ਕੈਨੇਡਾ ਦੀ ਪ੍ਰਸਿੱਧ ਫੈਸ਼ਨ ਡਿਜ਼ਾਈਨਰ ਮੈਰਿਲਿਨ ਬਰੂਕਸ ਦਾ 93 ਸਾਲ ਦੀ ਉਮਰ ਵਿੱਚ ਦੇਹਾਂਤ

ਟੋਰਾਂਟੋ-ਕੈਨੇਡਾ ਦੀ ਉੱਘੀ ਫੈਸ਼ਨ ਡਿਜ਼ਾਈਨਰ ਮੈਰਿਲਿਨ ਬਰੂਕਸ ਦਾ 93 ਸਾਲ ਦੀ ਉਮਰ ਵਿੱਚ ਕੁਦਰਤੀ ਕਾਰਨਾਂ ਕਰਕੇ ਦੇਹਾਂਤ ਹੋ ਗਿਆ। ਉਨ੍ਹਾਂ ਦੇ ਦਿਹਾਂਤ ਦੀ ਪੁਸ਼ਟੀ ਪਰਿਵਾਰ ਦੀ ਤਰਜਮਾਨ ਨੌਰਮਾ ਮੇਨੇਗੁਜ਼ੀ ਸਪਾਲ ਨੇ ਕੀਤੀ।

ਮੈਰਿਲਿਨ ਬਰੂਕਸ ਨੇ 1960 ਦੇ ਦਹਾਕੇ ਵਿੱਚ ਟੋਰਾਂਟੋ ਸਥਿਤ ਆਪਣੇ 'ਦ ਯੂਨੀਕੌਰਨ' ਬੁਟੀਕ ਰਾਹੀਂ ਬ੍ਰਿਟੇਨ ਦੀ ਪ੍ਰਸਿੱਧ ਮੌਡ ਫੈਸ਼ਨ ਨੂੰ ਕੈਨੇਡਾ ਵਿੱਚ ਨਵੀਂ ਪਛਾਣ ਦਿਵਾਈ। ਉਨ੍ਹਾਂ ਦੀ ਵਿਲੱਖਣ ਡਿਜ਼ਾਈਨ ਸ਼ੈਲੀ ਨੇ ਕੈਨੇਡੀਅਨ ਫੈਸ਼ਨ ਉਦਯੋਗ ਵਿੱਚ ਨਵਾਂ ਰੁਝਾਨ ਪੈਦਾ ਕੀਤਾ।ਬਾਅਦ ਵਿੱਚ ਉਨ੍ਹਾਂ ਨੇ 'ਮੈਰਿਲਿਨ ਬਰੂਕਸ ਬੁਟੀਕਸ' ਦੇ ਨਾਮ ਹੇਠ ਕੈਨੇਡਾ ਅਤੇ ਅਮਰੀਕਾ ਵਿੱਚ ਕਈ ਸਟੋਰ ਸਥਾਪਤ ਕੀਤੇ ਅਤੇ ਫੈਸ਼ਨ ਖੇਤਰ ਵਿੱਚ ਆਪਣੀ ਵੱਖਰੀ ਪਛਾਣ ਬਣਾਈ।

ਫੈਸ਼ਨ ਜਗਤ ਵਿੱਚ ਉਨ੍ਹਾਂ ਦੇ ਸ਼ਾਨਦਾਰ ਯੋਗਦਾਨ ਨੂੰ ਦੇਖਦਿਆਂ ਉਨ੍ਹਾਂ ਨੂੰ 2022 ਵਿੱਚ ਕੈਨੇਡਾ ਦੇ ਸਰਵੋਚ ਨਾਗਰਿਕ ਸਨਮਾਨਾਂ ਵਿੱਚੋਂ ਇੱਕ 'ਆਰਡਰ ਆਫ਼ ਕੈਨੇਡਾ' ਨਾਲ ਨਿਵਾਜਿਆ ਗਿਆ ਸੀ। ਇਸ ਤੋਂ ਪਹਿਲਾਂ 1988 ਵਿੱਚ ਟੋਰਾਂਟੋ ਸ਼ਹਿਰ ਨੇ 4 ਫ਼ਰਵਰੀ ਨੂੰ 'ਮੈਰਿਲਿਨ ਬਰੂਕਸ ਡੇ' ਵਜੋਂ ਐਲਾਨ ਕਰਕੇ ਉਨ੍ਹਾਂ ਦੇ ਯੋਗਦਾਨ ਨੂੰ ਸਨਮਾਨਿਤ ਕੀਤਾ ਸੀ।ਮੈਰਿਲਿਨ ਬਰੂਕਸ ਦੇ ਦੇਹਾਂਤ ਨਾਲ ਕੈਨੇਡਾ ਦੇ ਫੈਸ਼ਨ ਜਗਤ ਨੇ ਇੱਕ ਦੂਰਅੰਦੇਸ਼ ਡਿਜ਼ਾਈਨਰ ਅਤੇ ਪ੍ਰੇਰਣਾਦਾਇਕ ਸ਼ਖ਼ਸੀਅਤ ਨੂੰ ਗੁਆ ਦਿੱਤਾ ਹੈ। ਉਨ੍ਹਾਂ ਦਾ ਯੋਗਦਾਨ ਆਉਣ ਵਾਲੀਆਂ ਪੀੜ੍ਹੀਆਂ ਲਈ ਹਮੇਸ਼ਾ ਪ੍ਰੇਰਣਾ ਦਾ ਸਰੋਤ ਬਣਿਆ ਰਹੇਗਾ।