ਐਡਮੰਟਨ ਦੇ ਡਾਊਨਟਾਊਨ ਵਿੱਚ ਕਾਰੋਬਾਰ ਬੰਦ ਹੋਣ 'ਤੇ ਚਿੰਤਾ, ਸਿਟੀ ਕੌਂਸਲ ਤੋਂ ਤੁਰੰਤ ਕਦਮ ਚੁੱਕਣ ਦੀ ਮੰਗ
ਐਡਮੰਟਨ-ਐਡਮੰਟਨ ਦੇ ਡਾਊਨਟਾਊਨ ਵਿੱਚ ਲਗਾਤਾਰ ਕਾਰੋਬਾਰ ਬੰਦ ਹੋਣ ਦੇ ਮੱਦੇਨਜ਼ਰ ਡਾਊਨਟਾਊਨ ਰੀਵਾਈਟਲਾਈਜ਼ੇਸ਼ਨ ਕੋਆਲੀਸ਼ਨ (DRC) ਨੇ ਸਿਟੀ ਕੌਂਸਲ ਨੂੰ ਤੁਰੰਤ ਐਮਰਜੈਂਸੀ ਕਦਮ ਚੁੱਕਣ ਦੀ ਅਪੀਲ ਕੀਤੀ ਹੈ। ਇਸ ਗਰਮੀ ਦੌਰਾਨ ਅੱਧੀ ਦਰਜਨ ਤੋਂ ਵੱਧ ਰੈਸਟੋਰੈਂਟ ਬੰਦ ਹੋ ਚੁੱਕੇ ਹਨ, ਜਿਸ ਕਾਰਨ ਵਪਾਰਕ ਭਾਈਚਾਰੇ ਵਿੱਚ ਚਿੰਤਾ ਵਧ ਗਈ ਹੈ।
ਕੋਆਲੀਸ਼ਨ ਨੇ ਆਪਣੀ ਡਾਊਨਟਾਊਨ ਆਰਥਿਕ ਸਥਿਰਤਾ ਯੋਜਨਾ ਤਹਿਤ ਕਈ ਸੁਝਾਅ ਦਿੱਤੇ ਹਨ। ਇਨ੍ਹਾਂ ਵਿੱਚ ਨਿਰਮਾਣ ਕਾਰਜਾਂ ਨੂੰ ਬਿਹਤਰ ਢੰਗ ਨਾਲ ਤਾਲਮੇਲ ਵਿੱਚ ਕਰਨਾ, ਕਾਰੋਬਾਰਾਂ ਤੱਕ ਗਾਹਕਾਂ ਦੀ ਆਸਾਨ ਪਹੁੰਚ ਯਕੀਨੀ ਬਣਾਉਣਾ, 2026 ਦੇ ਬਾਕੀ ਨਿਰਮਾਣ ਸੀਜ਼ਨ ਦੌਰਾਨ ਡਾਊਨਟਾਊਨ ਵਿੱਚ ਸੜਕ ਕਿਨਾਰੇ ਮੁਫ਼ਤ ਪਾਰਕਿੰਗ, ਪੈਟਿਓ ਪਰਮਿਟ ਫੀਸ ਮੁਆਫ਼ ਕਰਨਾ ਅਤੇ ਕਾਰੋਬਾਰਾਂ ਲਈ ਇੱਕ ਸੀਨੀਅਰ ਅਧਿਕਾਰੀ ਦੀ ਨਿਯੁਕਤੀ ਸ਼ਾਮਲ ਹੈ।
ਐਡਮੰਟਨ ਚੈਂਬਰ ਆਫ਼ ਕਾਮਰਸ ਨੇ ਵੀ ਇਨ੍ਹਾਂ ਮੰਗਾਂ ਦਾ ਸਮਰਥਨ ਕੀਤਾ ਹੈ। ਚੈਂਬਰ ਦਾ ਕਹਿਣਾ ਹੈ ਕਿ ਇਸ ਵੇਲੇ ਡਾਊਨਟਾਊਨ ਵਿੱਚ ਨਵੇਂ ਕਾਰੋਬਾਰ ਖੁੱਲ੍ਹਣ ਦੇ ਮੁਕਾਬਲੇ ਦੋਗੁਣੇ ਕਾਰੋਬਾਰ ਬੰਦ ਹੋ ਰਹੇ ਹਨ, ਜੋ ਚਿੰਤਾਜਨਕ ਰੁਝਾਨ ਹੈ। ਸੰਸਥਾ ਦਾ ਮੰਨਣਾ ਹੈ ਕਿ ਲੰਬੇ ਸਮੇਂ ਤੱਕ ਚੱਲਣ ਵਾਲੇ ਐਲਆਰਟੀ ਅਤੇ ਹੋਰ ਨਿਰਮਾਣ ਕਾਰਜਾਂ ਕਾਰਨ ਕਈ ਕਾਰੋਬਾਰਾਂ ਦੀ ਗਾਹਕੀ ਪ੍ਰਭਾਵਿਤ ਹੋਈ ਹੈ।ਮੇਅਰ ਐਂਡਰੂ ਨੈਕ ਨੇ ਮੰਨਿਆ ਕਿ ਵੱਧ ਰਹੇ ਨਿਰਮਾਣ ਕਾਰਜਾਂ ਦਾ ਅਸਰ ਕਾਰੋਬਾਰਾਂ 'ਤੇ ਪਿਆ ਹੈ, ਪਰ ਉਨ੍ਹਾਂ ਕਿਹਾ ਕਿ ਸ਼ਹਿਰ ਪਹਿਲਾਂ ਹੀ ਨਿਰਮਾਣ ਕਾਰਜਾਂ ਨੂੰ ਤੇਜ਼ੀ ਨਾਲ ਪੂਰਾ ਕਰਨ ਲਈ ਕਦਮ ਚੁੱਕ ਰਿਹਾ ਹੈ। ਉਨ੍ਹਾਂ ਦੱਸਿਆ ਕਿ ਡਾਊਨਟਾਊਨ ਐਕਸ਼ਨ ਪਲਾਨ ਲਈ ਵਾਧੂ ਫੰਡ ਮੁਹੱਈਆ ਕਰਵਾਉਣ ਬਾਰੇ ਦਸੰਬਰ ਵਿੱਚ ਹੋਣ ਵਾਲੀਆਂ ਬਜਟ ਮੀਟਿੰਗਾਂ ਦੌਰਾਨ ਵਿਚਾਰ ਕੀਤਾ ਜਾਵੇਗਾ।
