ਬਜਟ 2026 : ਅਲਬਰਟਾ ਸਰਕਾਰ ਵੱਲੋਂ ਹੁਨਰਮੰਦ ਕਾਮਿਆਂ ਦੀ ਤਿਆਰੀ ਲਈ 384 ਮਿਲੀਅਨ ਡਾਲਰ ਦਾ ਵੱਡਾ ਨਿਵੇਸ਼

ਐਡਮੰਟਨ-ਕੈਨੇਡਾ ਦੇ ਅਲਬਰਟਾ ਸੂਬੇ ਦੀ ਸਰਕਾਰ ਨੇ ਬਜਟ 2026 ਤਹਿਤ ਹੁਨਰਮੰਦ ਕਾਮਿਆਂ ਦੀ ਤਿਆਰੀ ਲਈ 384 ਮਿਲੀਅਨ ਡਾਲਰ ਦੇ ਵੱਡੇ ਨਿਵੇਸ਼ ਦਾ ਐਲਾਨ ਕੀਤਾ ਹੈ। ਇਸ ਰਕਮ ਨਾਲ ਨਾਰਦਰਨ ਅਲਬਰਟਾ ਇੰਸਟੀਚਿਊਟ ਆਫ ਟੈਕਨੋਲੋਜੀ (NAIT) ਦੇ ਮੁੱਖ ਕੈਂਪਸ ਵਿੱਚ ਅਡਵਾਂਸਡ ਸਕਿਲਜ਼ ਸੈਂਟਰ ਦੀ ਸਥਾਪਨਾ ਕੀਤੀ ਜਾਵੇਗੀ, ਜਿਸ ਨਾਲ ਹਰ ਸਾਲ 5,500 ਵਾਧੂ ਅਪ੍ਰੈਂਟਿਸਾਂ ਨੂੰ ਤਾਲੀਮ ਦਿੱਤੀ ਜਾ ਸਕੇਗੀ।

ਇਹ ਕੇਂਦਰ ਕਰੀਬ 6.25 ਲੱਖ ਵਰਗ ਫੁੱਟ ਖੇਤਰ ਵਿੱਚ ਬਣਾਇਆ ਜਾਵੇਗਾ ਅਤੇ ਇਸ ਦੇ 2030 ਦੇ ਪਤਝੜ ਮੌਸਮ ਵਿੱਚ ਸ਼ੁਰੂ ਹੋਣ ਦੀ ਉਮੀਦ ਹੈ। ਇਸ ਸੈਂਟਰ ਵਿੱਚ ਨਿਰਮਾਣ, ਆਵਾਜਾਈ, ਮੈਨੂਫੈਕਚਰਿੰਗ ਅਤੇ ਊਰਜਾ ਵਰਗੇ ਉੱਚ ਮੰਗ ਵਾਲੇ ਖੇਤਰਾਂ ਨਾਲ ਸੰਬੰਧਿਤ 29 ਪ੍ਰੋਗਰਾਮ ਇਕੱਠੇ ਚਲਾਏ ਜਾਣਗੇ।

ਅਲਬਰਟਾ ਦੀ ਪ੍ਰੀਮੀਅਰ Danielle Smith ਨੇ ਕਿਹਾ ਕਿ ਹੁਨਰਮੰਦ ਟਰੇਡਜ਼ ਅਲਬਰਟਾ ਦੇ ਭਵਿੱਖ ਦੀ ਨਿਰਮਾਣ ਸ਼ਕਤੀ ਹਨ। ਉਨ੍ਹਾਂ ਕਿਹਾ ਕਿ ਸੂਬੇ ਦੀ ਵਧਦੀ ਆਬਾਦੀ ਅਤੇ ਵਿਕਾਸ ਨਾਲ ਹੁਨਰਮੰਦ ਕਾਮਿਆਂ ਦੀ ਮੰਗ ਵੀ ਵਧ ਰਹੀ ਹੈ ਅਤੇ ਇਹ ਨਿਵੇਸ਼ ਨਵੀਂ ਪੀੜ੍ਹੀ ਨੂੰ ਮਜ਼ਬੂਤ ਰੋਜ਼ਗਾਰ ਦੇ ਮੌਕੇ ਪ੍ਰਦਾਨ ਕਰੇਗਾ।

ਉੱਧਰ ਉੱਚ ਸਿੱਖਿਆ ਮੰਤਰੀ Myles McDougall ਨੇ ਕਿਹਾ ਕਿ ਇਹ ਅਲਬਰਟਾ ਦੇ ਇਤਿਹਾਸ ਵਿੱਚ ਟਰੇਡਜ਼ ਟ੍ਰੇਨਿੰਗ ਢਾਂਚੇ ਲਈ ਸਭ ਤੋਂ ਵੱਡੇ ਨਿਵੇਸ਼ਾਂ ਵਿੱਚੋਂ ਇੱਕ ਹੈ। ਉਨ੍ਹਾਂ ਕਿਹਾ ਕਿ ਸਰਕਾਰ ਦਾ ਉਦੇਸ਼ ਵੱਧ ਤੋਂ ਵੱਧ ਨੌਜਵਾਨਾਂ ਨੂੰ ਹੁਨਰਮੰਦ ਕੈਰੀਅਰਾਂ ਵੱਲ ਪ੍ਰੇਰਿਤ ਕਰਨਾ ਹੈ।NAIT ਦੀ ਪ੍ਰਧਾਨ ਅਤੇ ਸੀਈਓ Laura Jo Gunter ਨੇ ਇਸ ਨਿਵੇਸ਼ ਦਾ ਸਵਾਗਤ ਕਰਦਿਆਂ ਕਿਹਾ ਕਿ ਅਡਵਾਂਸਡ ਸਕਿਲਜ਼ ਸੈਂਟਰ ਨਾਲ ਹਜ਼ਾਰਾਂ ਵਿਦਿਆਰਥੀਆਂ ਨੂੰ ਉਦਯੋਗਿਕ ਮਿਆਰਾਂ ਅਨੁਸਾਰ ਤਾਲੀਮ ਮਿਲੇਗੀ ਅਤੇ ਉਹ ਰੋਜ਼ਗਾਰ ਲਈ ਪੂਰੀ ਤਰ੍ਹਾਂ ਤਿਆਰ ਹੋਣਗੇ।ਜਾਣਕਾਰੀ ਅਨੁਸਾਰ ਪ੍ਰੋਜੈਕਟ ਲਈ ਸ਼ੁਰੂਆਤੀ ਸਾਈਟ ਕੰਮ 2026 ਦੀ ਬਸੰਤ ਰੁੱਤ ਵਿੱਚ ਸ਼ੁਰੂ ਹੋਵੇਗਾ, ਜਦਕਿ ਮੁੱਖ ਨਿਰਮਾਣ ਕਾਰਜ 2027 ਵਿੱਚ ਸ਼ੁਰੂ ਕੀਤਾ ਜਾਵੇਗਾ।