ਦਿੱਲੀ ਦੀ ਹਵਾ ਮੁੜ ਹੋਈ ਪ੍ਰਦੂਸ਼ਿਤ, ਹਵਾ ਦੀ ਰਫ਼ਤਾਰ ਘੱਟ ਹੋਣ ਕਾਰਨ AQI 278 ਤੱਕ ਪਹੁੰਚਿਆ

Delhi's air quality remained in the poor category on November 21, 2026, with the AQI rising to 278 from 270 the previous day.

ਦਿੱਲੀ ਦੀ ਹਵਾ ਮੁੜ ਹੋਈ ਪ੍ਰਦੂਸ਼ਿਤ, ਹਵਾ ਦੀ ਰਫ਼ਤਾਰ ਘੱਟ ਹੋਣ ਕਾਰਨ AQI 278 ਤੱਕ ਪਹੁੰਚਿਆ

ਨਵੀਂ ਦਿੱਲੀ-ਦੇਸ਼ ਦੀ ਰਾਜਧਾਨੀ ਦਿੱਲੀ ਵਿੱਚ ਹਵਾ ਪ੍ਰਦੂਸ਼ਣ ਦੀ ਸਥਿਤੀ ਲਗਾਤਾਰ ਚਿੰਤਾਜਨਕ ਬਣੀ ਹੋਈ ਹੈ। ਸ਼ਨੀਵਾਰ ਸਵੇਰੇ ਹਵਾ ਗੁਣਵੱਤਾ ਸੂਚਕ ਅੰਕ (AQI) 278 ਦਰਜ ਕੀਤਾ ਗਿਆ, ਜੋ ਸ਼ੁੱਕਰਵਾਰ ਦੇ 270 ਦੇ ਮੁਕਾਬਲੇ ਵੱਧ ਹੈ। ਹਵਾ ਦੀ ਰਫ਼ਤਾਰ ਘੱਟ ਰਹਿਣ ਅਤੇ ਮੌਸਮ ਦੀਆਂ ਪ੍ਰਤੀਕੂਲ ਸਥਿਤੀਆਂ ਕਾਰਨ ਪ੍ਰਦੂਸ਼ਿਤ ਕਣਾਂ ਦਾ ਫੈਲਾਅ ਨਹੀਂ ਹੋ ਸਕਿਆ।

ਹਵਾ ਗੁਣਵੱਤਾ ਦੀ ਨਿਗਰਾਨੀ ਕਰਨ ਵਾਲੇ ਕੇਂਦਰਾਂ ਵਿੱਚੋਂ 24 ਕੇਂਦਰਾਂ ਨੇ ਹਵਾ ਦੀ ਗੁਣਵੱਤਾ ਬਹੁਤ ਖ਼ਰਾਬ ਸ਼੍ਰੇਣੀ ਵਿੱਚ ਦਰਜ ਕੀਤੀ, ਜਦਕਿ ਛੇ ਕੇਂਦਰਾਂ ਵਿੱਚ ਇਹ ਦਰਮਿਆਨੀ ਸ਼੍ਰੇਣੀ ਵਿੱਚ ਰਹੀ।

ਭਾਰਤੀ ਮੌਸਮ ਵਿਭਾਗ ਅਨੁਸਾਰ ਸ਼ਨੀਵਾਰ ਨੂੰ ਸਫਦਰਜੰਗ ਵਿੱਚ ਘੱਟੋ-ਘੱਟ ਤਾਪਮਾਨ 12.2 ਡਿਗਰੀ ਸੈਲਸੀਅਸ ਦਰਜ ਕੀਤਾ ਗਿਆ, ਜੋ ਪਿਛਲੇ ਦਿਨ ਨਾਲੋਂ 1.7 ਡਿਗਰੀ ਵੱਧ ਸੀ। ਇਸੇ ਤਰ੍ਹਾਂ ਪਾਲਮ ਵਿੱਚ 12.5, ਲੋਧੀ ਰੋਡ ਵਿੱਚ 13, ਰਿਜ ਇਲਾਕੇ ਵਿੱਚ 13.1 ਅਤੇ ਅਯਾਨਗਰ ਵਿੱਚ 11.5 ਡਿਗਰੀ ਸੈਲਸੀਅਸ ਤਾਪਮਾਨ ਦਰਜ ਕੀਤਾ ਗਿਆ।

ਮੌਸਮ ਵਿਗਿਆਨੀਆਂ ਅਨੁਸਾਰ ਸ਼ੁੱਕਰਵਾਰ ਦੁਪਹਿਰ ਨੂੰ ਵੀ ਹਵਾ ਦੀ ਰਫ਼ਤਾਰ ਪ੍ਰਦੂਸ਼ਣ ਨੂੰ ਦੂਰ ਕਰਨ ਲਈ ਕਾਫ਼ੀ ਨਹੀਂ ਸੀ। ਇਸ ਦੌਰਾਨ ਹਵਾ ਦੀ ਔਸਤ ਰਫ਼ਤਾਰ ਲਗਭਗ 4 ਕਿਲੋਮੀਟਰ ਪ੍ਰਤੀ ਘੰਟਾ ਰਹੀ, ਜਦਕਿ ਨਵੰਬਰ ਦੇ ਇਸ ਸਮੇਂ ਆਮ ਤੌਰ ’ਤੇ ਇਹ ਰਫ਼ਤਾਰ ਲਗਭਗ 15 ਕਿਲੋਮੀਟਰ ਪ੍ਰਤੀ ਘੰਟਾ ਹੁੰਦੀ ਹੈ।

ਰਾਤ ਸਮੇਂ ਹਾਲਾਤ ਹੋਰ ਵੀ ਮਾੜੇ ਰਹੇ। ਸਫਦਰਜੰਗ ਹਵਾਈ ਅੱਡੇ ’ਤੇ ਰਾਤ 8 ਵਜੇ ਤੋਂ ਸਵੇਰੇ 6.30 ਵਜੇ ਤੱਕ ਦਰਜ ਕੀਤੇ ਗਏ ਸਾਰੇ 11 ਨਿਰੀਖਣਾਂ ਦੌਰਾਨ ਸਤਹੀ ਹਵਾਵਾਂ ਸ਼ਾਂਤ ਰਹੀਆਂ।

ਇਸ ਤੋਂ ਇਲਾਵਾ ਹਵਾ ਵਿੱਚ ਤਾਪਮਾਨ ਦੀ ਉਲਟ ਪਰਤ (Temperature Inversion) ਵੀ ਜ਼ਮੀਨ ਦੇ ਨੇੜੇ ਬਣੀ ਰਹੀ। ਇਸ ਸਥਿਤੀ ਵਿੱਚ ਗਰਮ ਹਵਾ ਦੀ ਪਰਤ ਠੰਢੀ ਹਵਾ ਦੇ ਉੱਪਰ ਰਹਿੰਦੀ ਹੈ, ਜਿਸ ਕਾਰਨ ਪ੍ਰਦੂਸ਼ਿਤ ਕਣ ਉੱਪਰ ਵੱਲ ਨਹੀਂ ਜਾ ਸਕਦੇ ਅਤੇ ਜ਼ਮੀਨ ਦੇ ਨੇੜੇ ਹੀ ਇਕੱਠੇ ਹੋ ਜਾਂਦੇ ਹਨ।ਮਾਹਿਰਾਂ ਅਨੁਸਾਰ ਘੱਟ ਰਫ਼ਤਾਰ ਵਾਲੀਆਂ ਹਵਾਵਾਂ ਅਤੇ ਤਾਪਮਾਨ ਦੀ ਇਸ ਪਰਤ ਕਾਰਨ ਦਿੱਲੀ ਵਿੱਚ ਹਵਾ ਪ੍ਰਦੂਸ਼ਣ ਦਾ ਪੱਧਰ ਵਧਿਆ ਹੋਇਆ ਹੈ।