਨਿਰਵਾਹ ਦੀ ਵਧਦੀ ਲਾਗਤ ਦਾ ਜ਼ਿਕਰ ਕੀਤਾ ਗਿਆ ਹੈ। ਕੰਪਨੀ ਦਾ ਕਹਿਣਾ ਹੈ ਕਿ ਰਿਕਾਰਡ ਪੱਧਰ ਦੀ ਮਹਿੰਗਾਈ ਅਤੇ ਕਿਫਾਇਤੀ ਰਿਹਾਇਸ਼ ਦੀ ਘਾਟ ਨੇ ਲੋਕਾਂ ਨੂੰ ਆਪਣੀਆਂ ਕਮਿਊਨਿਟੀਆਂ ਤੋਂ ਮਦਦ ਮੰਗਣ ਲਈ ਮਜਬੂਰ ਕਰ ਦਿੱਤਾ ਹੈ।
ਮੈਕਮਾਸਟਰ ਯੂਨੀਵਰਸਿਟੀ ਦੇ ਸਹਾਇਕ ਪ੍ਰੋਫੈਸਰ ਵਿਲੀਅਮ ਹਗਿਨਜ਼ ਦਾ ਮੰਨਣਾ ਹੈ ਕਿ ਬੁਨਿਆਦੀ ਲੋੜਾਂ ਲਈ GoFundMe ਵਰਗੇ ਪਲੇਟਫਾਰਮਾਂ ਦਾ ਸਹਾਰਾ ਲੈਣਾ ਇੱਕ ਡੂੰਘੀ ਸਮਾਜਿਕ ਅਤੇ ਆਰਥਿਕ ਸਮੱਸਿਆ ਵੱਲ ਇਸ਼ਾਰਾ ਕਰਦਾ ਹੈ।ਉਨ੍ਹਾਂ ਕਿਹਾ ਕਿ ਜਦੋਂ ਲੋਕਾਂ ਨੂੰ ਆਪਣੀਆਂ ਰੋਜ਼ਾਨਾ ਲੋੜਾਂ ਪੂਰੀਆਂ ਕਰਨ ਲਈ ਇੰਟਰਨੈੱਟ 'ਤੇ ਮਦਦ ਮੰਗਣੀ ਪੈਂਦੀ ਹੈ ਤਾਂ ਇਹ ਦਰਸਾਉਂਦਾ ਹੈ ਕਿ ਮੌਜੂਦਾ ਸਮਾਜਿਕ ਸੁਰੱਖਿਆ ਪ੍ਰਣਾਲੀ ਹਰ ਵਿਅਕਤੀ ਦੀਆਂ ਲੋੜਾਂ ਪੂਰੀਆਂ ਕਰਨ ਵਿੱਚ ਕਾਮਯਾਬ ਨਹੀਂ ਹੋ ਰਹੀ।ਉਨ੍ਹਾਂ ਮੁਤਾਬਕ ਸਰਕਾਰੀ ਸਹਾਇਤਾ, ਕਮਿਊਨਿਟੀ ਸੰਗਠਨ ਅਤੇ ਪਰਿਵਾਰਕ ਸਹਾਰਾ ਸਮਾਜਿਕ ਸੁਰੱਖਿਆ ਦੇ ਤਿੰਨ ਮੁੱਖ ਥੰਮ੍ਹ ਹਨ, ਪਰ ਕਮਿਊਨਿਟੀ ਆਧਾਰਿਤ ਸਹਾਇਤਾ ਪ੍ਰਣਾਲੀਆਂ ਪਿਛਲੇ ਕਈ ਸਾਲਾਂ ਤੋਂ ਕਮਜ਼ੋਰ ਹੋ ਰਹੀਆਂ ਹਨ।ਫੂਡ ਬੈਂਕਸ ਕੈਨੇਡਾ ਦੇ ਖੋਜ ਨਿਰਦੇਸ਼ਕ ਰਿਚਰਡ ਮੈਟਰਨ ਨੇ ਦੱਸਿਆ ਕਿ 2019 ਤੋਂ ਬਾਅਦ ਫੂਡ ਬੈਂਕਾਂ ਦੀ ਵਰਤੋਂ ਲਗਭਗ ਦੁੱਗਣੀ ਹੋ ਚੁੱਕੀ ਹੈ। ਇਸ ਵੇਲੇ ਦੇਸ਼ ਭਰ ਵਿੱਚ ਹਰ ਮਹੀਨੇ ਕਰੀਬ 22 ਲੱਖ ਫੂਡ ਬੈਂਕ ਦੌਰੇ ਦਰਜ ਕੀਤੇ ਜਾ ਰਹੇ ਹਨ।
ਉਨ੍ਹਾਂ ਕਿਹਾ ਕਿ ਸਭ ਤੋਂ ਚਿੰਤਾਜਨਕ ਗੱਲ ਇਹ ਹੈ ਕਿ ਹੁਣ ਪੂਰਾ ਸਮਾਂ ਕੰਮ ਕਰਨ ਵਾਲੇ ਲੋਕ ਵੀ ਖੁਰਾਕ ਦੀ ਅਸੁਰੱਖਿਆ ਦਾ ਸਾਹਮਣਾ ਕਰ ਰਹੇ ਹਨ, ਜੋ ਵਧਦੇ ਆਰਥਿਕ ਦਬਾਅ ਦਾ ਸਪੱਸ਼ਟ ਸੰਕੇਤ ਹੈ।ਯੂਨੀਵਰਸਿਟੀ ਆਫ ਟੋਰਾਂਟੋ ਦੇ ਖੋਜਕਾਰ ਮਾਰਟਿਨ ਲੱਕ ਦਾ ਮੰਨਣਾ ਹੈ ਕਿ ਕ੍ਰਾਊਡਫੰਡਿੰਗ ਤੁਰੰਤ ਰਾਹਤ ਤਾਂ ਦੇ ਸਕਦੀ ਹੈ, ਪਰ ਇਹ ਲੰਬੇ ਸਮੇਂ ਦਾ ਹੱਲ ਨਹੀਂ ਹੈ।ਉਨ੍ਹਾਂ ਦੀ ਖੋਜ ਅਨੁਸਾਰ ਮੈਡੀਕਲ ਅਤੇ ਐਮਰਜੈਂਸੀ ਸਹਾਇਤਾ ਲਈ ਸ਼ੁਰੂ ਕੀਤੀਆਂ ਗਈਆਂ ਫੰਡਰੇਜ਼ਿੰਗ ਮੁਹਿੰਮਾਂ ਵਿੱਚੋਂ ਸਿਰਫ਼ 17 ਫੀਸਦੀ ਹੀ ਆਪਣੇ ਟੀਚੇ ਤੱਕ ਪਹੁੰਚਦੀਆਂ ਹਨ। ਉਨ੍ਹਾਂ ਮੁਤਾਬਕ ਸਫਲਤਾ ਲਈ ਪ੍ਰਭਾਵਸ਼ਾਲੀ ਕਹਾਣੀ, ਮਜ਼ਬੂਤ ਸਮਾਜਿਕ ਨੈੱਟਵਰਕ ਅਤੇ ਡਿਜ਼ੀਟਲ ਹੁਨਰਾਂ ਦੀ ਲੋੜ ਹੁੰਦੀ ਹੈ।ਭਾਵੇਂ ਕ੍ਰਾਊਡਫੰਡਿੰਗ ਹਰ ਕਿਸੇ ਲਈ ਸਫਲ ਨਹੀਂ ਹੁੰਦੀ, ਪਰ ਕਈ ਲੋਕਾਂ ਲਈ ਇਹ ਮੁਸ਼ਕਲ ਸਮੇਂ ਵਿੱਚ ਆਸ ਦੀ ਕਿਰਨ ਸਾਬਤ ਹੋ ਰਹੀ ਹੈ। ਲਿਊਕ ਅਲਬਰਟਨ ਲਈ ਵੀ ਇਹ ਮੁਹਿੰਮ ਵਿੱਤੀ ਸਹਾਇਤਾ ਦਾ ਮਹੱਤਵਪੂਰਨ ਸਰੋਤ ਬਣੀ। ਇਲਾਜ ਅਤੇ ਨੌਕਰੀ ਗੁਆਉਣ ਦੀਆਂ ਚੁਣੌਤੀਆਂ ਦੇ ਬਾਵਜੂਦ ਉਹ ਆਪਣੇ ਮਾਪਿਆਂ ਦੇ ਘਰ ਰਹਿ ਕੇ ਸਿਹਤਯਾਬ ਹੋਣ ਅਤੇ ਆਪਣੀ ਜ਼ਿੰਦਗੀ ਨੂੰ ਮੁੜ ਪਟੜੀ 'ਤੇ ਲਿਆਉਣ ਦੀ ਕੋਸ਼ਿਸ਼ ਕਰ ਰਹੇ ਹਨ।
ਮਾਹਿਰਾਂ ਦਾ ਮੰਨਣਾ ਹੈ ਕਿ ਜਦੋਂ ਤੱਕ ਮਹਿੰਗਾਈ, ਰਿਹਾਇਸ਼ ਸੰਕਟ ਅਤੇ ਆਮਦਨ ਨਾਲ ਜੁੜੀਆਂ ਸਮੱਸਿਆਵਾਂ ਦਾ ਟਿਕਾਊ ਹੱਲ ਨਹੀਂ ਲੱਭਿਆ ਜਾਂਦਾ, ਉਦੋਂ ਤੱਕ ਕੈਨੇਡੀਅਨਾਂ ਵੱਲੋਂ ਆਨਲਾਈਨ ਫੰਡਰੇਜ਼ਿੰਗ ਪਲੇਟਫਾਰਮਾਂ ਦਾ ਸਹਾਰਾ ਲੈਣ ਦਾ ਰੁਝਾਨ ਜਾਰੀ ਰਹਿ ਸਕਦਾ ਹੈ।
