ਓਂਟਾਰੀਓ ਦੇ ਕਈ ਹਸਪਤਾਲਾਂ ’ਚ ਚੋਰੀਆਂ ਦੇ ਮਾਮਲੇ, 34 ਸਾਲਾ ਔਰਤ ’ਤੇ ਦਰਜਨਾਂ ਦੋਸ਼
Ontario police have laid dozens of charges against a 34-year-old Burlington woman following an investigation into alleged theft and fraud at five hospitals in the region and the Greater Toronto Area.
ਓਂਟਾਰੀਓ-ਓਂਟਾਰੀਓ ਦੇ ਪੰਜ ਹਸਪਤਾਲਾਂ ਵਿੱਚ ਮਰੀਜ਼ਾਂ ਅਤੇ ਸਟਾਫ਼ ਨਾਲ ਕਥਿਤ ਚੋਰੀ ਤੇ ਧੋਖਾਧੜੀ ਦੇ ਮਾਮਲਿਆਂ ਦੀ ਜਾਂਚ ਤੋਂ ਬਾਅਦ ਓਰਿਲੀਆ ਓਪੀਪੀ ਨੇ ਇੱਕ 34 ਸਾਲਾ ਔਰਤ ਖ਼ਿਲਾਫ਼ ਦਰਜਨਾਂ ਦੋਸ਼ ਲਗਾਏ ਹਨ। ਪੁਲਿਸ ਨੇ ਹੋਰ ਸੰਭਾਵਿਤ ਪੀੜਤਾਂ ਨੂੰ ਸਾਹਮਣੇ ਆਉਣ ਦੀ ਅਪੀਲ ਕੀਤੀ ਹੈ।
ਓਪੀਪੀ ਮੁਤਾਬਕ ਚੋਰੀਆਂ ਦੇ ਮਾਮਲੇ ਓਰਿਲੀਆ ਸੋਲਜਰਜ਼ ਮੈਮੋਰੀਅਲ ਹਸਪਤਾਲ, ਔਰੇਂਜਵਿਲ ਦੇ ਹੈੱਡਵਾਟਰਜ਼ ਹੈਲਥ ਕੇਅਰ ਸੈਂਟਰ, ਮਿਸੀਸਾਗਾ ਹਸਪਤਾਲ ਦੇ ਟ੍ਰਿਲੀਅਮ ਹੈਲਥ ਪਾਰਟਨਰਜ਼, ਟੋਰਾਂਟੋ ਦੇ ਸੇਂਟ ਜੋਸਫ਼ ਹੈਲਥ ਸੈਂਟਰ ਅਤੇ ਵੈਸਟ ਪਾਰਕ ਹੈਲਥ ਕੇਅਰ ਸੈਂਟਰ ਨਾਲ ਸਬੰਧਤ ਹਨ।
ਪੁਲਿਸ ਅਨੁਸਾਰ ਓਰਿਲੀਆ ਹਸਪਤਾਲ ਵਿੱਚ ਅਪ੍ਰੈਲ 2025 ਤੋਂ ਮਾਰਚ 2026, ਔਰੇਂਜਵਿਲ ਵਿੱਚ ਅਗਸਤ ਤੋਂ ਸਤੰਬਰ 2026, ਮਿਸੀਸਾਗਾ ਵਿੱਚ ਅਗਸਤ 2025 ਤੋਂ ਜੁਲਾਈ 2026 ਅਤੇ ਟੋਰਾਂਟੋ ਦੇ ਦੋ ਹਸਪਤਾਲਾਂ ਵਿੱਚ 2024 ਅਤੇ 2025 ਦੌਰਾਨ ਚੋਰੀਆਂ ਦੀਆਂ ਘਟਨਾਵਾਂ ਸਾਹਮਣੇ ਆਈਆਂ।
ਜਾਂਚ ਦੀ ਸ਼ੁਰੂਆਤ ਹਸਪਤਾਲਾਂ ਅੰਦਰ ਮਰੀਜ਼ਾਂ ਅਤੇ ਸਟਾਫ਼ ਵੱਲੋਂ ਚੋਰੀ ਅਤੇ ਧੋਖਾਧੜੀ ਸਬੰਧੀ ਮਿਲੀਆਂ ਸ਼ਿਕਾਇਤਾਂ ਤੋਂ ਹੋਈ। ਪੁਲਿਸ ਨੇ ਕਈ ਤਲਾਸ਼ੀ ਵਾਰੰਟ ਜਾਰੀ ਕਰਕੇ ਕਾਰਵਾਈ ਕੀਤੀ ਅਤੇ ਵੱਡੀ ਮਾਤਰਾ ਵਿੱਚ ਸਾਮਾਨ ਬਰਾਮਦ ਕੀਤਾ।
ਬਰਲਿੰਗਟਨ ਦੀ 34 ਸਾਲਾ ਔਰਤ ’ਤੇ 5,000 ਡਾਲਰ ਤੋਂ ਘੱਟ ਧੋਖਾਧੜੀ ਦੇ 34 ਮਾਮਲੇ, 5,000 ਡਾਲਰ ਤੋਂ ਘੱਟ ਚੋਰੀ ਦੇ 13 ਮਾਮਲੇ, ਅਦਾਲਤੀ ਹੁਕਮ ਦੀ ਉਲੰਘਣਾ ਦੇ 7 ਮਾਮਲੇ ਅਤੇ ਅਪਰਾਧਿਕ ਭਰੋਸਾ ਤੋੜਨ ਦੇ 4 ਮਾਮਲੇ ਦਰਜ ਕੀਤੇ ਗਏ ਹਨ।
ਇਸ ਤੋਂ ਇਲਾਵਾ ਉਸ ’ਤੇ 5,000 ਡਾਲਰ ਤੋਂ ਵੱਧ ਧੋਖਾਧੜੀ ਦੇ 2 ਮਾਮਲੇ, ਅਪਰਾਧ ਰਾਹੀਂ ਹਾਸਲ ਕੀਤੀ 5,000 ਡਾਲਰ ਤੋਂ ਵੱਧ ਕੀਮਤ ਦੀ ਜਾਇਦਾਦ ਰੱਖਣ ਦੇ 3 ਮਾਮਲੇ, 5,000 ਡਾਲਰ ਤੋਂ ਵੱਧ ਚੋਰੀ ਅਤੇ ਗਲਤ ਨੀਅਤ ਨਾਲ ਕਿਸੇ ਹੋਰ ਵਿਅਕਤੀ ਦੀ ਪਛਾਣ ਵਰਤਣ ਦਾ ਇੱਕ ਮਾਮਲਾ ਵੀ ਦਰਜ ਹੈ।
ਓਪੀਪੀ ਨੇ ਇਨ੍ਹਾਂ ਹਸਪਤਾਲਾਂ ਵਿੱਚ ਦੱਸੇ ਸਮੇਂ ਦੌਰਾਨ ਜਾਣ ਵਾਲੇ ਲੋਕਾਂ ਨੂੰ ਅਪੀਲ ਕੀਤੀ ਹੈ ਕਿ ਜੇ ਉਨ੍ਹਾਂ ਦੇ ਖਾਤਿਆਂ ਵਿੱਚ ਕੋਈ ਬਿਨਾਂ ਮਨਜ਼ੂਰੀ ਲੈਣ-ਦੇਣ ਹੋਇਆ ਹੈ ਤਾਂ ਉਹ ਪੁਲਿਸ ਨਾਲ ਸੰਪਰਕ ਕਰਨ।
