ਕੈਲਗਰੀ ਵਿੱਚ 38ਵੀਂ ਸਾਲਾਨਾ ਮੇਅਰ ਫੂਡ ਡਰਾਈਵ ਸ਼ੁਰੂ, ਮਹਿੰਗਾਈ ਕਾਰਨ ਫੂਡ ਬੈਂਕ ’ਤੇ ਵਧਿਆ ਬੋਝ
Calgary has launched its 38th annual Mayor’s Food Drive amid rising living costs and growing demand for food assistance.
ਕੈਲਗਰੀ-ਸ਼ਹਿਰ ਵਿੱਚ ਲਗਾਤਾਰ ਵਧ ਰਹੀ ਮਹਿੰਗਾਈ ਅਤੇ ਘਰੇਲੂ ਖਰਚਿਆਂ ਦੇ ਦਬਾਅ ਦਰਮਿਆਨ ਕੈਲਗਰੀ ਦੀ 38ਵੀਂ ਸਾਲਾਨਾ ਮੇਅਰ ਫੂਡ ਡਰਾਈਵ ਅਤੇ ਕੌਂਸਲਰਜ਼ ਚੈਲੰਜ ਦੀ ਸ਼ੁਰੂਆਤ ਬੁੱਧਵਾਰ ਨੂੰ ਕੈਲਗਰੀ ਫੂਡ ਬੈਂਕ ਵਿਖੇ ਕੀਤੀ ਗਈ। ਇਸ ਮੌਕੇ ਮੇਅਰ ਅਤੇ ਸਿਟੀ ਕੌਂਸਲ ਦੇ ਮੈਂਬਰਾਂ ਨੇ ਲੋੜਵੰਦ ਪਰਿਵਾਰਾਂ ਲਈ ਐਮਰਜੈਂਸੀ ਰਾਸ਼ਨ ਦੇ ਪੈਕੇਟ ਤਿਆਰ ਕਰਨ ਵਿੱਚ ਹਿੱਸਾ ਲਿਆ।
ਕੈਲਗਰੀ ਫੂਡ ਬੈਂਕ ਦੀ ਮੁੱਖ ਕਾਰਜਕਾਰੀ ਅਧਿਕਾਰੀ ਮੇਲਿਸਾ ਫਰੌਮ ਅਨੁਸਾਰ, ਇਸ ਸਮੇਂ ਰੋਜ਼ਾਨਾ ਲਗਭਗ ਇੱਕ ਹਜ਼ਾਰ ਲੋਕ ਫੂਡ ਬੈਂਕ ਤੋਂ ਸਹਾਇਤਾ ਲੈ ਰਹੇ ਹਨ। ਉਨ੍ਹਾਂ ਦੱਸਿਆ ਕਿ ਫੂਡ ਬੈਂਕ ਦੀ ਸਹਾਇਤਾ ਲੈਣ ਵਾਲੇ ਲਗਭਗ 30 ਫ਼ੀਸਦੀ ਲੋਕ ਪੂਰੇ ਸਮੇਂ ਦੀਆਂ ਨੌਕਰੀਆਂ ਕਰਦੇ ਹਨ, ਪਰ ਉਨ੍ਹਾਂ ਦੀ ਔਸਤ ਘੰਟਾਵਾਰ ਕਮਾਈ ਸਿਰਫ਼ 19 ਡਾਲਰ ਹੈ। ਇਸ ਤੋਂ ਇਲਾਵਾ ਕੈਲਗਰੀ ਦੇ ਹਰ ਦਸ ਵਿੱਚੋਂ ਇੱਕ ਬੱਚਾ ਫੂਡ ਬੈਂਕ ਦੀ ਸਹਾਇਤਾ ’ਤੇ ਨਿਰਭਰ ਹੈ।
ਉਨ੍ਹਾਂ ਕਿਹਾ ਕਿ ਕ੍ਰਿਸਮਸ ਅਤੇ ਛੁੱਟੀਆਂ ਦੇ ਦਿਨਾਂ ਦੌਰਾਨ ਫੂਡ ਬੈਂਕ ’ਤੇ ਸਹਾਇਤਾ ਦੀ ਮੰਗ ਹੋਰ ਵਧ ਜਾਂਦੀ ਹੈ। ਪਿਛਲੇ ਸਾਲ ਕ੍ਰਿਸਮਸ ਫੂਡ ਡਰਾਈਵ ਰਾਹੀਂ 5 ਲੱਖ 30 ਹਜ਼ਾਰ ਡਾਲਰ ਤੋਂ ਵੱਧ ਮੁੱਲ ਦਾ ਭੋਜਨ ਅਤੇ ਆਰਥਿਕ ਸਹਿਯੋਗ ਇਕੱਠਾ ਹੋਇਆ ਸੀ।
ਇਸ ਸਾਲ ਫੂਡ ਬੈਂਕ ਨੂੰ ਪਾਸਤਾ, ਡੱਬਾਬੰਦ ਟਮਾਟਰ, ਪੀਨਟ ਬਟਰ, ਡਾਇਪਰ ਅਤੇ ਬੱਚਿਆਂ ਦੇ ਦੁੱਧ ਦੇ ਪਾਊਡਰ ਦੀ ਸਭ ਤੋਂ ਵੱਧ ਲੋੜ ਹੈ।
ਮੇਲਿਸਾ ਫਰੌਮ ਨੇ ਕਿਹਾ ਕਿ ਖਾਣ-ਪੀਣ ਦੀਆਂ ਵਸਤਾਂ ਦੀਆਂ ਵਧਦੀਆਂ ਕੀਮਤਾਂ ਦੇ ਨਾਲ ਸ਼ਹਿਰ ਵੱਲੋਂ ਪ੍ਰਸਤਾਵਿਤ ਟੈਕਸ ਵਾਧਾ ਵੀ ਪਰਿਵਾਰਾਂ ਦੀਆਂ ਮੁਸ਼ਕਲਾਂ ਵਧਾ ਸਕਦਾ ਹੈ। ਕੈਲਗਰੀ ਵਿੱਚ ਅਗਲੇ ਸਾਲ ਜਾਇਦਾਦ ਟੈਕਸ ਵਿੱਚ 15 ਫ਼ੀਸਦੀ ਵਾਧੇ ਦਾ ਪ੍ਰਸਤਾਵ ਹੈ। ਉਨ੍ਹਾਂ ਮੁਤਾਬਕ ਜਾਇਦਾਦ ਟੈਕਸ ਵਿੱਚ ਮਹੀਨਾਵਾਰ 50 ਡਾਲਰ ਅਤੇ ਪਾਣੀ ਦੇ ਬਿੱਲ ਵਿੱਚ 20 ਡਾਲਰ ਦਾ ਵਾਧਾ ਵੀ ਕਈ ਪਰਿਵਾਰਾਂ ਲਈ ਖਾਣੇ ਦੇ ਖਰਚੇ ’ਤੇ ਅਸਰ ਪਾ ਸਕਦਾ ਹੈ।
ਵਾਰਡ ਨੰਬਰ 5 ਦੇ ਕੌਂਸਲਰ ਰਾਜ ਧਾਲੀਵਾਲ ਨੇ ਕਿਹਾ ਕਿ ਉਹ ਪ੍ਰਸਤਾਵਿਤ ਬਜਟ ਦੀ ਹਰ ਮੱਦ ਦੀ ਸਮੀਖਿਆ ਕਰਨਗੇ ਅਤੇ ਖਰਚਿਆਂ ਵਿੱਚ ਕਟੌਤੀ ਤੇ ਬਿਹਤਰ ਪ੍ਰਬੰਧਨ ਰਾਹੀਂ ਬੱਚਤ ਦੇ ਮੌਕੇ ਲੱਭਣ ਦੀ ਕੋਸ਼ਿਸ਼ ਕਰਨਗੇ। ਸ਼ਹਿਰ ਦੇ ਪ੍ਰਸਤਾਵਿਤ ਬਜਟ ਸਬੰਧੀ ਜਨਤਕ ਸੁਣਵਾਈ ਅਗਲੇ ਹਫ਼ਤੇ ਸ਼ੁਰੂ ਹੋਵੇਗੀ।
ਫੂਡ ਬੈਂਕ ਵੱਲੋਂ ਲੋਕਾਂ ਨੂੰ ਆਨਲਾਈਨ ਆਰਥਿਕ ਸਹਾਇਤਾ ਦੇਣ ਦੀ ਅਪੀਲ ਕੀਤੀ ਗਈ ਹੈ। ਇਸ ਤੋਂ ਇਲਾਵਾ ਖਾਣ-ਪੀਣ ਦੀਆਂ ਵਸਤਾਂ 5000, 11 ਸਟ੍ਰੀਟ ਐੱਸ.ਈ. ਸਥਿਤ ਫੂਡ ਬੈਂਕ ਦੇ ਗੋਦਾਮ ਵਿੱਚ ਜਮ੍ਹਾਂ ਕਰਵਾਈਆਂ ਜਾ ਸਕਦੀਆਂ ਹਨ।














