ਅਲਬਰਟਾ ਅਗਲੇ 100 ਸਾਲਾਂ ਲਈ ਪਾਣੀ ਦੀ ਸੁਰੱਖਿਆ ਯਕੀਨੀ ਬਣਾਉਣ ਦੀ ਤਿਆਰੀ ਵਿੱਚ
ਅਲਬਰਟਾ-ਅਲਬਰਟਾ ਸਰਕਾਰ ਨੇ ਸੂਬੇ ਦੀਆਂ ਵਧਦੀਆਂ ਪਾਣੀ ਦੀਆਂ ਲੋੜਾਂ ਨੂੰ ਪੂਰਾ ਕਰਨ ਅਤੇ ਆਉਣ ਵਾਲੀਆਂ ਪੀੜ੍ਹੀਆਂ ਲਈ ਪਾਣੀ ਦੀ ਉਪਲਬਧਤਾ ਯਕੀਨੀ ਬਣਾਉਣ ਵਾਸਤੇ ਅਗਲੇ 100 ਸਾਲਾਂ ਦੀ ਵਾਟਰ ਸਕਿਓਰਿਟੀ ਯੋਜਨਾ ਤਿਆਰ ਕਰਨ ਦਾ ਕੰਮ ਸ਼ੁਰੂ ਕਰ ਦਿੱਤਾ ਹੈ।ਸਰਕਾਰ ਵੱਲੋਂ ਅਲਬਰਟਾ ਦੇ ਪਾਣੀ ਸਰੋਤਾਂ ਦੀ ਲੰਮੇ ਸਮੇਂ ਦੀ ਸੁਰੱਖਿਆ ਬਾਰੇ ਇੱਕ ਵਿਸਥਾਰਪੂਰਵਕ ਵ੍ਹਾਈਟ ਪੇਪਰ ਤਿਆਰ ਕਰਨ ਲਈ ਪ੍ਰਸਤਾਵ ਮੰਗੇ ਗਏ ਹਨ। ਇਸ ਅਧਿਐਨ ਵਿੱਚ ਪਾਣੀ ਦੀ ਉਪਲਬਧਤਾ ਵਧਾਉਣ, ਪਾਣੀ ਪ੍ਰਬੰਧਨ ਨੂੰ ਮਜ਼ਬੂਤ ਕਰਨ ਅਤੇ ਭਵਿੱਖ ਦੇ ਬੁਨਿਆਦੀ ਢਾਂਚੇ ਤੇ ਨਿਵੇਸ਼ ਸਬੰਧੀ ਫੈਸਲਿਆਂ ਲਈ ਨਵੀਆਂ ਸੰਭਾਵਨਾਵਾਂ ਦੀ ਜਾਂਚ ਕੀਤੀ ਜਾਵੇਗੀ।
ਵਾਤਾਵਰਣ ਅਤੇ ਸੁਰੱਖਿਅਤ ਖੇਤਰਾਂ ਦੇ ਮੰਤਰੀ ਗ੍ਰਾਂਟ ਹੰਟਰ ਨੇ ਕਿਹਾ ਕਿ ਪਾਣੀ ਅਲਬਰਟਾ ਦੇ ਭਵਿੱਖ ਦੀ ਬੁਨਿਆਦ ਹੈ। ਉਨ੍ਹਾਂ ਮੁਤਾਬਕ ਸੂਬੇ ਦੇ ਭਾਈਚਾਰਿਆਂ, ਖੇਤਾਂ ਅਤੇ ਉਦਯੋਗਾਂ ਦੇ ਵਿਕਾਸ ਲਈ ਭਰੋਸੇਯੋਗ ਪਾਣੀ ਸਪਲਾਈ ਯਕੀਨੀ ਬਣਾਉਣਾ ਜ਼ਰੂਰੀ ਹੈ ਅਤੇ ਸਰਕਾਰ ਹੁਣ ਤੋਂ ਹੀ ਅਗਲੇ 100 ਸਾਲਾਂ ਦੀਆਂ ਲੋੜਾਂ ਨੂੰ ਧਿਆਨ ਵਿੱਚ ਰੱਖ ਰਹੀ ਹੈ।ਵ੍ਹਾਈਟ ਪੇਪਰ ਵਿੱਚ ਪਾਣੀ ਸਟੋਰ ਕਰਨ ਅਤੇ ਇੱਕ ਥਾਂ ਤੋਂ ਦੂਜੀ ਥਾਂ ਪਹੁੰਚਾਉਣ ਵਾਲੇ ਬੁਨਿਆਦੀ ਢਾਂਚੇ ਦਾ ਵਿਸਥਾਰ, ਭੂ-ਜਲ ਦੀ ਬਿਹਤਰ ਵਰਤੋਂ, ਪਾਣੀ ਦੀ ਮਾਪ ਅਤੇ ਰਿਪੋਰਟਿੰਗ ਵਿੱਚ ਸੁਧਾਰ, ਨਵੀਂ ਮਾਡਲਿੰਗ ਅਤੇ ਭਵਿੱਖਬਾਣੀ ਤਕਨੀਕਾਂ ਅਤੇ ਪਾਣੀ ਪ੍ਰਬੰਧਨ ਨਾਲ ਸਬੰਧਤ ਨੀਤੀਆਂ ਦੀ ਵੀ ਜਾਂਚ ਕੀਤੀ ਜਾਵੇਗੀ।ਖੇਤੀਬਾੜੀ ਅਤੇ ਸਿੰਚਾਈ ਮੰਤਰੀ ਤਾਰਾ ਸਾਯਰ ਨੇ ਕਿਹਾ ਕਿ ਪਾਣੀ ਖੇਤੀਬਾੜੀ, ਵਧ ਰਹੇ ਭਾਈਚਾਰਿਆਂ ਅਤੇ ਅਰਥਵਿਵਸਥਾ ਲਈ ਬਹੁਤ ਮਹੱਤਵਪੂਰਨ ਹੈ। ਉਨ੍ਹਾਂ ਕਿਹਾ ਕਿ ਨਵੀਂ ਵ੍ਹਾਈਟ ਪੇਪਰ ਅਤੇ ਪਾਣੀ ਦੀ ਭਵਿੱਖਬਾਣੀ ਕਰਨ ਵਾਲੇ ਮਾਡਲ ਸਰਕਾਰ ਨੂੰ ਭਵਿੱਖ ਦੀਆਂ ਲੋੜਾਂ ਮੁਤਾਬਕ ਵਿਹਾਰਕ ਅਤੇ ਟਿਕਾਊ ਹੱਲ ਲੱਭਣ ਵਿੱਚ ਮਦਦ ਕਰਨਗੇ।
ਸਰਕਾਰ ਵੱਲੋਂ ਭਵਿੱਖ ਵਿੱਚ ਵੱਡੇ ਪਾਣੀ ਪ੍ਰੋਜੈਕਟਾਂ ਨੂੰ ਲਾਗੂ ਕਰਨ ਲਈ ਸੰਭਾਵਿਤ ਭਾਈਵਾਲੀਆਂ ਅਤੇ ਫੰਡਿੰਗ ਮਾਡਲਾਂ ਦੀ ਵੀ ਜਾਂਚ ਕੀਤੀ ਜਾਵੇਗੀ। ਹਾਲਾਂਕਿ ਵ੍ਹਾਈਟ ਪੇਪਰ ਵਿੱਚ ਸਾਹਮਣੇ ਆਉਣ ਵਾਲੇ ਸੁਝਾਅ ਆਪਣੇ ਆਪ ਪ੍ਰੋਜੈਕਟ ਨਹੀਂ ਬਣ ਜਾਣਗੇ। ਕਿਸੇ ਵੀ ਵੱਡੇ ਪ੍ਰੋਜੈਕਟ ’ਤੇ ਫੈਸਲਾ ਲੈਣ ਤੋਂ ਪਹਿਲਾਂ ਤਕਨੀਕੀ ਜਾਂਚ ਅਤੇ ਹੋਰ ਲੋੜੀਂਦੇ ਮੁਲਾਂਕਣ ਕੀਤੇ ਜਾਣਗੇ।ਟਰਾਂਸਪੋਰਟੇਸ਼ਨ ਅਤੇ ਇਕਨਾਮਿਕ ਕੋਰੀਡੋਰਜ਼ ਮੰਤਰੀ ਡੈਵਿਨ ਡ੍ਰੀਸ਼ਨ ਨੇ ਕਿਹਾ ਕਿ ਅਲਬਰਟਾ ਦੀ ਆਬਾਦੀ ਤੇਜ਼ੀ ਨਾਲ ਵਧ ਰਹੀ ਹੈ ਅਤੇ ਬੁਨਿਆਦੀ ਢਾਂਚੇ ਨੂੰ ਵੀ ਇਸ ਵਿਕਾਸ ਦੇ ਨਾਲ ਕਦਮ ਮਿਲਾ ਕੇ ਚੱਲਣਾ ਪਵੇਗਾ। ਉਨ੍ਹਾਂ ਮੁਤਾਬਕ ਆਉਣ ਵਾਲੀਆਂ ਪੀੜ੍ਹੀਆਂ ਲਈ ਭਰੋਸੇਯੋਗ ਪਾਣੀ ਸਪਲਾਈ ਵਾਸਤੇ ਹੁਣ ਤੋਂ ਯੋਜਨਾਬੰਦੀ ਕਰਨੀ ਜ਼ਰੂਰੀ ਹੈ।ਇਸ ਦੇ ਨਾਲ ਹੀ ਸਰਕਾਰ ਪਾਣੀ ਦੀ ਉਪਲਬਧਤਾ ਅਤੇ ਭਵਿੱਖ ਦੀ ਮੰਗ ਨੂੰ ਸਮਝਣ ਲਈ ਦੋ ਨਵੇਂ ਵਾਟਰ ਮਾਡਲਿੰਗ ਅਤੇ ਫੋਰਕਾਸਟਿੰਗ ਪ੍ਰੋਜੈਕਟਾਂ ’ਤੇ ਵੀ ਕੰਮ ਕਰ ਰਹੀ ਹੈ। ਕੇਰ ਵੁੱਡ ਲੀਡਲ ਐਸੋਸੀਏਟਸ ਲਿਮਟਿਡ ਵੱਲੋਂ ਸਾਊਥ ਸਸਕੈਚਵਨ ਰਿਵਰ ਬੇਸਿਨ ਲਈ ਪਾਣੀ ਦੀ ਮੰਗ ਦਾ ਮਾਡਲ ਤਿਆਰ ਕੀਤਾ ਜਾਵੇਗਾ, ਜਿਸ ਵਿੱਚ ਸ਼ਹਿਰੀ, ਸਿੰਚਾਈ, ਪਸ਼ੂ ਪਾਲਣ, ਉਦਯੋਗਿਕ ਅਤੇ ਵਪਾਰਕ ਵਰਤੋਂ ਨੂੰ ਸ਼ਾਮਲ ਕੀਤਾ ਜਾਵੇਗਾ।ਦੂਜੇ ਪਾਸੇ, ਐਕੁਐਂਟੀ ਇੰਕ. ਵੱਲੋਂ ਪੀਸ ਅਤੇ ਐਥਾਬਾਸਕਾ ਦਰਿਆ ਬੇਸਿਨਾਂ ਲਈ ਮੌਜੂਦਾ ਮਾਡਲਾਂ ਨੂੰ ਕਾਰਗਰ ਬਣਾਇਆ ਜਾਵੇਗਾ। ਇਸ ਨਾਲ ਉੱਤਰੀ ਅਲਬਰਟਾ ਵਿੱਚ ਪਾਣੀ ਦੀਆਂ ਸਥਿਤੀਆਂ ਬਾਰੇ ਤੁਰੰਤ, ਛੋਟੇ ਸਮੇਂ ਅਤੇ ਮੌਸਮੀ ਪੱਧਰ ’ਤੇ ਭਵਿੱਖਬਾਣੀ ਕਰਨ ਵਿੱਚ ਮਦਦ ਮਿਲੇਗੀ। ਦੋਵੇਂ ਪ੍ਰੋਜੈਕਟ ਮਾਰਚ 2027 ਤੱਕ ਪੂਰੇ ਹੋਣ ਦੀ ਉਮੀਦ ਹੈ।
ਮੁੱਖ ਅੰਕੜਿਆਂ ਮੁਤਾਬਕ, ਅਲਬਰਟਾ ਸਰਕਾਰ ਵ੍ਹਾਈਟ ਪੇਪਰ ਤਿਆਰ ਕਰਨ ਲਈ 2026-27 ਦੇ ਟੈਕਨਾਲੋਜੀ ਇਨੋਵੇਸ਼ਨ ਐਂਡ ਐਮੀਸ਼ਨਜ਼ ਰਿਡਕਸ਼ਨ ਰੈਗੂਲੇਸ਼ਨ ਦੇ ਵਾਟਰ-ਐਵੇਲੇਬਿਲਟੀ ਬਜਟ ਵਿੱਚੋਂ 400,000 ਡਾਲਰ ਖਰਚ ਕਰਨ ਦੀ ਯੋਜਨਾ ਬਣਾ ਰਹੀ ਹੈ। ਵ੍ਹਾਈਟ ਪੇਪਰ ਬਸੰਤ 2027 ਤੱਕ ਪੂਰਾ ਹੋਣ ਦੀ ਉਮੀਦ ਹੈ।ਸਰਕਾਰ ਨੇ ਕਿਹਾ ਕਿ ਇਸ ਪੂਰੀ ਯੋਜਨਾ ਵਿੱਚ Indigenous ਭਾਈਚਾਰਿਆਂ ਦੇ ਵਿਚਾਰਾਂ, ਸੰਧੀ ਅਧਿਕਾਰਾਂ ਅਤੇ ਅਲਬਰਟਾ ਦੀਆਂ ਪਾਣੀ ਸਬੰਧੀ ਅੰਤਰ-ਸੂਬਾਈ ਜ਼ਿੰਮੇਵਾਰੀਆਂ ਨੂੰ ਧਿਆਨ ਵਿੱਚ ਰੱਖਿਆ ਜਾਵੇਗਾ। ਸਰਕਾਰ ਸਥਾਨਕ ਪ੍ਰਸ਼ਾਸਨਾਂ, Indigenous ਭਾਈਚਾਰਿਆਂ, ਉਦਯੋਗਿਕ ਸੰਸਥਾਵਾਂ ਅਤੇ ਆਮ ਅਲਬਰਟਾਵਾਸੀਆਂ ਨਾਲ ਮਿਲ ਕੇ ਅਗਲੇ 100 ਸਾਲਾਂ ਲਈ ਪਾਣੀ ਦੀ ਸੁਰੱਖਿਆ ਬਾਰੇ ਰਣਨੀਤੀ ਤਿਆਰ ਕਰੇਗੀ।
