ਬੈਂਕ ਆਫ ਕੈਨੇਡਾ ਨੇ ਵਿਆਜ਼ ਦਰਾਂ ਨੂੰ 2.75% ’ਤੇ ਰੱਖਿਆ ਸਥਿਰ

ਓਟਾਵਾ-ਬੈਂਕ ਆਫ਼ ਕੈਨੇਡਾ ਨੇ ਆਪਣੀ ਨੀਤੀਕਤ ਮੁੱਖ ਵਿਆਜ ਦਰ ਨੂੰ 2.75% ‘ਤੇ ਸਥਿਰ ਰੱਖਣ ਦਾ ਐਲਾਨ ਕੀਤਾ ਹੈ। ਇਸ ਫੈਸਲੇ ਨੇ ਜਿੱਥੇ ਕੁਝ ਖੇਤਰਾਂ ਵਿਚ ਆਰਥਿਕ ਸਥਿਰਤਾ ਦੀ ਉਮੀਦ ਜਗਾਈ ਹੈ, ਉਥੇ ਹੀ ਘਰਾਂ ਦੀ ਮਾਰਕੀਟ ’ਚ ਨਵੀਂ ਚਿੰਤਾ ਪੈਦਾ ਕਰ ਦਿੱਤੀ ਹੈ। ਵਿਸ਼ੇਸ਼ਕਰ, ਮੌਜੂਦਾ ਅਮਰੀਕੀ ਟੈਰਿਫ ਧਮਕੀਆਂ ਅਤੇ ਘਟ ਰਹੀ ਮਕਾਨ ਵਿਕਰੀ ਦੇ ਚਲਦੇ ਕੈਨੇਡਾ ਦੀ ਰੀਅਲ ਅਸਟੇਟ ਮਾਰਕੀਟ ਉਤੇ ਅਣਮਿੱਥੇ ਖਤਰੇ ਮੰਡਰਾ ਰਹੇ ਹਨ। ਜਾਣਕਾਰੀ ਮੁਤਾਬਕ ਬੈਂਕ ਆਫ ਕੈਨੇਡਾ ਵੱਲੋਂ ਮਈ 2025 ਵਿੱਚ ਜਾਰੀ ਕੀਤੀ ਗਈ ਫਾਈਨੈਂਸ਼ੀਅਲ ਸਟੈਬਿਲਟੀ ਰਿਪੋਰਟ ਵਿੱਚ ਚਿਤਾਵਨੀ ਦਿੱਤੀ ਗਈ ਹੈ ਕਿ 2025 ਅਤੇ 2026 ਦੌਰਾਨ 60% ਤੋਂ ਵੱਧ ਮੌਰਗੇਜਾਂ ਦੀ ਮੁੜ ਤਸਦੀਕ ਹੋਣੀ ਹੈ। ਇਹਨਾਂ ਵਿੱਚੋਂ ਬਹੁਤ ਸਾਰੇ ਮਾਲਕ ਉੱਚ ਦਰਾਂ ਦੀਆਂ ਵਿਆਜਾਂ ਦਾ ਸਾਹਮਣਾ ਕਰਨਗੇ। ਰਿਪੋਰਟ ਮੁਤਾਬਕ ਜੇ ਮੌਜੂਦਾ ਆਰਥਿਕ ਦਬਾਅ ਜਾਰੀ ਰਹੇ ਤਾਂ ਅਗਲੇ 12-18 ਮਹੀਨਿਆਂ ਵਿੱਚ ਘਰਾਂ ਦੀਆਂ ਕੀਮਤਾਂ ‘ਚ 26% ਤੱਕ ਦੀ ਕਮੀ ਆ ਸਕਦੀ ਹੈ। ਇਹ ਗਿਰਾਵਟ ਸਿਰਫ ਨਵੇਂ ਖਰੀਦਦਾਰਾਂ ਲਈ ਹੀ ਨਹੀਂ, ਬਲਕਿ ਮੌਜੂਦਾ ਮਾਲਕਾਂ ਲਈ ਵੀ ਵੱਡੀ ਚੁਣੌਤੀ ਬਣੇਗੀ, ਖਾਸ ਕਰਕੇ ਉਹਨਾਂ ਲਈ ਜਿਨ੍ਹਾਂ ਨੇ ਹਾਲ ਹੀ ਵਿੱਚ ਉੱਚ ਕੀਮਤਾਂ ‘ਤੇ ਮਕਾਨ ਖਰੀਦੇ ਹਨ। ਦੱਸਣਯੋਗ ਹੈ ਅਪ੍ਰੈਲ 2025 ਵਿੱਚ ਘਰਾਂ ਦੀਆਂ ਕੀਮਤਾਂ ‘ਚ ਸਿਰਫ 0.2% ਵਾਧਾ ਹੋਇਆ, ਜਦਕਿ ਘਰਾਂ ਦੀ ਵਿਕਰੀ ਵਿੱਚ 7.5% ਦੀ ਘਾਟ ਆਈ।  
ਮਾਹਿਰ ਮੰਨਦੇ ਹਨ ਕਿ ਸਿਰਫ ਵਿਆਜ ਦਰਾਂ ਵਿੱਚ ਕਟੌਤੀ ਕਰਨਾ ਹੀ ਹਾਊਸਿੰਗ ਮਾਰਕੀਟ ਨੂੰ ਪੂਰੀ ਤਰ੍ਹਾਂ ਸੰਭਾਲ ਨਹੀਂ ਸਕਦਾ। ਇਸ ਦੇ ਨਾਲ-ਨਾਲ ਸਰਕਾਰ ਨੂੰ ਆਮਦਨ ਸੁਰੱਖਿਆ, ਨੌਕਰੀ ਦੀ ਭਰੋਸੇਯੋਗਤਾ ਅਤੇ ਲੋੜੀਂਦੇ ਸਮੇਂ ‘ਤੇ ਆਰਥਿਕ ਮਦਦ ਜਿਵੇਂ ਹਥਿਆਰਾਂ ਦੀ ਵੀ ਵਰਤੋਂ ਕਰਨੀ ਪਵੇਗੀ।