ਗਣਿਤ ਦੀ ਪੜ੍ਹਾਈ ਵਿੱਚ ਕੇਲੋਨਾ ਦੇ ਦੋ ਸਕੂਲਾਂ ਨੇ ਦਿਖਾਇਆ ਸ਼ਾਨਦਾਰ ਸੁਧਾਰ

ਕੇਲੋਨਾ-ਕੈਨੇਡਾ ਦੇ ਬ੍ਰਿਟਿਸ਼ ਕੋਲੰਬੀਆ ਸੂਬੇ ਦੇ ਕੇਲੋਨਾ ਸ਼ਹਿਰ ਦੇ ਦੋ ਮਿਡਲ ਸਕੂਲਾਂ ਨੇ ਗਣਿਤ ਦੀ ਪੜ੍ਹਾਈ ਵਿੱਚ ਵਿਦਿਆਰਥੀਆਂ ਦੇ ਨਤੀਜਿਆਂ ਨੂੰ ਸੁਧਾਰਨ ਵਿੱਚ ਸਫ਼ਲਤਾ ਹਾਸਲ ਕੀਤੀ ਹੈ। ਕੈਨਿਯਨ ਫਾਲਜ਼ ਮਿਡਲ ਸਕੂਲ ਅਤੇ ਸਪਰਿੰਗਵੈਲੀ ਮਿਡਲ ਸਕੂਲ ਦੇ ਵਿਦਿਆਰਥੀਆਂ ਨੇ ਸੂਬਾਈ ਪੱਧਰ ਦੀਆਂ ਮਿਆਰੀ ਗਣਿਤ ਪ੍ਰੀਖਿਆਵਾਂ ਵਿੱਚ ਲਗਾਤਾਰ ਬਿਹਤਰ ਪ੍ਰਦਰਸ਼ਨ ਕੀਤਾ ਹੈ।

ਸਕੂਲ ਬੋਰਡ ਦੇ ਟਰੱਸਟੀਆਂ ਸਾਹਮਣੇ ਪੇਸ਼ ਕੀਤੀ ਜਾਣ ਵਾਲੀ ਰਿਪੋਰਟ ਮੁਤਾਬਕ, ਸਪਰਿੰਗਵੈਲੀ ਮਿਡਲ ਸਕੂਲ ਵਿੱਚ 2021 ਤੋਂ 2023 ਦਰਮਿਆਨ ਸੱਤਵੀਂ ਜਮਾਤ ਦੇ ਉਨ੍ਹਾਂ ਵਿਦਿਆਰਥੀਆਂ ਦੀ ਗਿਣਤੀ 39 ਫ਼ੀਸਦੀ ਤੋਂ ਵਧ ਕੇ 56 ਫ਼ੀਸਦੀ ਹੋ ਗਈ, ਜਿਨ੍ਹਾਂ ਦਾ ਗਣਿਤ ਦਾ ਪ੍ਰਦਰਸ਼ਨ ਤੈਅ ਮਿਆਰ ਅਨੁਸਾਰ ਜਾਂ ਉਸ ਤੋਂ ਬਿਹਤਰ ਰਿਹਾ।ਇਸੇ ਸਮੇਂ ਦੌਰਾਨ ਕੈਨਿਯਨ ਫਾਲਜ਼ ਮਿਡਲ ਸਕੂਲ ਵਿੱਚ ਇਹ ਅੰਕੜਾ 48 ਫ਼ੀਸਦੀ ਤੋਂ ਵਧ ਕੇ 63 ਫ਼ੀਸਦੀ ਹੋ ਗਿਆ। ਰਿਪੋਰਟ ਅਨੁਸਾਰ, ਇਹ ਨਤੀਜੇ ਦਰਸਾਉਂਦੇ ਹਨ ਕਿ ਵੱਖ-ਵੱਖ ਪੱਧਰਾਂ ਤੋਂ ਸ਼ੁਰੂਆਤ ਕਰਨ ਵਾਲੇ ਸਕੂਲ ਵੀ ਸਹੀ ਤਰੀਕਿਆਂ ਨਾਲ ਵਿਦਿਆਰਥੀਆਂ ਦੀ ਕਾਰਗੁਜ਼ਾਰੀ ਵਿੱਚ ਮਹੱਤਵਪੂਰਨ ਸੁਧਾਰ ਕਰ ਸਕਦੇ ਹਨ।

ਹਾਲਾਂਕਿ, ਜ਼ਿਲ੍ਹੇ ਦੇ ਸਮੁੱਚੇ ਸਕੂਲਾਂ ਵਿੱਚ ਵਿਦਿਆਰਥੀਆਂ ਦੇ ਗਣਿਤ ਦੇ ਨਤੀਜਿਆਂ ਵਿੱਚ ਬਹੁਤ ਘੱਟ ਸੁਧਾਰ ਦੇਖਿਆ ਗਿਆ ਹੈ। ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਜਿਨ੍ਹਾਂ ਸਕੂਲਾਂ ਨੇ ਬਿਹਤਰ ਨਤੀਜੇ ਹਾਸਲ ਕੀਤੇ ਹਨ, ਉਨ੍ਹਾਂ ਦੇ ਪੜ੍ਹਾਉਣ ਦੇ ਤਰੀਕਿਆਂ ਅਤੇ ਸਫ਼ਲਤਾ ਦੇ ਕਾਰਨਾਂ ਦਾ ਅਧਿਐਨ ਕਰਕੇ ਹੋਰ ਸਕੂਲ ਵੀ ਲਾਭ ਉਠਾ ਸਕਦੇ ਹਨ।ਰਿਪੋਰਟ ਵਿੱਚ ਇਹ ਵੀ ਸੁਝਾਅ ਦਿੱਤਾ ਗਿਆ ਹੈ ਕਿ ਦੋਵਾਂ ਸਕੂਲਾਂ ਦੇ ਤਜਰਬਿਆਂ ਦਾ ਅਧਿਐਨ ਕੀਤਾ ਜਾਵੇ, ਪਰ ਇਹ ਮੰਨ ਕੇ ਨਾ ਚੱਲਿਆ ਜਾਵੇ ਕਿ ਇੱਕੋ ਪੜ੍ਹਾਉਣ ਦਾ ਤਰੀਕਾ ਹਰ ਸਕੂਲ ਵਿੱਚ ਉਸੇ ਤਰ੍ਹਾਂ ਸਫ਼ਲ ਹੋਵੇਗਾ।

ਜ਼ਿਲ੍ਹੇ ਦੇ ਸਾਰੇ ਮਿਡਲ ਸਕੂਲਾਂ ਵਿੱਚ ਪਿਛਲੇ ਤਿੰਨ ਸਾਲਾਂ ਦੌਰਾਨ ਸੱਤਵੀਂ ਜਮਾਤ ਦੇ 93 ਫ਼ੀਸਦੀ ਵਿਦਿਆਰਥੀਆਂ ਦਾ ਗਣਿਤ ਵਿੱਚ ਪ੍ਰਦਰਸ਼ਨ ਤੈਅ ਮਿਆਰ ਅਨੁਸਾਰ ਰਿਹਾ ਹੈ। ਵਿਦਿਆਰਥੀਆਂ ਦੀ ਕਾਰਗੁਜ਼ਾਰੀ ਨੂੰ ਹੋਰ ਬਿਹਤਰ ਬਣਾਉਣ ਲਈ ਜ਼ਿਲ੍ਹੇ ਵਿੱਚ ਨਵੀਂ ‘ਅਧਿਆਪਨ ਮਾਰਗਦਰਸ਼ਿਕਾ’ ਤਿਆਰ ਕਰਨ ਦੀ ਸਿਫ਼ਾਰਸ਼ ਵੀ ਕੀਤੀ ਗਈ ਹੈ।ਰਿਪੋਰਟ ਵਿੱਚ ਦੋਵਾਂ ਸਫ਼ਲ ਸਕੂਲਾਂ ਦੇ ਨਤੀਜਿਆਂ ਦਾ ਜ਼ਿਕਰ ਕੀਤਾ ਗਿਆ ਹੈ, ਪਰ ਹੋਰ ਸਕੂਲਾਂ ਦੇ ਵੱਖਰੇ ਨਤੀਜੇ ਜਾਰੀ ਨਹੀਂ ਕੀਤੇ ਗਏ।