ਤਾਲਿਬਾਨ ਨੇ ਸ਼ਤਰੰਜ ਖੇਡਣ ’ਤੇ ਲਗਾਈ ਪਾਬੰਦੀ
ਅਫਗਾਨਿਸਤਾਨ-ਸ਼ਤਰੰਜ ਜੋ ਇੱਕ ਖੇਡ ਹੈ ’ਤੇ ਧਾਰਮਿਕ ਇਤਰਾਜ਼ ਹੋਣ ਕਾਰਨ ਤਾਲਿਬਾਨ ਪ੍ਰਸ਼ਾਸਨ ਨੇ ਅਫ਼ਗਾਨਿਸਤਾਨ ਵਿੱਚ ਸ਼ਤਰੰਜ ਖੇਡਣ ਅਤੇ ਇਸ ਨਾਲ ਸਬੰਧਤ ਸਾਰੀਆਂ ਗਤੀਵਿਧੀਆਂ ’ਤੇ ਅਣਮਿੱਥੇ ਸਮੇਂ ਲਈ ਪਾਬੰਦੀ ਲਗਾ ਦਿੱਤੀ ਹੈ। ਜਾਣਕਾਰੀ ਮੁਤਾਬਕ ਇਸ ਸਬੰਧੀ ਸਪੋਰਟਸ ਡਾਇਰੈਕਟੋਰੇਟ ਦੇ ਬੁਲਾਰੇ ਅਟਲ ਮਸ਼ਵਾਨੀ ਨੇ ਐਤਵਾਰ ਨੂੰ ਕਿਹਾ ਕਿ ਇਸਲਾਮੀ ਸ਼ਰੀਆ ਦੇ ਤਹਿਤ ਸ਼ਤਰੰਜ ਨੂੰ ਜੂਏ ਦਾ ਇੱਕ ਮਾਧਿਅਮ ਮੰਨਿਆ ਜਾਂਦਾ ਹੈ, ਜੋ ਕਿ ਦੇਸ਼ ਦੇ “ਚੰਗਾਈ ਨੂੰ ਉਤਸ਼ਾਹਿਤ ਕਰਨ ਅਤੇ ਬੁਰਾਈ ਨੂੰ ਰੋਕਣ ਦੇ ਕਾਨੂੰਨ” ਦੇ ਅਨੁਸਾਰ ਵਰਜਿਤ ਹੈ। ਉਹਨਾਂ ਕਿਹਾ ਕਿ ਸ਼ਤਰੰਜ ਉੱਤੇ ਧਾਰਮਿਕ ਇਤਰਾਜ਼ ਹਨ ਅਤੇ ਜਦੋਂ ਤੱਕ ਇਨ੍ਹਾਂ ਇਤਰਾਜ਼ਾਂ ਦਾ ਹੱਲ ਨਹੀਂ ਹੋ ਜਾਂਦਾ, ਇਹ ਖੇਡ ਅਫ਼ਗਾਨਿਸਤਾਨ ਵਿੱਚ ਮੁਅੱਤਲ ਰਹੇਗੀ। ਉਨ੍ਹਾਂ ਇਹ ਵੀ ਦੱਸਿਆ ਕਿ ਪਿਛਲੇ ਦੋ ਸਾਲਾਂ ਤੋਂ, ਰਾਸ਼ਟਰੀ ਸ਼ਤਰੰਜ ਫ਼ੈਡਰੇਸ਼ਨ ਦੁਆਰਾ ਕੋਈ ਅਧਿਕਾਰਤ ਟੂਰਨਾਮੈਂਟ ਆਯੋਜਿਤ ਨਹੀਂ ਕੀਤਾ ਗਿਆ ਹੈ ਅਤੇ ਲੀਡਰਸ਼ਿਪ ਪੱਧਰ ’ਤੇ ਵੀ ਕੁਝ ਸਮੱਸਿਆਵਾਂ ਚੱਲ ਰਹੀਆਂ ਹਨ।
