ਅਲਬਰਟਾ ਵਿੱਚ ਮੁੱਢਲੀਆਂ ਸਿਹਤ ਸੇਵਾਵਾਂ ਵਿੱਚ ਨਵੀਨਤਾ ਲਈ 1 ਕਰੋੜ ਡਾਲਰ ਦਾ ਨਿਵੇਸ਼
Alberta is investing $10 million through its Primary Care Innovation Fund to improve access to health services, support innovative care projects and reduce avoidable hospital visits.
ਅਲਬਰਟਾ-ਅਲਬਰਟਾ ਸਰਕਾਰ ਨੇ ਸੂਬੇ ਵਿੱਚ ਮੁੱਢਲੀਆਂ ਸਿਹਤ ਸੇਵਾਵਾਂ ਨੂੰ ਬਿਹਤਰ ਬਣਾਉਣ ਅਤੇ ਮਰੀਜ਼ਾਂ ਨੂੰ ਸਮੇਂ ਸਿਰ ਇਲਾਜ ਮੁਹੱਈਆ ਕਰਵਾਉਣ ਲਈ ‘ਪ੍ਰਾਇਮਰੀ ਕੇਅਰ ਇਨੋਵੇਸ਼ਨ ਫੰਡ’ ਰਾਹੀਂ 1 ਕਰੋੜ ਡਾਲਰ ਨਿਵੇਸ਼ ਕਰਨ ਦਾ ਐਲਾਨ ਕੀਤਾ ਹੈ। ਇਸ ਫੰਡ ਦਾ ਉਦੇਸ਼ ਸਿਹਤ ਸੇਵਾਵਾਂ ਤੱਕ ਪਹੁੰਚ ਆਸਾਨ ਬਣਾਉਣਾ, ਮਰੀਜ਼ਾਂ ਨੂੰ ਸਮੇਂ ਸਿਰ ਲੋੜੀਂਦੀ ਸਹਾਇਤਾ ਨਾਲ ਜੋੜਨਾ ਅਤੇ ਸੂਬੇ ਦੇ ਵੱਖ-ਵੱਖ ਭਾਈਚਾਰਿਆਂ ਦੀਆਂ ਸਿਹਤ ਸਬੰਧੀ ਲੋੜਾਂ ਨੂੰ ਬਿਹਤਰ ਢੰਗ ਨਾਲ ਪੂਰਾ ਕਰਨਾ ਹੈ।ਮੁੱਢਲੀਆਂ ਅਤੇ ਰੋਕਥਾਮ ਸਬੰਧੀ ਸਿਹਤ ਸੇਵਾਵਾਂ ਬਾਰੇ ਮੰਤਰੀ ਜਸਟਿਨ ਰਾਈਟ ਨੇ ਕਿਹਾ ਕਿ ਮੁੱਢਲੀਆਂ ਸਿਹਤ ਸੇਵਾਵਾਂ ਇੱਕ ਮਜ਼ਬੂਤ ਸਿਹਤ ਪ੍ਰਣਾਲੀ ਦੀ ਨੀਂਹ ਹਨ। ਇਸ ਫੰਡ ਰਾਹੀਂ ਨਵੇਂ ਵਿਚਾਰਾਂ ਨੂੰ ਅਮਲੀ ਰੂਪ ਦਿੱਤਾ ਜਾਵੇਗਾ, ਤਾਂ ਜੋ ਮਰੀਜ਼ਾਂ ਨੂੰ ਜਲਦੀ ਇਲਾਜ ਮਿਲ ਸਕੇ, ਸਿਹਤ ਪ੍ਰਣਾਲੀ ਵਿੱਚ ਰਸਤਾ ਲੱਭਣਾ ਸੌਖਾ ਹੋਵੇ ਅਤੇ ਐਮਰਜੈਂਸੀ ਵਿਭਾਗਾਂ ਤੇ ਹਸਪਤਾਲਾਂ ਵਿੱਚ ਬੇਲੋੜੇ ਜਾਣ ਦੀ ਲੋੜ ਘਟਾਈ ਜਾ ਸਕੇ।
ਇਸ ਫੰਡ ਲਈ ਮੁੱਢਲੀਆਂ ਸਿਹਤ ਸੇਵਾਵਾਂ ਦੇ ਨੈੱਟਵਰਕਾਂ, ਸਿਹਤ ਪ੍ਰਣਾਲੀ ਨਾਲ ਜੁੜੀਆਂ ਸੰਸਥਾਵਾਂ, ਨਗਰਪਾਲਿਕਾਵਾਂ, ਮੂਲਵਾਸੀ ਸੰਸਥਾਵਾਂ, ਉੱਚ ਸਿੱਖਿਆ ਸੰਸਥਾਵਾਂ, ਗੈਰ-ਮੁਨਾਫ਼ਾ ਸੰਗਠਨਾਂ ਅਤੇ ਯੋਗ ਨਿੱਜੀ ਖੇਤਰ ਦੇ ਭਾਈਵਾਲਾਂ ਸਮੇਤ ਕਈ ਸੰਸਥਾਵਾਂ ਅਰਜ਼ੀਆਂ ਦੇ ਸਕਣਗੀਆਂ।ਫੰਡ ਦੇ ਪਹਿਲੇ ਪੜਾਅ ਅਧੀਨ ਸ਼ੁਰੂ ਕੀਤੇ ਪ੍ਰਾਜੈਕਟਾਂ ਦੇ ਨਤੀਜੇ ਸਾਹਮਣੇ ਆਉਣ ਲੱਗੇ ਹਨ। ਪ੍ਰੈਕਸਸ ਹੈਲਥ ਨੇ ਆਪਣੇ ‘ਇਨੋਵੇਟਹੈਲਥ’ ਸਿਖਲਾਈ ਪ੍ਰੋਗਰਾਮ ਰਾਹੀਂ 200 ਤੋਂ ਵੱਧ ਮੁੱਢਲੀਆਂ ਸਿਹਤ ਸੇਵਾਵਾਂ ਦੇਣ ਵਾਲੀਆਂ ਟੀਮਾਂ ਨੂੰ ਨਵੇਂ ਵਿਚਾਰਾਂ ਨੂੰ ਅਮਲੀ ਰੂਪ ਦੇਣ ਅਤੇ ਮਰੀਜ਼ਾਂ ਦੀ ਦੇਖਭਾਲ ਵਿੱਚ ਸੁਧਾਰ ਕਰਨ ਲਈ ਸਿਖਲਾਈ ਤੇ ਸਾਧਨ ਮੁਹੱਈਆ ਕਰਵਾਏ ਹਨ।
ਇਸੇ ਤਰ੍ਹਾਂ, ਆਰਥਰਾਈਟਿਸ ਸੋਸਾਇਟੀ ਕੈਨੇਡਾ ਨੇ ਬਿਹਤਰ ਪੋਰਟੇਬਲ ਅਲਟਰਾਸਾਊਂਡ ਤਕਨੀਕ ਦੀ ਵਰਤੋਂ ਕਰਦਿਆਂ 130 ਨਵਜੰਮੇ ਬੱਚਿਆਂ ਦੀ ਜਾਂਚ ਕੀਤੀ ਹੈ, ਤਾਂ ਜੋ ਕਮਰ ਦੇ ਜੋੜਾਂ ਦੇ ਵਿਕਾਸ ਵਿੱਚ ਨੁਕਸ ਦਾ ਛੇਤੀ ਪਤਾ ਲਗਾ ਕੇ ਭਵਿੱਖ ਵਿੱਚ ਜੋੜਾਂ ਨੂੰ ਹੋਣ ਵਾਲੇ ਨੁਕਸਾਨ ਦਾ ਖ਼ਤਰਾ ਘਟਾਇਆ ਜਾ ਸਕੇ। ਯੂਨੀਵਰਸਿਟੀ ਆਫ਼ ਅਲਬਰਟਾ ਨੇ ਸੂਬੇ ਦੇ 28 ਭਾਈਚਾਰਿਆਂ ਵਿੱਚ ਮਰੀਜ਼ਾਂ ਨੂੰ 630 ਤੋਂ ਵੱਧ ਆਨਲਾਈਨ ਡਾਕਟਰੀ ਸਲਾਹ-ਮਸ਼ਵਰੇ ਮੁਹੱਈਆ ਕਰਵਾਏ ਹਨ। ਇਸ ਰਾਹੀਂ ਔਰਤਾਂ ਨੂੰ ਪੇਰੀਮੈਨੋਪੌਜ਼ ਅਤੇ ਮੈਨੋਪੌਜ਼ ਨਾਲ ਸਬੰਧਤ ਮਾਹਿਰ ਸਿਹਤ ਸੇਵਾਵਾਂ ਆਪਣੇ ਘਰਾਂ ਦੇ ਨੇੜੇ ਹੀ ਮਿਲ ਸਕੀਆਂ ਹਨ।2026-27 ਦੇ ਪ੍ਰੋਗਰਾਮ ਤਹਿਤ ਦੋ ਸ਼੍ਰੇਣੀਆਂ ਵਿੱਚ ਫੰਡਿੰਗ ਦਿੱਤੀ ਜਾਵੇਗੀ। ਇਨ੍ਹਾਂ ਵਿੱਚ ਮੁੱਢਲੀਆਂ ਸਿਹਤ ਸੇਵਾਵਾਂ ਵਿੱਚ ਨਵੀਨਤਾ ਅਤੇ ਸਿਹਤ ਸਮਾਨਤਾ ਤੇ ਬਿਮਾਰੀਆਂ ਦੀ ਰੋਕਥਾਮ ਸ਼ਾਮਲ ਹਨ। ਇਸ ਰਾਹੀਂ ਸੰਸਥਾਵਾਂ, ਸਿਹਤ ਸੇਵਾ ਪ੍ਰਦਾਤਾਵਾਂ ਅਤੇ ਭਾਈਚਾਰਕ ਭਾਈਵਾਲਾਂ ਨੂੰ ਨਵੇਂ ਤਰੀਕਿਆਂ ਦੀ ਜਾਂਚ ਕਰਨ, ਉਨ੍ਹਾਂ ਨੂੰ ਵਿਕਸਤ ਕਰਨ ਅਤੇ ਸਫ਼ਲ ਪ੍ਰਾਜੈਕਟਾਂ ਦਾ ਦਾਇਰਾ ਵਧਾਉਣ ਦਾ ਮੌਕਾ ਮਿਲੇਗਾ।ਸਰਕਾਰ ਅਨੁਸਾਰ, ਪ੍ਰਾਇਮਰੀ ਕੇਅਰ ਇਨੋਵੇਸ਼ਨ ਫੰਡ ਦੇ ਅਗਲੇ ਪੜਾਅ ਲਈ ਅਰਜ਼ੀਆਂ ਦੇਣ ਦੀ ਆਖ਼ਰੀ ਮਿਤੀ 2 ਨਵੰਬਰ ਹੈ।
