ਅਲਬਰਟਾ ਸਰਕਾਰ ਵੱਲੋਂ ਸਕੂਲ ਸੁਰੱਖਿਆ ਲਈ 22 ਮਿਲੀਅਨ ਡਾਲਰ ਦਾ ਐਲਾਨ

ਐਡਮੰਟਨ-Alberta ਦੀ ਸਰਕਾਰ ਨੇ ਸੂਬੇ ਦੇ ਸਕੂਲਾਂ ਦੀ ਸੁਰੱਖਿਆ ਮਜ਼ਬੂਤ ਕਰਨ ਲਈ 22 ਮਿਲੀਅਨ ਡਾਲਰ ਦੇ ਵੱਡੇ ਪੈਕੇਜ ਦਾ ਐਲਾਨ ਕੀਤਾ ਹੈ। ਇਹ ਫੈਸਲਾ Tumbler Ridge ਵਿੱਚ ਹੋਈ ਹਾਲੀਆ ਦੁਖਦਾਈ ਘਟਨਾ ਤੋਂ ਬਾਅਦ ਲਿਆ ਗਿਆ ਹੈ।ਸਰਕਾਰ ਵੱਲੋਂ ਜਾਰੀ ਕੀਤੀ ਜਾਣਕਾਰੀ ਮੁਤਾਬਕ, ਕੁੱਲ ਰਕਮ ਵਿੱਚੋਂ 20 ਮਿਲੀਅਨ ਡਾਲਰ ਸਕੂਲਾਂ ਦੇ ਸੁਰੱਖਿਆ ਢਾਂਚੇ ਨੂੰ ਅਧੁਨਿਕ ਬਣਾਉਣ ਲਈ ਖਰਚੇ ਜਾਣਗੇ, ਜਦਕਿ 2 ਮਿਲੀਅਨ ਡਾਲਰ ਸਟਾਫ ਲਈ ਸੁਰੱਖਿਆ ਸਬੰਧੀ ਟ੍ਰੇਨਿੰਗ ‘ਤੇ ਲਗਾਏ ਜਾਣਗੇ।ਸ਼ਿਕਸ਼ਾ ਅਤੇ ਬਾਲ ਸੰਭਾਲ ਮੰਤਰੀ ਡਿਮੈਟ੍ਰਿਓਸ ਨਿਕੋਲਾਇਡੀਜ਼ ਨੇ ਕਿਹਾ ਕਿ ਸਰਕਾਰ ਸਕੂਲਾਂ ਵਿੱਚ ਬੱਚਿਆਂ ਅਤੇ ਅਧਿਆਪਕਾਂ ਦੀ ਸੁਰੱਖਿਆ ਨੂੰ ਪਹਿਲ ਦੇ ਰਹੀ ਹੈ। ਉਨ੍ਹਾਂ ਕਿਹਾ ਕਿ ਸੰਕਟਕਾਲੀਨ ਹਾਲਾਤਾਂ ਨਾਲ ਨਿਭਣ ਲਈ ਸਟਾਫ ਦੀ ਤਿਆਰੀ ਬਹੁਤ ਜ਼ਰੂਰੀ ਹੈ ਅਤੇ ਇਸ ਲਈ ਹਰ ਸੰਭਵ ਕਦਮ ਚੁੱਕਿਆ ਜਾ ਰਿਹਾ ਹੈ।ਟ੍ਰੇਨਿੰਗ ਲਈ ਰੱਖੇ ਗਏ 2 ਮਿਲੀਅਨ ਡਾਲਰ ਵਿੱਚੋਂ 1.75 ਮਿਲੀਅਨ ਡਾਲਰ ਸਰਕਾਰੀ ਸਕੂਲ ਬੋਰਡਾਂ ਨੂੰ ਵਿਦਿਆਰਥੀਆਂ ਦੀ ਗਿਣਤੀ ਅਨੁਸਾਰ ਦਿੱਤੇ ਜਾਣਗੇ, ਜਦਕਿ 2.5 ਲੱਖ ਡਾਲਰ Association of Independent Schools & Colleges in Alberta ਨੂੰ ਪ੍ਰਾਈਵੇਟ ਸਕੂਲਾਂ ਦੇ ਪ੍ਰਬੰਧਕਾਂ ਲਈ ਟ੍ਰੇਨਿੰਗ ਮੁਹੱਈਆ ਕਰਵਾਉਣ ਲਈ ਦਿੱਤੇ ਜਾਣਗੇ।

ਇਸ ਟ੍ਰੇਨਿੰਗ ਵਿੱਚ ਐਮਰਜੈਂਸੀ ਤਿਆਰੀ, ਮਨੋਵਿਗਿਆਨਕ ਸਹਾਇਤਾ ਅਤੇ ਗੰਭੀਰ ਘਟਨਾਵਾਂ ਨਾਲ ਨਿਭਣ ਦੇ ਤਰੀਕੇ ਸ਼ਾਮਲ ਹੋਣਗੇ।ਦੂਜੇ ਪਾਸੇ, 20 ਮਿਲੀਅਨ ਡਾਲਰ ਦੀ ਰਕਮ ਨਾਲ ਸਕੂਲਾਂ ਵਿੱਚ ਤਾਲੇ, ਦਰਵਾਜ਼ੇ, ਸੁਰੱਖਿਆ ਕੈਮਰੇ ਅਤੇ ਖਿੜਕੀਆਂ ਲਈ ਕਵਰਿੰਗ ਵਰਗੀਆਂ ਸੁਵਿਧਾਵਾਂ ਨੂੰ ਮਜ਼ਬੂਤ ਕੀਤਾ ਜਾਵੇਗਾ।ਇਸ ਮੌਕੇ ‘ਤੇ ਅਲਬਰਟਾ ਸਕੂਲ ਬੋਰਡਜ਼ ਐਸੋਸੀਏਸ਼ਨ ਦੀ ਪ੍ਰਧਾਨ ਸ਼ੈਲੀ ਬਾਜ਼ਿਊਕ ਨੇ ਸਰਕਾਰ ਦੇ ਇਸ ਕਦਮ ਦਾ ਸਵਾਗਤ ਕਰਦਿਆਂ ਕਿਹਾ ਕਿ ਇਹ ਨਿਵੇਸ਼ ਵਿਦਿਆਰਥੀਆਂ ਅਤੇ ਸਟਾਫ ਦੀ ਸੁਰੱਖਿਆ ਨੂੰ ਹੋਰ ਮਜ਼ਬੂਤ ਕਰੇਗਾ ਅਤੇ ਸਕੂਲ ਬੋਰਡਾਂ ਨੂੰ ਆਪਣੀਆਂ ਲੋੜਾਂ ਮੁਤਾਬਕ ਫੰਡ ਵਰਤਣ ਦੀ ਆਜ਼ਾਦੀ ਮਿਲੇਗੀ।ਇਸਦੇ ਨਾਲ ਹੀ ਸਰਕਾਰ ਨੇ ਆਉਣ ਵਾਲੇ ਮਹੀਨਿਆਂ ਵਿੱਚ ਸਾਰੇ ਸਕੂਲਾਂ ਲਈ ਸਾਂਝੇ ਸੁਰੱਖਿਆ ਮਿਆਰ ਲਾਗੂ ਕਰਨ ਦਾ ਵੀ ਐਲਾਨ ਕੀਤਾ ਹੈ। ਇਹ ਮਿਆਰ ਸਰਕਾਰੀ, ਕੈਥੋਲਿਕ, ਫ੍ਰੈਂਕੋਫੋਨ ਅਤੇ ਨਿੱਜੀ ਸਕੂਲਾਂ ‘ਤੇ ਲਾਗੂ ਹੋਣਗੇ।ਜ਼ਿਕਰਯੋਗ ਹੈ ਕਿ ਸਕੂਲ ਅਥਾਰਟੀਜ਼ ਨੂੰ ਫੰਡ ਦੀ ਵਰਤੋਂ ਬਾਰੇ ਨਵੰਬਰ 2026 ਵਿੱਚ ਅੰਤਰਿਮ ਅਤੇ ਨਵੰਬਰ 2027 ਵਿੱਚ ਅੰਤਿਮ ਰਿਪੋਰਟ ਦੇਣੀ ਹੋਵੇਗੀ।