ਓਟਵਾ-ਕੈਨੇਡਾ ਸਰਕਾਰ ਅਮਰੀਕਾ ਅਤੇ ਈਰਾਨ ਵਿਚਕਾਰ ਹੋਏ ਜੰਗਬੰਦੀ ਸਮਝੌਤੇ ਵਿੱਚ ਲੇਬਨਾਨ ਨੂੰ ਸ਼ਾਮਿਲ ਕਰਨ ਲਈ ਦਬਾਅ ਵਧਾ ਰਹੀ ਹੈ। ਸੂਤਰਾਂ ਅਨੁਸਾਰ, ਕੈਨੇਡਾ ਇਸ ਮਾਮਲੇ ‘ਚ ਹੋਰ ਕਈ ਦੇਸ਼ਾਂ ਨਾਲ ਮਿਲ ਕੇ ਕੋਸ਼ਿਸ਼ ਕਰ ਰਿਹਾ ਹੈ ਤਾਂ ਜੋ ਖੇਤਰ ਵਿੱਚ ਵਧ ਰਹੇ ਤਣਾਅ ਨੂੰ ਘਟਾਇਆ ਜਾ ਸਕੇ।
ਮੌਜੂਦਾ ਹਾਲਾਤਾਂ ਵਿੱਚ ਲੇਬਨਾਨ ‘ਚ ਈਰਾਨ-ਸਮਰਥਿਤ ਗਰੁੱਪ ਹਿਜਬੁੱਲਾ ਅਤੇ ਇਜ਼ਰਾਈਲ ਵਿਚਕਾਰ ਟਕਰਾਅ ਜਾਰੀ ਹੈ, ਜੋ ਅਮਰੀਕਾ ਅਤੇ ਇਜ਼ਰਾਈਲ ਵੱਲੋਂ ਈਰਾਨ ‘ਤੇ ਹਮਲਿਆਂ ਤੋਂ ਬਾਅਦ ਹੋਰ ਤੇਜ਼ ਹੋ ਗਿਆ ਹੈ। ਹਾਲਾਂਕਿ ਅਮਰੀਕਾ ਅਤੇ ਇਜ਼ਰਾਈਲ ਦਾ ਕਹਿਣਾ ਹੈ ਕਿ ਲੇਬਨਾਨ ਇਸ ਜੰਗਬੰਦੀ ਦਾ ਹਿੱਸਾ ਨਹੀਂ, ਪਰ ਪਾਕਿਸਤਾਨ ਦਾ ਦਾਅਵਾ ਹੈ ਕਿ ਇਸਨੂੰ ਖਾਸ ਤੌਰ ‘ਤੇ ਸ਼ਾਮਿਲ ਕੀਤਾ ਗਿਆ ਸੀ।
ਸੂਤਰਾਂ ਮੁਤਾਬਕ, ਇਸ ਸਥਿਤੀ ਦਾ ਨਿਰਭਰ ਵੱਡੇ ਪੱਧਰ ‘ਤੇ ਡੋਨਾਲਡ ਟਰੰਪ ਵੱਲੋਂ ਇਜ਼ਰਾਈਲ ‘ਤੇ ਬਣਾਏ ਜਾਣ ਵਾਲੇ ਦਬਾਅ ‘ਤੇ ਹੈ, ਕਿਉਂਕਿ ਇਜ਼ਰਾਈਲ ਲੇਬਨਾਨ ‘ਚ ਆਪਣੀ ਕਾਰਵਾਈ ਜਾਰੀ ਰੱਖ ਰਿਹਾ ਹੈ। ਈਰਾਨ ਨੇ ਵੀ ਸਪੱਸ਼ਟ ਕੀਤਾ ਹੈ ਕਿ ਜਦ ਤੱਕ ਲੇਬਨਾਨ ‘ਤੇ ਹਮਲੇ ਨਹੀਂ ਰੁਕਦੇ, ਉਹ ਜੰਗਬੰਦੀ ਨੂੰ ਪੂਰੀ ਤਰ੍ਹਾਂ ਨਹੀਂ ਮੰਨੇਗਾ।
ਕੈਨੇਡਾ ਦੇ ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਪਹਿਲਾਂ ਹੀ ਕਹਿ ਚੁੱਕੇ ਹਨ ਕਿ ਜੰਗਬੰਦੀ ਵਿੱਚ ਲੇਬਨਾਨ ਦੀ ਸ਼ਮੂਲੀਅਤ ਜ਼ਰੂਰੀ ਹੈ। ਉਨ੍ਹਾਂ ਨੇ ਹਿਜਬੁੱਲਾ ‘ਤੇ ਕਾਬੂ ਪਾਉਣ ਦੀ ਲੋੜ ‘ਤੇ ਵੀ ਜ਼ੋਰ ਦਿੱਤਾ, ਹਾਲਾਂਕਿ ਇਜ਼ਰਾਈਲ ‘ਤੇ ਪਾਬੰਦੀਆਂ ਬਾਰੇ ਕੁਝ ਨਹੀਂ ਕਿਹਾ।
ਇਸ ਮਾਮਲੇ ਵਿੱਚ ਇਮੈਨੂਅਲ ਮੈਕਰੌਨ ਅਤੇ ਐਂਥਨੀ ਐਲਬਨੀਜ਼ ਨੇ ਵੀ ਲੇਬਨਾਨ ਨੂੰ ਜੰਗਬੰਦੀ ਵਿੱਚ ਸ਼ਾਮਿਲ ਕਰਨ ਦੀ ਮੰਗ ਕੀਤੀ ਹੈ।
ਵਿਸ਼ਲੇਸ਼ਕਾਂ ਦਾ ਮੰਨਣਾ ਹੈ ਕਿ ਜੇ ਇਹ ਟਕਰਾਅ ਜਾਰੀ ਰਿਹਾ ਤਾਂ ਲੇਬਨਾਨ ਵਿੱਚ ਗੰਭੀਰ ਅਸਥਿਰਤਾ ਜਾਂ ਗ੍ਰਹਿ-ਯੁੱਧ ਦੇ ਹਾਲਾਤ ਬਣ ਸਕਦੇ ਹਨ। ਲੇਬਨਾਨ ਸਰਕਾਰ ਮੁਤਾਬਕ ਹਾਲੀਆ ਹਮਲਿਆਂ ਵਿੱਚ 250 ਤੋਂ ਵੱਧ ਲੋਕ ਮਾਰੇ ਗਏ ਹਨ, ਜਦਕਿ ਇਜ਼ਰਾਈਲ ਦਾ ਕਹਿਣਾ ਹੈ ਕਿ ਆਪਣੀ ਸੁਰੱਖਿਆ ਲਈ ਉਹ ਦੱਖਣੀ ਲੇਬਨਾਨ ਵਿੱਚ ਸੈਨਾ ਦੀ ਮੌਜੂਦਗੀ ਜਾਰੀ ਰੱਖੇਗਾ।
