ਕੈਲਗਰੀ ਸਟੈਂਪੀਡ ਵਿੱਚ ਸਿਆਸਤ ਨਾਲ-ਨਾਲ ਪੱਛਮੀ ਪਹਿਰਾਵੇ ਦੀ ਵੀ ਚਰਚਾ, ਆਗੂਆਂ ਦੀ ਵੇਸ਼ਭੂਸ਼ਾ ਬਣੀ ਖਿੱਚ ਦਾ ਕੇਂਦਰ
ਕੈਲਗਰੀ-ਕੈਲਗਰੀ ਸਟੈਂਪੀਡ ਸਿਰਫ਼ ਰੋਡੀਓ ਜਾਂ ਪੱਛਮੀ ਸੱਭਿਆਚਾਰ ਦਾ ਮੇਲਾ ਹੀ ਨਹੀਂ, ਸਗੋਂ ਇਹ ਇੱਕ ਅਜਿਹਾ ਮੰਚ ਵੀ ਬਣ ਚੁੱਕਾ ਹੈ ਜਿੱਥੇ ਸਿਆਸਤਦਾਨ ਆਪਣੇ ਪਹਿਰਾਵੇ ਰਾਹੀਂ ਲੋਕਾਂ ਨਾਲ ਜੁੜਨ ਦੀ ਕੋਸ਼ਿਸ਼ ਕਰਦੇ ਹਨ। ਹਰ ਸਾਲ ਵੱਖ-ਵੱਖ ਰਾਜਨੀਤਿਕ ਪਾਰਟੀਆਂ ਦੇ ਆਗੂ ਇਸ ਸਮਾਗਮ ਵਿੱਚ ਪੱਛਮੀ ਅੰਦਾਜ਼ ਦੇ ਕੱਪੜੇ ਪਾ ਕੇ ਸ਼ਿਰਕਤ ਕਰਦੇ ਹਨ।ਫੈਸ਼ਨ ਮਾਹਿਰਾਂ ਦਾ ਮੰਨਣਾ ਹੈ ਕਿ ਕਾਊਬੌਏ ਟੋਪੀ, ਬੈਲਟ ਬਕਲ, ਡੈਨਿਮ ਜੀਨਜ਼ ਅਤੇ ਬੂਟ ਸਿਰਫ਼ ਪਹਿਰਾਵੇ ਦਾ ਹਿੱਸਾ ਨਹੀਂ, ਸਗੋਂ ਇਹ ਇੱਕ ਸੰਦੇਸ਼ ਵੀ ਦਿੰਦੇ ਹਨ ਕਿ ਆਗੂ ਸਥਾਨਕ ਸੱਭਿਆਚਾਰ ਨਾਲ ਆਪਣੇ ਆਪ ਨੂੰ ਜੋੜਨਾ ਚਾਹੁੰਦੇ ਹਨ।
ਕੈਨੇਡੀਅਨ ਫੈਸ਼ਨ ਡਿਜ਼ਾਈਨਰ ਪਾਲ ਹਾਰਡੀ ਨੇ ਕਿਹਾ ਕਿ ਕੈਲਗਰੀ ਸਟੈਂਪੀਡ ਇੱਕ ਸਮਾਜਿਕ ਰੁਝਾਨ ਬਣ ਚੁੱਕਾ ਹੈ। ਉਨ੍ਹਾਂ ਅਨੁਸਾਰ ਅਲਬਰਟਾ ਦੇ ਬਹੁਤ ਸਾਰੇ ਲੋਕਾਂ ਦੀ ਅਲਮਾਰੀ ਵਿੱਚ ਪੱਛਮੀ ਪਹਿਰਾਵੇ ਲਈ ਵੱਖਰੀ ਜਗ੍ਹਾ ਹੁੰਦੀ ਹੈ ਅਤੇ ਸਟੈਂਪੀਡ ਦੌਰਾਨ ਉਹ ਇਸ ਨੂੰ ਮਾਣ ਨਾਲ ਪਹਿਨਦੇ ਹਨ।
ਉੱਧਰ, ਯੂਨੀਵਰਸਿਟੀ ਆਫ਼ ਅਲਬਰਟਾ ਦੀ ਪਹਿਰਾਵਾ ਇਤਿਹਾਸਕਾਰ ਅਤੇ ਪ੍ਰੋਫੈਸਰ ਐਨ ਬਿਸੋਨੇਟ ਦਾ ਕਹਿਣਾ ਹੈ ਕਿ ਸਿਆਸਤਦਾਨ ਆਪਣੇ ਕੱਪੜਿਆਂ ਰਾਹੀਂ ਲੋਕਾਂ ਸਾਹਮਣੇ ਆਪਣੀ ਇੱਕ ਖ਼ਾਸ ਛਵੀ ਬਣਾਉਂਦੇ ਹਨ। ਉਹ ਸਿਰਫ਼ ਨੀਤੀਆਂ ਨਾਲ ਹੀ ਨਹੀਂ, ਸਗੋਂ ਆਪਣੇ ਪਹਿਰਾਵੇ ਨਾਲ ਵੀ ਲੋਕਾਂ ਨਾਲ ਸੰਚਾਰ ਕਰਦੇ ਹਨ।ਇਸ ਸਾਲ ਦੇ ਸਮਾਗਮ ਦੌਰਾਨ ਕੈਨੇਡਾ ਦੇ ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ, ਸੰਘੀ ਵਿਰੋਧੀ ਧਿਰ ਦੇ ਆਗੂ ਪਿਅਰੇ ਪੋਇਲੀਏਵਰ, ਓਨਟਾਰੀਓ ਦੇ ਪ੍ਰੀਮੀਅਰ ਡਗ ਫੋਰਡ ਅਤੇ ਅਲਬਰਟਾ ਦੀ ਪ੍ਰੀਮੀਅਰ ਡੈਨੀਅਲ ਸਮਿਥ ਪੱਛਮੀ ਅੰਦਾਜ਼ ਦੇ ਪਹਿਰਾਵੇ ਵਿੱਚ ਨਜ਼ਰ ਆਏ।
ਹਾਲਾਂਕਿ, ਪਿਛਲੇ ਹਫ਼ਤੇ ਪਿਅਰੇ ਪੋਇਲੀਏਵਰ ਵੱਲੋਂ ਭਾਸ਼ਣ ਦੌਰਾਨ ਪਹਿਨੀ ਗਈ ਚਿੱਟੀ ਕੜ੍ਹਾਈ ਵਾਲੀ ਕਮੀਜ਼ ਅਤੇ ਚਿੱਟੀ ਕਾਊਬੌਏ ਟੋਪੀ ਸੋਸ਼ਲ ਮੀਡੀਆ 'ਤੇ ਚਰਚਾ ਦਾ ਵਿਸ਼ਾ ਬਣ ਗਈ। ਉਨ੍ਹਾਂ ਦੇ ਇਸ ਪਹਿਰਾਵੇ ਨੂੰ ਲੈ ਕੇ ਕਈ ਮੀਮ ਵੀ ਬਣੇ ਅਤੇ ਕੁਝ ਫੈਸ਼ਨ ਮਾਹਿਰਾਂ ਨੇ ਇਸ ਦੀ ਤੁਲਨਾ "ਕੇਨ ਡੌਲ" ਦੀ ਸਟਾਈਲ ਨਾਲ ਕੀਤੀ।ਫੈਸ਼ਨ ਮਾਹਿਰਾਂ ਦਾ ਕਹਿਣਾ ਹੈ ਕਿ ਜਦੋਂ ਸਿਆਸਤਦਾਨ ਕਿਸੇ ਖੇਤਰ ਦੀ ਸੱਭਿਆਚਾਰਕ ਪਹਿਚਾਣ ਨੂੰ ਆਪਣੇ ਪਹਿਰਾਵੇ ਰਾਹੀਂ ਅਪਣਾਉਂਦੇ ਹਨ ਤਾਂ ਲੋਕ ਇਸ ਨੂੰ ਸਤਿਕਾਰ ਵਜੋਂ ਵੀ ਦੇਖਦੇ ਹਨ। ਪਰ ਜੇਕਰ ਇਹ ਪਹਿਰਾਵਾ ਬਹੁਤ ਜ਼ਿਆਦਾ ਬਣਾਵਟੀ ਜਾਂ ਅਤਿਰੰਜਿਤ ਲੱਗੇ ਤਾਂ ਇਸ ਦੀ ਆਲੋਚਨਾ ਵੀ ਹੋ ਸਕਦੀ ਹੈ।ਮਾਹਿਰਾਂ ਅਨੁਸਾਰ ਕੈਲਗਰੀ ਸਟੈਂਪੀਡ ਵਰਗੇ ਸਮਾਗਮਾਂ ਵਿੱਚ ਪਹਿਰਾਵਾ ਸਿਰਫ਼ ਫੈਸ਼ਨ ਨਹੀਂ ਹੁੰਦਾ, ਸਗੋਂ ਲੋਕਾਂ ਨਾਲ ਜੁੜਨ, ਆਪਣੀ ਪਛਾਣ ਦਰਸਾਉਣ ਅਤੇ ਇੱਕ ਪ੍ਰਭਾਵਸ਼ਾਲੀ ਸੰਦੇਸ਼ ਦੇਣ ਦਾ ਮਹੱਤਵਪੂਰਨ ਸਾਧਨ ਵੀ ਬਣ ਜਾਂਦਾ ਹੈ।
