ਅਲਬਰਟਾ ਵਿੱਚ ਮੈਟਾ ਦੇ ਵਿਸ਼ਾਲ ਡਾਟਾ ਸੈਂਟਰ ਨੂੰ ਲੈ ਕੇ ਪ੍ਰੀਮੀਅਰ ਡੈਨੀਅਲ ਸਮਿਥ ਨੇ ਲੋਕਾਂ ਨੂੰ ਦਿੱਤਾ ਭਰੋਸਾ
ਐਡਮੰਟਨ-ਅਲਬਰਟਾ ਦੀ ਪ੍ਰੀਮੀਅਰ ਡੈਨੀਅਲ ਸਮਿਥ ਨੇ ਆਪਣੇ ਸ਼ਨੀਵਾਰ ਦੇ ਰੇਡੀਓ ਕਾਲ-ਇਨ ਪ੍ਰੋਗਰਾਮ ਦੌਰਾਨ ਸੂਬੇ ਵਿੱਚ ਮੈਟਾ (ਫੇਸਬੁੱਕ ਅਤੇ ਇੰਸਟਾਗ੍ਰਾਮ ਦੀ ਮੂਲ ਕੰਪਨੀ) ਵੱਲੋਂ ਬਣਾਏ ਜਾਣ ਵਾਲੇ ਵਿਸ਼ਾਲ ਡਾਟਾ ਸੈਂਟਰ ਨੂੰ ਲੈ ਕੇ ਉੱਠ ਰਹੀਆਂ ਚਿੰਤਾਵਾਂ ਦਾ ਜਵਾਬ ਦਿੱਤਾ।ਪ੍ਰੀਮੀਅਰ ਸਮਿਥ ਨੇ ਕਿਹਾ ਕਿ 13 ਅਰਬ ਡਾਲਰ ਤੋਂ ਵੱਧ ਦੀ ਲਾਗਤ ਨਾਲ ਐਡਮੰਟਨ ਦੇ ਉੱਤਰ ਵਿੱਚ ਸਟਰਜਨ ਕਾਊਂਟੀ ਵਿੱਚ ਬਣਨ ਵਾਲੇ ਇਸ ਡਾਟਾ ਸੈਂਟਰ ਕਾਰਨ ਨਾ ਤਾਂ ਲੋਕਾਂ ਦੇ ਬਿਜਲੀ ਬਿੱਲਾਂ ਵਿੱਚ ਵਾਧਾ ਹੋਵੇਗਾ ਅਤੇ ਨਾ ਹੀ ਸੂਬੇ ਦੇ ਪਾਣੀ ਦੇ ਸਰੋਤਾਂ ‘ਤੇ ਕੋਈ ਵਾਧੂ ਦਬਾਅ ਪਵੇਗਾ।
ਉਨ੍ਹਾਂ ਦੱਸਿਆ ਕਿ ਸਾਲ 2030 ਤੱਕ ਗ੍ਰੀਨਲਾਈਟ ਇਲੈਕਟ੍ਰਿਸਿਟੀ ਸੈਂਟਰ ਵੱਲੋਂ ਨਵਾਂ ਕੁਦਰਤੀ ਗੈਸ ਆਧਾਰਿਤ ਬਿਜਲੀ ਘਰ ਤਿਆਰ ਕੀਤਾ ਜਾਵੇਗਾ। ਉਸ ਸਮੇਂ ਤੱਕ ਡਾਟਾ ਸੈਂਟਰ ਨੂੰ ਸੂਬੇ ਦੇ ਬਿਜਲੀ ਗ੍ਰਿਡ ਵਿੱਚ ਮੌਜੂਦ ਵਾਧੂ (ਸਰਪਲੱਸ) ਬਿਜਲੀ ਨਾਲ ਚਲਾਇਆ ਜਾਵੇਗਾ।ਪਾਣੀ ਦੀ ਵਰਤੋਂ ਬਾਰੇ ਚਿੰਤਾਵਾਂ ਦਾ ਜਵਾਬ ਦਿੰਦਿਆਂ ਸਮਿਥ ਨੇ ਕਿਹਾ ਕਿ ਇਹ ਡਾਟਾ ਸੈਂਟਰ ਲਗਭਗ ਇੱਕ ਗੋਲਫ ਕੋਰਸ ਦੇ ਬਰਾਬਰ ਪਾਣੀ ਦੀ ਵਰਤੋਂ ਕਰੇਗਾ। ਇਸ ਵਿੱਚ ਕਲੋਜ਼ਡ-ਲੂਪ ਵਾਟਰ ਕੂਲਿੰਗ ਸਿਸਟਮ ਲਗਾਇਆ ਜਾਵੇਗਾ, ਜਿਸ ਕਾਰਨ ਆਸ-ਪਾਸ ਦੇ ਇਲਾਕਿਆਂ ਤੋਂ ਲਗਾਤਾਰ ਪਾਣੀ ਨਹੀਂ ਖਿੱਚਿਆ ਜਾਵੇਗਾ।
ਮੈਟਾ ਨੇ ਇਸ ਹਫ਼ਤੇ ਐਲਾਨ ਕੀਤਾ ਸੀ ਕਿ ਸਟਰਜਨ ਕਾਊਂਟੀ ਵਿੱਚ ਇੱਕ ਗੀਗਾਵਾਟ ਸਮਰੱਥਾ ਵਾਲਾ ਅਤਿ-ਆਧੁਨਿਕ ਏਆਈ (AI) ਡਾਟਾ ਸੈਂਟਰ ਸਥਾਪਤ ਕੀਤਾ ਜਾਵੇਗਾ। ਕੰਪਨੀ ਨੇ ਇਹ ਵੀ ਦੱਸਿਆ ਕਿ ਉਹ ਸਥਾਨਕ ਬੁਨਿਆਦੀ ਢਾਂਚੇ ਦੇ ਵਿਕਾਸ ਲਈ 6 ਕਰੋੜ ਡਾਲਰ ਦਾ ਨਿਵੇਸ਼ ਕਰੇਗੀ, ਜਿਸ ਵਿੱਚ ਸੜਕਾਂ, ਪਾਣੀ ਦੀਆਂ ਸਹੂਲਤਾਂ ਅਤੇ ਹੋਰ ਜਨਤਕ ਢਾਂਚਿਆਂ ਨੂੰ ਬਿਹਤਰ ਬਣਾਉਣਾ ਸ਼ਾਮਲ ਹੈ।
