ਦੀਪਿਕਾ ਪਾਦੁਕੋਣ ਨੇ ਸਾਂਝੀ ਕੀਤੀ ਦੂਜੀ ਗਰਭ ਅਵਸਥਾ ਦੀ ਝਲਕ
ਮੁੰਬਈ: ਬਾਲੀਵੁੱਡ ਅਦਾਕਾਰਾ ਦੀਪਿਕਾ ਪਾਦੁਕੋਣ ਨੇ ਆਪਣੀ ਦੂਜੀ ਗਰਭ ਅਵਸਥਾ ਦੌਰਾਨ ਪਹਿਲੀ ਵਾਰ ਪ੍ਰਸ਼ੰਸਕਾਂ ਨਾਲ ਇੱਕ ਨਿੱਜੀ ਅਪਡੇਟ ਸਾਂਝੀ ਕੀਤੀ ਹੈ। ਸੋਸ਼ਲ ਮੀਡੀਆ 'ਤੇ ਘੱਟ ਸਰਗਰਮ ਰਹਿਣ ਵਾਲੀ ਦੀਪਿਕਾ ਨੇ ਇੰਸਟਾਗ੍ਰਾਮ ਸਟੋਰੀ ਰਾਹੀਂ ਤੀਜੇ ਤਿਮਾਹੀ (ਥਰਡ ਟ੍ਰਾਈਮੈਸਟਰ) ਵਿੱਚ ਆਉਣ ਵਾਲੀਆਂ ਮੁਸ਼ਕਲਾਂ ਬਾਰੇ ਇਸ਼ਾਰਾ ਕੀਤਾ।ਦੀਪਿਕਾ ਨੇ ਇੱਕ ਰੀਲ ਸਾਂਝੀ ਕੀਤੀ, ਜਿਸ ਵਿੱਚ ਇੱਕ ਗਰਭਵਤੀ ਮਹਿਲਾ ਰਾਤ ਨੂੰ ਵਾਰ-ਵਾਰ ਬਾਥਰੂਮ ਜਾਣ ਲਈ ਉੱਠਦੀ ਨਜ਼ਰ ਆ ਰਹੀ ਸੀ। ਇਸ ਰੀਲ ਨੂੰ ਸਾਂਝਾ ਕਰਦੇ ਹੋਏ ਉਨ੍ਹਾਂ ਨੇ ਉਲਟੇ ਮੁਸਕਰਾਉਂਦੇ ਚਿਹਰੇ ਵਾਲਾ ਇਮੋਜੀ ਲਗਾਇਆ, ਜਿਸ ਨਾਲ ਸੰਕੇਤ ਮਿਲਿਆ ਕਿ ਉਹ ਵੀ ਗਰਭ ਅਵਸਥਾ ਦੇ ਆਖ਼ਰੀ ਪੜਾਅ ਦੌਰਾਨ ਇਸ ਤਰ੍ਹਾਂ ਦੀਆਂ ਸਰੀਰਕ ਪਰੇਸ਼ਾਨੀਆਂ ਦਾ ਸਾਹਮਣਾ ਕਰ ਰਹੀ ਹੈ। ਦੀਪਿਕਾ ਦੀ ਇਸ ਪੋਸਟ ਤੋਂ ਬਾਅਦ ਪ੍ਰਸ਼ੰਸਕਾਂ ਨੇ ਉਨ੍ਹਾਂ ਨੂੰ ਵਧਾਈਆਂ ਅਤੇ ਸ਼ੁਭਕਾਮਨਾਵਾਂ ਦਿੱਤੀਆਂ। ਇੱਕ ਪ੍ਰਸ਼ੰਸਕ ਨੇ ਲਿਖਿਆ, "ਦੁਆ ਦਾ ਛੋਟਾ ਭੈਣ-ਭਰਾ ਜਲਦ ਆਉਣ ਵਾਲਾ ਹੈ। ਤੁਸੀਂ ਇਹ ਕਰ ਲਵੋਗੇ, ਦੀਪਿਕਾ।" ਜਦਕਿ ਹੋਰਾਂ ਨੇ ਵੀ ਉਨ੍ਹਾਂ ਦੀ ਚੰਗੀ ਸਿਹਤ ਅਤੇ ਸੁਖਦਾਈ ਡਿਲੀਵਰੀ ਦੀ ਕਾਮਨਾ ਕੀਤੀ।
ਦੀਪਿਕਾ ਪਾਦੁਕੋਣ ਅਤੇ ਉਨ੍ਹਾਂ ਦੇ ਪਤੀ ਰਣਵੀਰ ਸਿੰਘ ਨੇ ਇਸ ਸਾਲ ਆਪਣੇ ਦੂਜੇ ਬੱਚੇ ਦੇ ਆਉਣ ਦੀ ਖੁਸ਼ਖ਼ਬਰੀ ਪ੍ਰਸ਼ੰਸਕਾਂ ਨਾਲ ਸਾਂਝੀ ਕੀਤੀ ਸੀ। ਦੋਵਾਂ ਨੇ ਇੰਸਟਾਗ੍ਰਾਮ 'ਤੇ ਇੱਕ ਸਾਂਝੀ ਪੋਸਟ ਵਿੱਚ ਆਪਣੀ ਧੀ ਦੁਆ ਪਾਦੁਕੋਣ ਸਿੰਘ ਨਾਲ ਇਹ ਐਲਾਨ ਕੀਤਾ ਸੀ।ਸਾਲ 2024 ਵਿੱਚ ਦੋਵਾਂ ਪਹਿਲੀ ਵਾਰ ਮਾਤਾ-ਪਿਤਾ ਬਣੇ ਸਨ। ਧੀ ਦੁਆ ਦੇ ਪਹਿਲੇ ਜਨਮਦਿਨ 'ਤੇ ਉਨ੍ਹਾਂ ਨੇ ਉਸ ਦੀਆਂ ਕੁਝ ਤਸਵੀਰਾਂ ਵੀ ਪ੍ਰਸ਼ੰਸਕਾਂ ਨਾਲ ਸਾਂਝੀਆਂ ਕੀਤੀਆਂ ਸਨ।
ਇੱਕ ਇੰਟਰਵਿਊ ਦੌਰਾਨ ਦੀਪਿਕਾ ਨੇ ਕਿਹਾ ਸੀ ਕਿ ਮਾਂ ਬਣਨ ਤੋਂ ਬਾਅਦ ਉਹ ਪਹਿਲਾਂ ਨਾਲੋਂ ਵੱਧ ਧੀਰਜਵਾਨ ਅਤੇ ਸਮਾਜਿਕ ਹੋ ਗਈ ਹੈ। ਉਨ੍ਹਾਂ ਮੁਤਾਬਕ ਮਾਂ ਬਣਨ ਦਾ ਤਜਰਬਾ ਇਨਸਾਨ ਨੂੰ ਆਪਣੇ ਆਰਾਮਦਾਇਕ ਘੇਰੇ ਤੋਂ ਬਾਹਰ ਨਿਕਲ ਕੇ ਨਵੀਆਂ ਜ਼ਿੰਮੇਵਾਰੀਆਂ ਨਿਭਾਉਣ ਲਈ ਪ੍ਰੇਰਿਤ ਕਰਦਾ ਹੈ।
ਦੀਪਿਕਾ ਪਾਦੁਕੋਣ ਜਲਦ ਹੀ 'ਕਿੰਗ' ਫ਼ਿਲਮ ਵਿੱਚ ਨਜ਼ਰ ਆਉਣਗੀ, ਜਿਸ ਵਿੱਚ ਉਨ੍ਹਾਂ ਨਾਲ ਸ਼ਾਹਰੁਖ਼ ਖਾਨ, ਸੁਹਾਨਾ ਖਾਨ, ਅਭਿਸ਼ੇਕ ਬੱਚਨ, ਜੈਦੀਪ ਅਹਲਾਵਤ, ਰਾਘਵ ਜੁਆਲ ਅਤੇ ਅਰਸ਼ਦ ਵਾਰਸੀ ਵੀ ਅਹਿਮ ਭੂਮਿਕਾਵਾਂ ਵਿੱਚ ਹਨ। ਇਹ ਫ਼ਿਲਮ 24 ਦਸੰਬਰ 2026 ਨੂੰ ਸਿਨੇਮਾਘਰਾਂ ਵਿੱਚ ਰਿਲੀਜ਼ ਹੋਣੀ ਹੈ।ਇਸ ਤੋਂ ਇਲਾਵਾ, ਦੀਪਿਕਾ ਨਿਰਦੇਸ਼ਕ ਐਟਲੀ ਦੀ ਫ਼ਿਲਮ 'ਰਾਕਾ' ਵਿੱਚ ਵੀ ਨਜ਼ਰ ਆਏਗੀ, ਜਿਸ ਵਿੱਚ ਉਹ ਅੱਲੂ ਅਰਜੁਨ ਨਾਲ ਸਕ੍ਰੀਨ ਸਾਂਝੀ ਕਰੇਗੀ। ਫ਼ਿਲਹਾਲ ਇਸ ਫ਼ਿਲਮ ਦੀ ਸ਼ੂਟਿੰਗ ਜਾਰੀ ਹੈ।
