ਬੈਂਕ ਆਫ ਕੈਨੇਡਾ ਦੇ ਦੋ ਅਹੁਦੇ ਹੋ ਰਹੇ ਖਾਲੀ: ਡਿਪਟੀ ਗਵਰਨਰ ਰੀਸ ਮੈਂਡਸ ਦੇ ਰਹੇ ਹਨ ਅਸਤੀਫਾ

ਓਟਾਵਾ-ਬੈਂਕ ਆਫ ਕੈਨੇਡਾ ਨੇ ਐਲਾਨ ਕੀਤਾ ਹੈ ਕਿ ਡਿਪਟੀ ਗਵਰਨਰ ਰੀਸ ਮੈਂਡਸ ਆਪਣੇ ਅਹੁਦੇ ਤੋਂ ਅਸਤੀਫਾ ਦੇ ਰਹੇ ਹਨ, ਜਦਕਿ ਡਿਪਟੀ ਗਵਰਨਰ ਸ਼ੈਰਨ ਕੋਜਿ਼ਕੀ ਇਸ ਸਾਲ ਬਾਅਦ ਵਿੱਚ ਰਿਟਾਇਰ ਹੋ ਜਾਣਗੇ।

ਰੀਸ ਮੈਂਡਸ, ਜਿਨ੍ਹਾਂ ਨੂੰ 2023 ਵਿੱਚ ਡਿਪਟੀ ਗਵਰਨਰ ਨਿਯੁਕਤ ਕੀਤਾ ਗਿਆ ਸੀ, 10 ਅਪ੍ਰੈਲ ਨੂੰ ਆਪਣਾ ਅਹੁਦਾ ਛੱਡਣਗੇ। ਬੈਂਕ ਮੁਤਾਬਕ ਉਹ ਆਪਣੇ ਪਰਿਵਾਰ ਨਾਲ ਟੋਰਾਂਟੋ ਵਿੱਚ ਸ਼ਿਫਟ ਹੋਣ ਦੀ ਯੋਜਨਾ ਬਣਾ ਰਹੇ ਹਨ। ਉਹ ਬੈਂਕ ਵਿੱਚ ਅੰਤਰਰਾਸ਼ਟਰੀ ਅਰਥਵਿਵਸਥਾ ਦੇ ਵਿਸ਼ਲੇਸ਼ਣ ਲਈ ਜ਼ਿੰਮੇਵਾਰ ਸਨ ਅਤੇ G7 ਅਤੇ G20 ਮੀਟਿੰਗਾਂ ਵਿੱਚ ਬੈਂਕ ਦੇ ਡਿਪਟੀ ਪ੍ਰਤੀਨਿਧੀ ਵਜੋਂ ਭੂਮਿਕਾ ਨਿਭਾ ਰਹੇ ਸਨ।

ਸ਼ੈਰਨ ਕੋਜਿ਼ਕੀ, ਜੋ 2006 ਵਿੱਚ ਬੈਂਕ ਨਾਲ ਜੁੜੇ ਸਨ ਅਤੇ 2021 ਵਿੱਚ ਡਿਪਟੀ ਗਵਰਨਰ ਬਣੇ, 15 ਜੁਲਾਈ ਨੂੰ ਰਿਟਾਇਰ ਹੋਣਗੇ। ਉਹ ਕੈਨੇਡਾ ਦੀ ਘਰੇਲੂ ਅਰਥਵਿਵਸਥਾ ਦੇ ਵਿਸ਼ਲੇਸ਼ਣ ਦੀ ਜ਼ਿੰਮੇਵਾਰੀ ਸੰਭਾਲ ਰਹੇ ਸਨ।

ਦੋਵੇਂ ਹੀ ਬੈਂਕ ਦੀ ਗਵਰਨਿੰਗ ਕੌਂਸਲ ਦੇ ਮੈਂਬਰ ਹਨ, ਜੋ ਦੇਸ਼ ਦੀ ਮੋਨਿਟਰੀ ਪਾਲਿਸੀ ਦੇ ਦਿਨ-ਪ੍ਰਤੀਦਿਨ ਫੈਸਲੇ ਲੈਂਦੀ ਹੈ। ਬੈਂਕ ਆਫ ਕੈਨੇਡਾ ਨੇ ਕਿਹਾ ਹੈ ਕਿ ਖਾਲੀ ਹੋ ਰਹੇ ਅਹੁਦਿਆਂ ਲਈ ਅੰਦਰੂਨੀ ਭਰਤੀ ਪ੍ਰਕਿਰਿਆ ਸ਼ੁਰੂ ਕੀਤੀ ਜਾਵੇਗੀ।

ਅਰਥਸ਼ਾਸਤਰੀਆਂ ਮੁਤਾਬਕ ਇਹ ਬਦਲਾਅ ਕੈਨੇਡਾ ਦੀ ਆਰਥਿਕ ਨੀਤੀ ‘ਤੇ ਅਹਿਮ ਅਸਰ ਪਾ ਸਕਦੇ ਹਨ।