ਤੇਲ ਸਪਲਾਈ ਸੰਕਟ ਵਿਚ ਭਾਰਤ ਲਈ ਰਾਹਤ, ਰੂਸ ਭੇਜੇਗਾ 9.5 ਮਿਲੀਅਨ ਬੈਰਲ ਕੱਚਾ ਤੇਲ
ਮਾਸਕੋ-ਮੱਧ-ਪੂਰਬ ਸੰਕਟ ਦੇ ਕਾਰਨ ਭਾਰਤ ਕੋਲ ਇਸ ਵੇਲੇ ਸਿਰਫ਼ ਕਰੀਬ 25 ਦਿਨਾਂ ਦੀ ਮੰਗ ਪੂਰੀ ਕਰਨ ਜਿਤਨਾ ਕੱਚਾ ਤੇਲ ਮੌਜੂਦ ਹੈ। ਇਸਦੇ ਨਾਲ ਹੀ ਗੈਸੋਇਲ, ਪੈਟਰੋਲ ਅਤੇ ਐਲਪੀਜੀ ਦੇ ਭੰਡਾਰ ਵੀ ਘੱਟ ਹੋ ਰਹੇ ਹਨ। ਐਸੇ ਸਮੇਂ ਰੂਸ ਨੇ ਐਲਾਨ ਕੀਤਾ ਹੈ ਕਿ ਉਹ ਭਾਰਤ ਵੱਲ ਤੇਲ ਦੀ ਸਪਲਾਈ ਵਧਾਉਣ ਲਈ ਤਿਆਰ ਹੈ, ਤਾਂ ਜੋ ਮੱਧ-ਪੂਰਬ ਤੋਂ ਆ ਰਹੀ ਸਪਲਾਈ ਵਿੱਚ ਆਈ ਰੁਕਾਵਟ ਨੂੰ ਪੂਰਾ ਕੀਤਾ ਜਾ ਸਕੇ।
ਲਗਭਗ 9.5 ਮਿਲੀਅਨ ਬੈਰਲ ਰੂਸੀ ਕੱਚਾ ਤੇਲ ਇਸ ਸਮੇਂ ਜਹਾਜ਼ਾਂ ਵਿੱਚ ਭਰਿਆ ਹੋਇਆ ਭਾਰਤੀ ਪਾਣੀਆਂ ਦੇ ਨੇੜੇ ਮੌਜੂਦ ਹੈ, ਜੋ ਕੁਝ ਹਫ਼ਤਿਆਂ ਵਿੱਚ ਭਾਰਤ ਪਹੁੰਚ ਸਕਦਾ ਹੈ।
ਇੱਕ ਉਦਯੋਗਿਕ ਸਰੋਤ ਨੇ ਦੱਸਿਆ ਕਿ ਰੂਸ ਭਾਰਤ ਦੀ ਲਗਭਗ 40 ਫੀਸਦੀ ਕੱਚੇ ਤੇਲ ਦੀ ਲੋੜ ਪੂਰੀ ਕਰਨ ਲਈ ਤਿਆਰ ਹੈ। ਭਾਰਤ ਦੀਆਂ ਰਿਫ਼ਾਈਨਰੀਆਂ ਹਰ ਰੋਜ਼ ਲਗਭਗ 5.6 ਮਿਲੀਅਨ ਬੈਰਲ ਕੱਚਾ ਤੇਲ ਪ੍ਰੋਸੈਸ ਕਰਦੀਆਂ ਹਨ।
ਇਸ ਦਰਮਿਆਨ ਹੋਰਮੁਜ਼ ਦੇ ਸਮੁੰਦਰੀ ਰਸਤੇ ’ਤੇ ਇਰਾਨੀ ਹਮਲਿਆਂ ਕਾਰਨ ਜਹਾਜ਼ਾਂ ਦੀ ਆਵਾਜਾਈ ਪ੍ਰਭਾਵਿਤ ਹੋ ਗਈ ਹੈ। ਇਹ ਰਸਤਾ ਦੁਨੀਆ ਦਾ ਸਭ ਤੋਂ ਮਹੱਤਵਪੂਰਨ ਤੇਲ ਨਿਰਯਾਤ ਮਾਰਗ ਮੰਨਿਆ ਜਾਂਦਾ ਹੈ, ਜਿਸ ਰਾਹੀਂ ਭਾਰਤ ਦੇ ਲਗਭਗ 40 ਫੀਸਦੀ ਤੇਲ ਆਯਾਤ ਹੁੰਦੇ ਹਨ।
ਰੂਸ ਨੇ ਇਹ ਵੀ ਕਿਹਾ ਹੈ ਕਿ ਉਹ ਭਾਰਤ ਨੂੰ ਤਰਲ ਕੁਦਰਤੀ ਗੈਸ (LNG) ਵੀ ਵੇਚਣ ਲਈ ਤਿਆਰ ਹੈ, ਕਿਉਂਕਿ ਕਤਰ ਨੇ ਸੰਘਰਸ਼ ਕਾਰਨ ਉਤਪਾਦਨ ਰੋਕ ਦਿੱਤਾ ਹੈ।
ਚੀਨ ਅਤੇ ਭਾਰਤ ਦੋਵੇਂ ਆਪਣੀ ਲਗਭਗ ਅੱਧੀ ਤੇਲ ਦੀ ਲੋੜ ਮੱਧ-ਪੂਰਬ ਤੋਂ ਪੂਰੀ ਕਰਦੇ ਹਨ, ਪਰ ਭਾਰਤ ਕੋਲ ਚੀਨ ਦੇ ਮੁਕਾਬਲੇ ਘੱਟ ਭੰਡਾਰ ਹਨ, ਜਿਸ ਕਾਰਨ ਉਹ ਸਪਲਾਈ ਸੰਕਟ ਲਈ ਹੋਰ ਜ਼ਿਆਦਾ ਨਾਜ਼ੁਕ ਮੰਨਿਆ ਜਾ ਰਿਹਾ ਹੈ।
