ਵਾਈਟਕੋਰਟ ਵਿੱਚ ਜੰਗਲਾਤ ਖੇਤਰ ਦੇ ਵਿਸਥਾਰ ਲਈ ਅਲਬਰਟਾ ਸਰਕਾਰ ਦਾ 1.5 ਮਿਲੀਅਨ ਡਾਲਰ ਤੋਂ ਵੱਧ ਨਿਵੇਸ਼
ਅਲਬਰਟਾ-ਅਲਬਰਟਾ ਸਰਕਾਰ ਨੇ ਇਨਵੈਸਟਮੈਂਟ ਐਂਡ ਗ੍ਰੋਥ ਫੰਡ ਰਾਹੀਂ ਵਾਈਟਕੋਰਟ ਸਥਿਤ ਅਲਬਰਟਾ ਨਿਊਜ਼ਪ੍ਰਿੰਟ ਕੰਪਨੀ ਦੇ ਵਿਸਥਾਰ ਲਈ 1.5 ਮਿਲੀਅਨ ਡਾਲਰ ਤੋਂ ਵੱਧ ਦੀ ਵਿੱਤੀ ਸਹਾਇਤਾ ਦਾ ਐਲਾਨ ਕੀਤਾ ਹੈ। ਲਗਭਗ 50 ਮਿਲੀਅਨ ਡਾਲਰ ਦੇ ਇਸ ਪ੍ਰੋਜੈਕਟ ਨਾਲ ਕੰਪਨੀ ਦੀ ਮੌਜੂਦਾ ਸਹੂਲਤ ਨੂੰ ਆਧੁਨਿਕ ਬਣਾਇਆ ਜਾਵੇਗਾ ਅਤੇ ਵੱਖ-ਵੱਖ ਕਿਸਮਾਂ ਦੇ ਕਾਗਜ਼ ਤਿਆਰ ਕਰਨ ਦੀ ਸਮਰੱਥਾ ਵਧੇਗੀ।ਸਰਕਾਰ ਮੁਤਾਬਕ ਇਸ ਵਿਸਥਾਰ ਨਾਲ 13 ਪੱਕੀਆਂ ਫੁੱਲ-ਟਾਈਮ ਨੌਕਰੀਆਂ ਅਤੇ 25 ਅਸਥਾਈ ਨਿਰਮਾਣ ਨੌਕਰੀਆਂ ਪੈਦਾ ਹੋਣਗੀਆਂ। ਇਸ ਦੇ ਨਾਲ ਹੀ ਕੰਪਨੀ ਵਿੱਚ ਮੌਜੂਦਾ 220 ਤੋਂ ਵੱਧ ਨੌਕਰੀਆਂ ਨੂੰ ਬਣਾਈ ਰੱਖਣ ਵਿੱਚ ਵੀ ਮਦਦ ਮਿਲੇਗੀ।
ਪ੍ਰੋਜੈਕਟ ਰਾਹੀਂ ਕੰਪਨੀ ਨੂੰ ਉੱਚ ਮੁੱਲ ਵਾਲੇ ਕਾਗਜ਼ੀ ਉਤਪਾਦ ਤਿਆਰ ਕਰਨ ਅਤੇ ਬਦਲਦੇ ਬਾਜ਼ਾਰ ਵਿੱਚ ਵਧੇਰੇ ਮੁਕਾਬਲਾ ਕਰਨ ਦੇ ਯੋਗ ਬਣਾਉਣ ਦਾ ਟੀਚਾ ਹੈ। ਸਰਕਾਰ ਦਾ ਕਹਿਣਾ ਹੈ ਕਿ ਇਹ ਨਿਵੇਸ਼ ਪੇਂਡੂ ਭਾਈਚਾਰਿਆਂ ਵਿੱਚ ਰੁਜ਼ਗਾਰ ਨੂੰ ਮਜ਼ਬੂਤ ਕਰਨ ਦੇ ਨਾਲ ਸੂਬੇ ਦੇ ਜੰਗਲਾਤ ਉਦਯੋਗ ਨੂੰ ਵੀ ਹੋਰ ਮਜ਼ਬੂਤੀ ਦੇਵੇਗਾ।ਰੁਜ਼ਗਾਰ, ਅਰਥਵਿਵਸਥਾ, ਵਪਾਰ ਅਤੇ ਇਮੀਗ੍ਰੇਸ਼ਨ ਮੰਤਰੀ ਜੋਸਫ਼ ਸ਼ੋਅ ਨੇ ਕਿਹਾ ਕਿ ਵਾਈਟਕੋਰਟ ਵਿੱਚ ਅਲਬਰਟਾ ਨਿਊਜ਼ਪ੍ਰਿੰਟ ਕੰਪਨੀ ਦਾ ਵਿਸਥਾਰ ਜੰਗਲਾਤ ਖੇਤਰ ਨੂੰ ਮਜ਼ਬੂਤ ਕਰਨ ਦੇ ਨਾਲ ਪੇਂਡੂ ਖੇਤਰਾਂ ਵਿੱਚ ਰੁਜ਼ਗਾਰ ਦੇ ਮੌਕੇ ਵਧਾਏਗਾ।
ਜੰਗਲਾਤ ਅਤੇ ਪਾਰਕਸ ਮੰਤਰੀ ਟੌਡ ਲੋਵਨ ਨੇ ਕਿਹਾ ਕਿ ਅਲਬਰਟਾ ਦਾ ਜੰਗਲਾਤ ਉਦਯੋਗ ਪੇਂਡੂ ਅਤੇ ਉੱਤਰੀ ਭਾਈਚਾਰਿਆਂ ਵਿੱਚ ਹਜ਼ਾਰਾਂ ਨੌਕਰੀਆਂ ਨੂੰ ਸਹਾਰਾ ਦਿੰਦਾ ਹੈ। ਉਨ੍ਹਾਂ ਮੁਤਾਬਕ ਅਜਿਹੇ ਨਿਵੇਸ਼ ਨਾਲ ਮਿੱਲਾਂ, ਕਾਮਿਆਂ ਅਤੇ ਉਨ੍ਹਾਂ ’ਤੇ ਨਿਰਭਰ ਭਾਈਚਾਰਿਆਂ ਸਮੇਤ ਪੂਰੇ ਖੇਤਰ ਨੂੰ ਲਾਭ ਮਿਲਦਾ ਹੈ।ਅਲਬਰਟਾ ਨਿਊਜ਼ਪ੍ਰਿੰਟ ਕੰਪਨੀ ਸੂਬੇ ਦੀ ਇਕਲੌਤੀ ਨਿਊਜ਼ਪ੍ਰਿੰਟ ਮਿੱਲ ਹੈ। ਇਹ ਅਲਬਰਟਾ ਦੀ ਲੱਕੜ ਤੋਂ ਪ੍ਰਾਪਤ ਫਾਈਬਰ ਨੂੰ ਕਾਗਜ਼ੀ ਉਤਪਾਦਾਂ ਵਿੱਚ ਤਬਦੀਲ ਕਰਦੀ ਹੈ ਅਤੇ ਸੂਬੇ ਦੀ ਜੰਗਲਾਤ ਸਪਲਾਈ ਚੇਨ ਵਿੱਚ ਅਹਿਮ ਭੂਮਿਕਾ ਨਿਭਾਉਂਦੀ ਹੈ। ਮਿੱਲ ਦੇ ਆਧੁਨਿਕੀਕਰਨ ਨਾਲ ਕੰਪਨੀ ਦੀ ਮੁਕਾਬਲੇਬਾਜ਼ੀ ਵਧਣ ਅਤੇ ਜੰਗਲਾਤ ਉਦਯੋਗ ਨੂੰ ਹੋਰ ਮਜ਼ਬੂਤ ਬਣਾਉਣ ਦੀ ਉਮੀਦ ਹੈ।ਵੈਸਟ ਯੈਲੋਹੈੱਡ ਦੇ ਵਿਧਾਇਕ ਮਾਰਟਿਨ ਲੌਂਗ ਨੇ ਕਿਹਾ ਕਿ ਇਹ ਵਿਸਥਾਰ ਵਾਈਟਕੋਰਟ ਵਿੱਚ ਸਥਾਨਕ ਨੌਕਰੀਆਂ ਨੂੰ ਸੁਰੱਖਿਅਤ ਕਰਨ, ਲੰਮੇ ਸਮੇਂ ਦੇ ਵਿਕਾਸ ਨੂੰ ਉਤਸ਼ਾਹਿਤ ਕਰਨ ਅਤੇ ਕੰਪਨੀ ਨੂੰ ਭਵਿੱਖ ਵਿੱਚ ਮੁਕਾਬਲੇਯੋਗ ਬਣਾਈ ਰੱਖਣ ਵਿੱਚ ਮਦਦ ਕਰੇਗਾ।ਕੰਪਨੀ ਦੇ ਜਨਰਲ ਮੈਨੇਜਰ ਮਾਈਕ ਪੁਟਜ਼ਕੇ ਨੇ ਕਿਹਾ ਕਿ ਸਰਕਾਰੀ ਨਿਵੇਸ਼ ਨਾਲ ਵਾਈਟਕੋਰਟ ਸਹੂਲਤ ਦੇ ਆਧੁਨਿਕੀਕਰਨ ਨੂੰ ਅੱਗੇ ਵਧਾਉਣ, ਉਤਪਾਦਾਂ ਵਿੱਚ ਵਿਭਿੰਨਤਾ ਲਿਆਉਣ ਅਤੇ ਪੇਂਡੂ ਅਲਬਰਟਾ ਵਿੱਚ ਚੰਗੀਆਂ ਤਨਖਾਹ ਵਾਲੀਆਂ ਨੌਕਰੀਆਂ ਨੂੰ ਸਹਾਰਾ ਦੇਣ ਵਿੱਚ ਮਦਦ ਮਿਲੇਗੀ।
ਮੁੱਖ ਅੰਕੜਿਆਂ ਮੁਤਾਬਕ, ਇਨਵੈਸਟਮੈਂਟ ਐਂਡ ਗ੍ਰੋਥ ਫੰਡ ਰਾਹੀਂ ਸਰਕਾਰ ਵੱਲੋਂ ਲਗਾਏ ਗਏ ਹਰ 1 ਡਾਲਰ ਦੇ ਪ੍ਰੋਗਰਾਮ ਫੰਡ ਨਾਲ ਲਗਭਗ 30 ਡਾਲਰ ਦਾ ਨਿੱਜੀ ਨਿਵੇਸ਼ ਆਕਰਸ਼ਿਤ ਹੋਇਆ ਹੈ। ਬਜਟ 2026 ਵਿੱਚ ਅਲਬਰਟਾ ਸਰਕਾਰ ਨੇ ਇਸ ਫੰਡ ਨੂੰ ਹੋਰ ਮਜ਼ਬੂਤ ਕਰਨ ਲਈ ਲਗਭਗ 28 ਮਿਲੀਅਨ ਡਾਲਰ ਰੱਖੇ ਹਨ।ਸਰਕਾਰ ਮੁਤਾਬਕ ਇਨ੍ਹਾਂ ਨਿਵੇਸ਼ਾਂ ਦਾ ਉਦੇਸ਼ ਨੌਕਰੀਆਂ ਪੈਦਾ ਕਰਨਾ, ਪੇਂਡੂ ਭਾਈਚਾਰਿਆਂ ਨੂੰ ਮਜ਼ਬੂਤ ਕਰਨਾ ਅਤੇ ਅਲਬਰਟਾ ਦੀ ਅਰਥਵਿਵਸਥਾ ਵਿੱਚ ਲੰਮੇ ਸਮੇਂ ਦਾ ਵਿਕਾਸ ਯਕੀਨੀ ਬਣਾਉਣਾ ਹੈ।
