ਕੈਲਗਰੀ ਟ੍ਰਾਂਜ਼ਿਟ ਟਿਕਟ ਸਮਾਂ ਵਧਾਉਣ ਦਾ ਪ੍ਰਸਤਾਵ ਮਹਿੰਗਾ, 2 ਮਿਲੀਅਨ ਡਾਲਰ ਦਾ ਨੁਕਸਾਨ
ਕੈਲਗਰੀ-ਕੈਲਗਰੀ ਟ੍ਰਾਂਜ਼ਿਟ ਦੀ ਟਿਕਟ ਟ੍ਰਾਂਸਫਰ ਮਿਆਦ 90 ਮਿੰਟ ਤੋਂ ਵਧਾ ਕੇ 120 ਮਿੰਟ ਕਰਨ ਦੇ ਪ੍ਰਸਤਾਵ ਨਾਲ ਹਰ ਸਾਲ ਲਗਭਗ 2 ਮਿਲੀਅਨ ਡਾਲਰ ਦਾ ਨੁਕਸਾਨ ਹੋ ਸਕਦਾ ਹੈ। ਇਹ ਗੱਲ ਸ਼ਹਿਰ ਪ੍ਰਸ਼ਾਸਨ ਦੀ ਇਕ ਨਵੀਂ ਰਿਪੋਰਟ ‘ਚ ਸਾਹਮਣੇ ਆਈ ਹੈ, ਜੋ ਬੁੱਧਵਾਰ ਨੂੰ ਸਿਟੀ ਕੌਂਸਲ ਅੱਗੇ ਪੇਸ਼ ਕੀਤੀ ਜਾਣੀ ਹੈ।ਰਿਪੋਰਟ ਵਿੱਚ ਦੱਸਿਆ ਗਿਆ ਹੈ ਕਿ ਇਸ ਤਬਦੀਲੀ ਦਾ ਲਾਭ ਸਿਰਫ ਕਰੀਬ 2 ਫੀਸਦੀ ਯਾਤਰੀਆਂ ਨੂੰ ਹੀ ਮਿਲੇਗਾ। ਸ਼ਹਿਰ ਵੱਲੋਂ ਮੋਬਾਈਲ ਐਪ ਦੇ ਡਾਟਾ ਅਧਾਰ ‘ਤੇ ਕੀਤੀ ਗਈ ਜਾਂਚ ਵਿੱਚ ਪਤਾ ਲੱਗਾ ਕਿ 90 ਮਿੰਟ ਤੋਂ ਬਾਅਦ ਮੁੜ ਟਿਕਟ ਖਰੀਦਣ ਵਾਲੇ ਯਾਤਰੀਆਂ ਦੀ ਗਿਣਤੀ ਬਹੁਤ ਘੱਟ ਹੈ।311 ਸੇਵਾ ਰਾਹੀਂ ਵੀ ਲੋਕਾਂ ਦੀ ਰਾਏ ਲਈ ਗਈ, ਜਿਸ ‘ਚ 2022 ਤੋਂ 2026 ਤੱਕ ਸਿਰਫ 22 ਮੰਗਾਂ ਟ੍ਰਾਂਸਫਰ ਸਮਾਂ ਵਧਾਉਣ ਲਈ ਆਈਆਂ, ਜੋ ਕਿ ਲਗਭਗ ਹਰ ਸਾਲ 6 ਦੇ ਬਰਾਬਰ ਹਨ।
ਕੁੱਲ ਮਿਲਾ ਕੇ, ਇਸ ਤਬਦੀਲੀ ਨਾਲ ਲਾਭਾਨਵਿਤ ਹੋਣ ਵਾਲੀਆਂ ਯਾਤਰਾਵਾਂ ਦੀ ਗਿਣਤੀ ਸਾਲਾਨਾ 5 ਲੱਖ ਦੇ ਕਰੀਬ ਹੈ, ਜੋ ਕਿ ਕੁੱਲ ਯਾਤਰਾਵਾਂ ਦਾ ਸਿਰਫ 0.5 ਫੀਸਦੀ ਬਣਦਾ ਹੈ।ਰਿਪੋਰਟ ਮੁਤਾਬਕ, ਟ੍ਰਾਂਸਫਰ ਸਮਾਂ ਵਧਾਉਣ ਨਾਲ ਯਾਤਰੀਆਂ ਨੂੰ ਕੁਝ ਸੁਵਿਧਾ ਜ਼ਰੂਰ ਮਿਲੇਗੀ ਅਤੇ ਭਾੜੇ ਦੀ ਕਦਰ ਵਧੇਗੀ, ਪਰ ਇਸ ਲਈ ਮੰਗ ਘੱਟ ਹੈ ਅਤੇ ਆਉਣ ਵਾਲੇ ਸਾਲਾਂ ਵਿੱਚ ਆਮਦਨ ਵਿੱਚ ਹੋਰ ਘਾਟਾ ਹੋ ਸਕਦਾ ਹੈ।ਕੁਝ ਯਾਤਰੀਆਂ ਨੇ ਇਸ ਤਬਦੀਲੀ ਦਾ ਸਮਰਥਨ ਵੀ ਕੀਤਾ ਹੈ। ਓਲਿਵੀਆ ਵਾਲਰੋਂਡ ਨੇ ਕਿਹਾ ਕਿ ਕੁਝ ਵਾਧੂ ਸਮਾਂ ਮਿਲਣ ਨਾਲ ਲੋਕਾਂ ਲਈ ਆਪਣੀ ਮੰਜ਼ਿਲ ਤੱਕ ਪਹੁੰਚਣਾ ਆਸਾਨ ਹੋਵੇਗਾ।ਦੂਜੇ ਪਾਸੇ, ਮਾਈਕ ਕਿੰਗ ਨੇ ਕਿਹਾ ਕਿ ਲੋਕਾਂ ਨੂੰ ਟ੍ਰਾਂਜ਼ਿਟ ਵਰਤਣ ਲਈ ਉਤਸ਼ਾਹਿਤ ਕਰਨ ਲਈ ਇਹ ਇੱਕ ਵਧੀਆ ਨਿਵੇਸ਼ ਹੋ ਸਕਦਾ ਹੈ।
ਹਾਲਾਂਕਿ, ਕੁਝ ਯਾਤਰੀ ਇਸ ਨਾਲ ਸਹਿਮਤ ਨਹੀਂ ਹਨ। ਜੌਨ ਫਰਨਾਂਡੇਜ਼ ਦੇ ਮੁਤਾਬਕ, 90 ਮਿੰਟ ਕਾਫੀ ਹਨ ਜੇ ਯਾਤਰਾ ਦੀ ਯੋਜਨਾ ਠੀਕ ਤਰੀਕੇ ਨਾਲ ਬਣਾਈ ਜਾਵੇ।ਰਿਪੋਰਟ ਨੇ ਚੇਤਾਵਨੀ ਦਿੱਤੀ ਹੈ ਕਿ ਜੇ ਇਸ ਪ੍ਰਸਤਾਵ ਨੂੰ ਬਿਨਾਂ ਵਾਧੂ ਫੰਡਿੰਗ ਦੇ ਮਨਜ਼ੂਰੀ ਮਿਲਦੀ ਹੈ, ਤਾਂ ਟ੍ਰਾਂਜ਼ਿਟ ਦੀ ਆਮਦਨ ‘ਤੇ ਹੋਰ ਦਬਾਅ ਪੈ ਸਕਦਾ ਹੈ। ਇਸ ਨਾਲ ਸਤੰਬਰ 2026 ਲਈ ਯੋਜਿਤ ਨਵੀਆਂ ਸੇਵਾਵਾਂ ਨੂੰ ਵੀ ਰੱਦ ਕਰਨਾ ਪੈ ਸਕਦਾ ਹੈ।
