ਆਸਟ੍ਰੇਲੀਆ–ਯੂਰਪੀ ਸੰਘ ਵਿਚਕਾਰ ਵੱਡਾ ਫ੍ਰੀ ਟ੍ਰੇਡ ਸਮਝੌਤਾ, ਗਲੋਬਲ ਅਣਿਸ਼ਚਿਤਤਾ ਦਰਮਿਆਨ ਵੱਡਾ ਕਦਮ

ਕੈਨਬਰਾ-ਆਸਟ੍ਰੇਲੀਆ ਅਤੇ ਯੂਰਪੀ ਸੰਘ (EU) ਵਿਚਕਾਰ ਅੱਠ ਸਾਲਾਂ ਦੀ ਗੱਲਬਾਤ ਤੋਂ ਬਾਅਦ ਇਕ ਵੱਡਾ ਫ੍ਰੀ ਟ੍ਰੇਡ ਸਮਝੌਤਾ ਹੋ ਗਿਆ ਹੈ। ਇਸ ਸਮਝੌਤੇ ਦੀ ਕੀਮਤ ਲਗਭਗ 10 ਅਰਬ ਆਸਟ੍ਰੇਲੀਆਈ ਡਾਲਰ ਮੰਨੀ ਜਾ ਰਹੀ ਹੈ।

ਇਹ ਸਮਝੌਤਾ ਆਸਟ੍ਰੇਲੀਆ ਦੇ ਪ੍ਰਧਾਨ ਮੰਤਰੀ ਐਂਥਨੀ ਅਲਬਾਨੀਜ਼ ਅਤੇ ਯੂਰਪੀ ਕਮਿਸ਼ਨ ਦੀ ਪ੍ਰਧਾਨ ਉਰਸੁਲਾ ਵਾਨ ਡਰ ਲੇਯਨ ਵੱਲੋਂ “ਦੋਵਾਂ ਲਈ ਫ਼ਾਇਦੇਮੰਦ” ਕਰਾਰ ਦਿੱਤਾ ਗਿਆ। ਉਰਸੁਲਾ ਵਾਨ ਡਰ ਲੇਯਨ ਨੇ ਕਿਹਾ ਕਿ ਇਹ ਸਮਝੌਤਾ “ਬਦਲ ਰਹੀ ਦੁਨੀਆ ਵਿੱਚ ਸਾਂਝੀ ਮਜ਼ਬੂਤੀ” ਨੂੰ ਧਿਆਨ ਵਿੱਚ ਰੱਖ ਕੇ ਕੀਤਾ ਗਿਆ ਹੈ। ਇਸ ਦੇ ਤਹਿਤ ਲਗਭਗ ਸਾਰੇ ਵਪਾਰਕ ਟੈਰਿਫ਼ ਹਟਾਏ ਜਾਣਗੇ ਅਤੇ ਰੱਖਿਆ ਅਤੇ ਅਹਿਮ ਖਣਿਜ ਖੇਤਰਾਂ ਵਿੱਚ ਸਹਿਯੋਗ ਵਧਾਇਆ ਜਾਵੇਗਾ।ਇਸ ਸਮਝੌਤੇ ਨਾਲ ਆਸਟ੍ਰੇਲੀਆਈ ਉਤਪਾਦ ਜਿਵੇਂ ਵਾਈਨ, ਫਲ, ਸਬਜ਼ੀਆਂ, ਸਮੁੰਦਰੀ ਖੁਰਾਕ, ਡੇਅਰੀ ਅਤੇ ਅਨਾਜ ‘ਤੇ EU ਟੈਰਿਫ਼ ਖਤਮ ਹੋਣਗੇ। ਇਸ ਨਾਲ ਵਾਈਨ ਉਦਯੋਗ ਨੂੰ ਵੱਡਾ ਫ਼ਾਇਦਾ ਹੋਵੇਗਾ।ਦੂਜੇ ਪਾਸੇ, ਆਸਟ੍ਰੇਲੀਆ ਵਿੱਚ ਯੂਰਪੀ ਉਤਪਾਦ—ਜਿਵੇਂ ਵਾਈਨ, ਚਾਕਲੇਟ, ਬਿਸਕੁਟ ਅਤੇ ਪਾਸਤਾ—ਸਸਤੇ ਹੋਣ ਦੀ ਸੰਭਾਵਨਾ ਹੈ।
ਆਸਟ੍ਰੇਲੀਆਈ ਬੀਫ ਅਤੇ ਲੈਂਬ ਦੀ EU ਵਿੱਚ ਐਕਸਪੋਰਟ ਮਾਤਰਾ ਵਧੇਗੀ, ਪਰ ਦੋਵਾਂ ਪਾਸਿਆਂ ਦੇ ਕਿਸਾਨ ਇਸ ਨਾਲ ਖੁਸ਼ ਨਹੀਂ ਹਨ। ਆਸਟ੍ਰੇਲੀਆਈ ਕਿਸਾਨਾਂ ਨੂੰ ਵਧੇਰੇ ਕੋਟੇ ਦੀ ਉਮੀਦ ਸੀ, ਜਦਕਿ ਯੂਰਪੀ ਕਿਸਾਨ ਇਸ ਵਾਧੇ ਦਾ ਵਿਰੋਧ ਕਰ ਰਹੇ ਹਨ।
ਸਮਝੌਤੇ ਤਹਿਤ ਰੱਖਿਆ, ਆਤੰਕਵਾਦ ਵਿਰੋਧ, ਅੰਤਰਿਕਸ਼ ਅਤੇ ਸਮੁੰਦਰੀ ਸੁਰੱਖਿਆ ਵਿੱਚ ਸਾਂਝ ਵਧੇਗੀ। ਨਾਲ ਹੀ ਲਿਥੀਅਮ ਅਤੇ ਟੰਗਸਟਨ ਵਰਗੇ ਅਹਿਮ ਖਣਿਜਾਂ ਵਿੱਚ ਵੀ ਸਹਿਕਾਰਤਾ ਵਧਾਈ ਜਾਵੇਗੀ।

ਇਹ ਸਮਝੌਤਾ ਉਸ ਵੇਲੇ ਆਇਆ ਹੈ ਜਦੋਂ ਦੁਨੀਆ ਭਰ ਵਿੱਚ ਵਪਾਰਕ ਅਣਿਸ਼ਚਿਤਤਾ ਵਧ ਰਹੀ ਹੈ ਅਤੇ ਵੱਡੀਆਂ ਤਾਕਤਾਂ ਟੈਰਿਫ਼ ਨੂੰ ਹਥਿਆਰ ਵਜੋਂ ਵਰਤ ਰਹੀਆਂ ਹਨ।