ਅਲਬਰਟਾ ਦੇ ਅਜਾਇਬ ਘਰਾਂ ਅਤੇ ਇਤਿਹਾਸਕ ਸਥਾਨਾਂ 'ਤੇ ਗਰਮੀਆਂ ਦੌਰਾਨ ਮਿਲੇਗੀ ਮੁਫ਼ਤ ਅਤੇ ਰਿਆਇਤੀ ਐਂਟਰੀ
ਐਡਮੰਟਨ: ਅਲਬਰਟਾ ਸਰਕਾਰ ਨੇ ਗਰਮੀਆਂ ਦੀਆਂ ਛੁੱਟੀਆਂ ਦੌਰਾਨ ਪਰਿਵਾਰਾਂ ਅਤੇ ਨੌਜਵਾਨਾਂ ਲਈ ਸੂਬੇ ਦੇ ਅਜਾਇਬ ਘਰਾਂ ਅਤੇ ਇਤਿਹਾਸਕ ਸਥਾਨਾਂ ਦੀ ਸੈਰ ਹੋਰ ਸਸਤੀ ਬਣਾਉਣ ਦਾ ਐਲਾਨ ਕੀਤਾ ਹੈ। "ਕੈਨੇਡਾ ਸਟਰਾਂਗ ਪਾਸ" ਪ੍ਰੋਗਰਾਮ ਤਹਿਤ ਬੱਚਿਆਂ ਅਤੇ ਨੌਜਵਾਨਾਂ ਨੂੰ ਮੁਫ਼ਤ ਅਤੇ ਰਿਆਇਤੀ ਦਾਖ਼ਲਾ ਦਿੱਤਾ ਜਾਵੇਗਾ।ਪ੍ਰੋਗਰਾਮ ਦੇ ਅਧੀਨ 17 ਸਾਲ ਜਾਂ ਇਸ ਤੋਂ ਘੱਟ ਉਮਰ ਦੇ ਬੱਚਿਆਂ ਅਤੇ ਕਿਸ਼ੋਰਾਂ ਲਈ ਅਲਬਰਟਾ ਦੇ ਸਾਰੇ ਸੂਬਾਈ ਅਜਾਇਬ ਘਰਾਂ ਅਤੇ ਇਤਿਹਾਸਕ ਸਥਾਨਾਂ 'ਤੇ ਦਾਖ਼ਲਾ ਪੂਰੀ ਤਰ੍ਹਾਂ ਮੁਫ਼ਤ ਹੋਵੇਗਾ, ਜਦਕਿ 18 ਤੋਂ 24 ਸਾਲ ਦੀ ਉਮਰ ਦੇ ਨੌਜਵਾਨਾਂ ਨੂੰ ਟਿਕਟਾਂ 'ਤੇ 50 ਫ਼ੀਸਦੀ ਛੂਟ ਦਿੱਤੀ ਜਾਵੇਗੀ।ਸਰਕਾਰ ਨੇ ਦੱਸਿਆ ਕਿ ਇਸ ਯੋਜਨਾ ਤਹਿਤ ਦੌਰਿਆਂ ਦੀ ਕੋਈ ਸੀਮਾ ਨਹੀਂ ਹੋਵੇਗੀ। ਸੈਲਾਨੀ ਪ੍ਰੋਗਰਾਮ ਦੀ ਮਿਆਦ ਦੌਰਾਨ ਆਪਣੀ ਪਸੰਦ ਦੇ ਅਜਾਇਬ ਘਰਾਂ ਅਤੇ ਇਤਿਹਾਸਕ ਸਥਾਨਾਂ 'ਤੇ ਵਾਰ-ਵਾਰ ਜਾ ਸਕਣਗੇ। ਇਸ ਪਹਿਲ ਦਾ ਮਕਸਦ ਨੌਜਵਾਨਾਂ ਅਤੇ ਪਰਿਵਾਰਾਂ ਨੂੰ ਅਲਬਰਟਾ ਦੇ ਇਤਿਹਾਸ, ਸੱਭਿਆਚਾਰ ਅਤੇ ਵਿਰਾਸਤ ਨਾਲ ਜੋੜਨਾ ਹੈ।
ਟੂਰਿਜ਼ਮ ਅਤੇ ਖੇਡ ਮੰਤਰੀ ਐਂਡਰੂ ਬੋਇਚੇਂਕੋ ਨੇ ਕਿਹਾ ਕਿ ਅਲਬਰਟਾ ਦੇ ਅਜਾਇਬ ਘਰ ਅਤੇ ਇਤਿਹਾਸਕ ਸਥਾਨ ਸੂਬੇ ਦੇ ਇਤਿਹਾਸ ਨੂੰ ਜੀਵੰਤ ਰੂਪ ਵਿੱਚ ਪੇਸ਼ ਕਰਦੇ ਹਨ। ਉਨ੍ਹਾਂ ਕਿਹਾ ਕਿ ਕੈਨੇਡਾ ਸਟਰਾਂਗ ਪਾਸ ਰਾਹੀਂ ਸਰਕਾਰ ਪਰਿਵਾਰਾਂ ਅਤੇ ਨੌਜਵਾਨਾਂ ਲਈ ਅਲਬਰਟਾ ਦੀ ਵਿਰਾਸਤ ਨੂੰ ਨੇੜਿਓਂ ਜਾਣਨ ਅਤੇ ਸੂਬੇ ਦੀ ਵਿਲੱਖਣ ਪਛਾਣ ਦਾ ਜਸ਼ਨ ਮਨਾਉਣ ਦਾ ਮੌਕਾ ਹੋਰ ਆਸਾਨ ਬਣਾ ਰਹੀ ਹੈ।ਇਸ ਯੋਜਨਾ ਰਾਹੀਂ ਅਲਬਰਟਾ ਵਾਸੀਆਂ ਦੇ ਨਾਲ-ਨਾਲ ਹੋਰ ਸੂਬਿਆਂ ਤੋਂ ਆਉਣ ਵਾਲੇ ਸੈਲਾਨੀਆਂ ਨੂੰ ਵੀ ਸੂਬੇ ਦੇ ਪ੍ਰਮੁੱਖ ਸੈਰ-ਸਪਾਟਾ ਸਥਾਨਾਂ ਦਾ ਅਨੁਭਵ ਕਰਨ ਦਾ ਮੌਕਾ ਮਿਲੇਗਾ। ਉੱਤਰੀ ਅਲਬਰਟਾ ਦੇ ਹਿਸਟੋਰਿਕ ਡਨਵੇਗਨ ਤੋਂ ਲੈ ਕੇ ਦੱਖਣੀ ਅਲਬਰਟਾ ਦੇ ਫਰੈਂਕ ਸਲਾਈਡ ਇੰਟਰਪ੍ਰੇਟਿਵ ਸੈਂਟਰ ਤੱਕ ਕਈ ਇਤਿਹਾਸਕ ਸਥਾਨ ਇਸ ਯੋਜਨਾ ਦਾ ਹਿੱਸਾ ਹਨ।
ਸੂਬੇ ਦੇ ਅਜਾਇਬ ਘਰਾਂ ਅਤੇ ਇਤਿਹਾਸਕ ਸਥਾਨਾਂ 'ਤੇ ਇੰਟਰਐਕਟਿਵ ਪ੍ਰਦਰਸ਼ਨੀਆਂ, ਵਿਸ਼ੇਸ਼ ਸਮਾਗਮਾਂ ਅਤੇ ਮੌਸਮੀ ਗਤੀਵਿਧੀਆਂ ਰਾਹੀਂ ਦਰਸ਼ਕਾਂ ਨੂੰ ਸਿੱਖਣ ਅਤੇ ਮਨੋਰੰਜਨ ਦਾ ਵਿਲੱਖਣ ਤਜਰਬਾ ਮਿਲੇਗਾ।ਰਾਇਲ ਅਲਬਰਟਾ ਮਿਊਜ਼ੀਅਮ ਦੀ ਕਾਰਜਕਾਰੀ ਡਾਇਰੈਕਟਰ ਮੇਘਨ ਪੈਟਰਸਨ ਨੇ ਕਿਹਾ ਕਿ ਸੰਸਥਾ ਨੂੰ ਇਸ ਸਾਲ ਵੀ ਕੈਨੇਡਾ ਸਟਰਾਂਗ ਪਾਸ ਦਾ ਹਿੱਸਾ ਬਣ ਕੇ ਖੁਸ਼ੀ ਹੈ। ਉਨ੍ਹਾਂ ਕਿਹਾ ਕਿ ਇਸ ਨਾਲ ਹੋਰ ਪਰਿਵਾਰਾਂ ਅਤੇ ਨੌਜਵਾਨਾਂ ਨੂੰ ਮੁਫ਼ਤ ਜਾਂ ਰਿਆਇਤੀ ਦਾਖ਼ਲੇ ਰਾਹੀਂ ਅਲਬਰਟਾ ਦੀਆਂ ਅਮੀਰ ਅਤੇ ਵਿਭਿੰਨ ਕਹਾਣੀਆਂ ਨੂੰ ਜਾਣਨ ਦਾ ਮੌਕਾ ਮਿਲੇਗਾ।ਉਨ੍ਹਾਂ ਕਿਹਾ ਕਿ ਅਜਾਇਬ ਘਰ ਸਾਨੂੰ ਆਪਣੇ ਇਤਿਹਾਸ, ਰਚਨਾਤਮਕਤਾ, ਵਿਚਾਰਾਂ ਅਤੇ ਉਹਨਾਂ ਕਹਾਣੀਆਂ ਨਾਲ ਜੋੜਦੇ ਹਨ ਜੋ ਕੈਨੇਡਾ ਦੀ ਪਛਾਣ ਬਣਾਉਂਦੀਆਂ ਹਨ। ਕੈਨੇਡਾ ਸਟਰਾਂਗ ਪਾਸ ਨਾਲ ਹੋਰ ਵੱਧ ਲੋਕ ਸੱਭਿਆਚਾਰਕ ਤਜਰਬਿਆਂ ਦਾ ਆਨੰਦ ਮਾਣ ਸਕਣਗੇ ਅਤੇ ਨਾਲ ਹੀ ਆਪਣੇ ਪੈਸਿਆਂ ਦੀ ਵੀ ਬਚਤ ਕਰ ਸਕਣਗੇ।
