ਹੁਣ ਤੋਂ ਜੀ-7 ਸੰਮੇਲਨ ਤੱਕ ਕੈਨਾਨਾਸਕਿਸ ਦੇ ਉੱਪਰ ਉਡਣਗੇ ਫੌਜੀ ਜਹਾਜ਼  

ਓਟਾਵਾ-ਜੂਨ ਵਿੱਚ ਹੋਣ ਵਾਲੇ ਜੀ-7 ਸੰਮੇਲਨ ਲਈ ਸੁਰੱਖਿਆ ਯਤਨਾਂ ਦੇ ਹਿੱਸੇ ਵਜੋਂ ਰਾਇਲ ਕੈਨੇਡੀਅਨ ਏਅਰ ਫੋਰਸ ਦੇ ਜਹਾਜ਼ਾਂ ਦੀ ਕੈਨਾਨਾਸਕਿਸ ਖੇਤਰ ਵਿੱਚ ਮੌਜੂਦਗੀ ਵਧੇਗੀ। ਜਾਣਕਾਰੀ ਮੁਤਾਬਕ ਜੀ 7 ਸੰਮੇਲਨ ਦੀਆਂ ਤਿਆਰੀਆਂ ਮਈ ਦੇ ਸ਼ੁਰੂ ਤੋਂ ਜੂਨ ਦੇ ਅੱਧ ਤੱਕ ਹੋਣ ਦੀ ਉਮੀਦ ਹੈ ਅਤੇ ਇਹ ਸੰਮੇਲਨ 15 ਜੂਨ ਤੋਂ 17 ਜੂਨ ਤੱਕ ਚੱਲੇਗਾ ਜਿਸ ਤਹਿਤ 10 ਤੋਂ 18 ਜੂਨ ਤੱਕ ਪਾਬੰਦੀਆਂ ਅਤੇ ਸੜਕਾਂ ਬੰਦ ਕਰਨ ਦੀ ਯੋਜਨਾ ਹੈ। ਇਸ ਸਮੇਂ ਕੈਨਾਨਾਸਕਿਸ ਵਿੱਚ ਸੰਮੇਲਨ ਸਥਾਨਾਂ ਨੂੰ ਅਧਿਕਾਰਤ ਕਰਮਚਾਰੀਆਂ, ਨਿਵਾਸੀਆਂ ਅਤੇ ਕਾਰੋਬਾਰਾਂ ਲਈ ਪ੍ਰਵੇਸ਼ ਸੀਮਤ ਦੇ ਨਾਲ ਬੰਦ ਕਰ ਦਿੱਤਾ ਜਾਵੇਗਾ ਅਤੇ ਕੁਝ ਰਸਤੇ, ਦਿਨ-ਵਰਤੋਂ ਵਾਲੇ ਖੇਤਰ ਅਤੇ ਸਥਾਨਕ ਕਾਰੋਬਾਰ ਬੰਦ ਰਹਿਣਗੇ। ਇਸ ਮੌਕੇ ਇੰਟੀਗ੍ਰੇਟਿਡ ਸੇਫਟੀ ਐਂਡ ਸਿਕਿਓਰਿਟੀ ਗਰੁੱਪ ਦੇ ਬੁਲਾਰੇ ਫਰੇਜ਼ਰ ਲੋਗਨ ਦਾ ਕਹਿਣਾ ਹੈ ਕਿ ਅਲਬਰਟਾ ਵਾਸੀ ਅਤੇ ਪਹਾੜੀ ਸੈਲਾਨੀ ਹੁਣ ਤੋਂ ਪ੍ਰੋਗਰਾਮ ਤੱਕ ਸੀਐਫ-18 ਹਾਰਨੇਟ ਜੈੱਟ, ਚਿਨੂਕ ਅਤੇ ਗ੍ਰਿਫਨ ਹੈਲੀਕਾਪਟਰਾਂ ਦੇ ਨਾਲ, ਫਾਰਮੇਸ਼ਨਾਂ ਵਿੱਚ ਅਤੇ ਘੱਟ ਉਚਾਈ ’ਤੇ ਉੱਡਦੇ ਦੇਖਣਗੇ ਅਤੇ ਸੈਲਾਨੀਆਂ ਲਈ ਸੀਮਤ ਪਾਬੰਦੀਆਂ ਹੋਣਗੀਆਂ।

ਜ਼ਿਕਰਯੋਗ ਹੈ ਇਸ ਸਾਲ ਦੇ ਸ਼ੁਰੂ ਵਿੱਚ ਕੈਲਗਰੀ ਪੁਲਿਸ ਕਮਿਸ਼ਨ ਨੂੰ ਦਿੱਤੀ ਗਈ ਇੱਕ ਰਿਪੋਰਟ ਵਿੱਚ ਕਿਹਾ ਗਿਆ ਹੈ ਕਿ ਪੁਲਿਸ ਨੂੰ ਉਮੀਦ ਹੈ ਕਿ ਸਿਖਰ ਸੰਮੇਲਨ ਲਈ ਕੈਲਗਰੀ ਅਤੇ ਕਨਾਨਾਸਕਿਸ ਦੇ ਵਿਚਕਾਰਲੇ ਖੇਤਰ ਵਿੱਚ ਲਗਭਗ 70 ਸਰਕਾਰੀ ਮਹਿਮਾਨ, 2,000 ਡੈਲੀਗੇਟ ਅਤੇ 1,400 ਪੱਤਰਕਾਰ ਹੋਣਗੇ। ਕੈਨੇਡਾ ਭਰ ਦੇ ਪੁਲਿਸ ਬਲ ਸੁਰੱਖਿਆ ਯਤਨਾਂ ਦਾ ਸਮਰਥਨ ਕਰਨਗੇ, ਜਿਸ ਵਿੱਚ ਐਡਮੰਟਨ, ਵਿਨੀਪੈਗ ਅਤੇ ਵੈਨਕੂਵਰ ਦੇ ਅਧਿਕਾਰੀ ਸ਼ਾਮਲ ਹਨ। ਦੱਸ ਦਈਏ ਕਿ ਜੀ 7 ਕੈਨੇਡਾ, ਸੰਯੁਕਤ ਰਾਜ, ਫਰਾਂਸ, ਜਰਮਨੀ, ਜਾਪਾਨ, ਯੂਨਾਈਟਿਡ ਕਿੰਗਡਮ ਅਤੇ ਇਟਲੀ ਦੇ ਨੇਤਾਵਾਂ ਦੇ ਨਾਲ-ਨਾਲ ਯੂਰਪੀਅਨ ਯੂਨੀਅਨ ਨੂੰ ਇਕੱਠਾ ਕਰਦਾ ਹੈ। ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਨੇ ਇਸ ਹਫ਼ਤੇ ਦੇ ਸ਼ੁਰੂ ਵਿੱਚ ਪੁਸ਼ਟੀ ਕੀਤੀ ਸੀ ਕਿ ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਦੇ ਸ਼ਾਮਲ ਹੋਣ ਦੀ ਉਮੀਦ ਹੈ।