ਅਜੇ ਦੇਵਗਨ ਨੇ ‘ਦ੍ਰਿਸ਼ਯਮ 3’ ਲਈ ਮੋਹਨਲਾਲ ਤੋਂ ਮੰਗੀ ਮਨਜ਼ੂਰੀ, ਛੁੱਟੀਆਂ ਕਾਰਨ ਨਹੀਂ ਦੇਖ ਸਕੇ ਫ਼ਿਲਮ

ਮੁੰਬਈ-ਬਾਲੀਵੁੱਡ ਅਦਾਕਾਰ ਅਜੇ ਦੇਵਗਨ ‘ਦ੍ਰਿਸ਼ਯਮ 3: ਦ ਕਨਕਲੂਜ਼ਨ’ ਵਿਚ ਇਕ ਵਾਰ ਫਿਰ ਵਿਜੇ ਸਾਲਗਾਂਵਕਰ ਦੀ ਭੂਮਿਕਾ ਨਿਭਾਉਂਦੇ ਨਜ਼ਰ ਆਉਣਗੇ। ਫ਼ਿਲਮ ਨੂੰ ਇਸ ਫ੍ਰੈਂਚਾਈਜ਼ੀ ਦੀ ਆਖਰੀ ਕੜੀ ਦੱਸਿਆ ਗਿਆ ਹੈ। ਅਜੇ ਦੇਵਗਨ ਨੇ ਖੁਲਾਸਾ ਕੀਤਾ ਹੈ ਕਿ ਉਨ੍ਹਾਂ ਨੇ ਫ਼ਿਲਮ ਰਿਲੀਜ਼ ਤੋਂ ਪਹਿਲਾਂ ਮਲਿਆਲਮ ਸੁਪਰਸਟਾਰ ਮੋਹਨਲਾਲ ਨਾਲ ਗੱਲ ਕਰਕੇ ਉਨ੍ਹਾਂ ਤੋਂ ਫ਼ਿਲਮ ਦੇਖਣ ਅਤੇ ਆਪਣੀ ਰਾਏ ਦੇਣ ਦੀ ਇੱਛਾ ਜ਼ਾਹਰ ਕੀਤੀ ਸੀ।

ਅਜੇ ਨੇ ਐੱਫਆਈਸੀਸੀਆਈ ਫ੍ਰੇਮਜ਼ ਦੌਰਾਨ ਦੱਸਿਆ ਕਿ ਉਹ ਚਾਹੁੰਦੇ ਸਨ ਕਿ ਮੋਹਨਲਾਲ ਫ਼ਿਲਮ ਦੇਖਣ, ਕਿਉਂਕਿ ਉਨ੍ਹਾਂ ਲਈ ਮੋਹਨਲਾਲ ਦੀ ਮਨਜ਼ੂਰੀ ਮਹੱਤਵਪੂਰਨ ਸੀ। ਹਾਲਾਂਕਿ, ਮੋਹਨਲਾਲ ਇਸ ਸਮੇਂ ਛੁੱਟੀਆਂ ’ਤੇ ਹੋਣ ਕਾਰਨ ਫ਼ਿਲਮ ਨਹੀਂ ਦੇਖ ਸਕੇ। ਅਜੇ ਮੁਤਾਬਕ ਮੋਹਨਲਾਲ ਉਨ੍ਹਾਂ ਨਾਲ ਲਗਾਤਾਰ ਸੰਪਰਕ ਵਿਚ ਹਨ ਅਤੇ ਜਲਦ ਹੀ ਫ਼ਿਲਮ ਦੇਖਣ ਦੀ ਉਮੀਦ ਹੈ।

ਅਜੇ ਨੇ ਕਿਹਾ ਕਿ ‘ਦ੍ਰਿਸ਼ਯਮ 3’ ਨੂੰ ਬਣਾਉਣ ਦਾ ਮਕਸਦ ਸਿਰਫ਼ ਪਿਛਲੀ ਫ਼ਿਲਮ ਦੀ ਕਹਾਣੀ ਨੂੰ ਅੱਗੇ ਵਧਾਉਣਾ ਨਹੀਂ ਸੀ, ਸਗੋਂ ਅਜਿਹਾ ਵਿਚਾਰ ਤਿਆਰ ਕਰਨਾ ਸੀ ਜੋ ਕੁਦਰਤੀ ਤੌਰ ’ਤੇ ‘ਦ੍ਰਿਸ਼ਯਮ’ ਦੀ ਕਹਾਣੀ ਬਣ ਸਕੇ। ਉਨ੍ਹਾਂ ਦੱਸਿਆ ਕਿ ਮੌਜੂਦਾ ਕਹਾਣੀ ਤੱਕ ਪਹੁੰਚਣ ਤੋਂ ਪਹਿਲਾਂ ਨਿਰਦੇਸ਼ਕ ਅਤੇ ਲੇਖਕ ਨੇ ਚਾਰ ਸਕ੍ਰਿਪਟਾਂ ’ਤੇ ਕੰਮ ਕੀਤਾ ਅਤੇ ਉਨ੍ਹਾਂ ਨੂੰ ਰੱਦ ਕੀਤਾ।

ਅਜੇ ਮੁਤਾਬਕ ਨਵੀਂ ਫ਼ਿਲਮ ਵਿਚ ਵੀ ਕਹਾਣੀ ਦੇ ਮੋੜ, ਹੈਰਾਨੀਜਨਕ ਘਟਨਾਵਾਂ ਅਤੇ ਵਿਜੇ ਸਾਲਗਾਂਵਕਰ ਦੇ ਨਾਲ-ਨਾਲ ਉਸ ਦੇ ਆਲੇ-ਦੁਆਲੇ ਦੇ ਕਿਰਦਾਰਾਂ ਦੀ ਅਣਪਛਾਤੀ ਪ੍ਰਤੀਕਿਰਿਆ ਨੂੰ ਕਾਇਮ ਰੱਖਣ ’ਤੇ ਧਿਆਨ ਦਿੱਤਾ ਗਿਆ ਹੈ।ਅਜੇ ਨੇ ਫ਼ਿਲਮ ਨੂੰ ਫ੍ਰੈਂਚਾਈਜ਼ੀ ਦਾ ਅੰਤ ਦੱਸਦਿਆਂ ਕਿਹਾ ਕਿ ‘ਦ੍ਰਿਸ਼ਯਮ’ ਵਰਗੀ ਕਹਾਣੀ ਲਿਖਣਾ ਆਸਾਨ ਨਹੀਂ ਹੈ ਅਤੇ ਉਹ ਇਸ ਨੂੰ ਉੱਚ ਪੱਧਰ ’ਤੇ ਖਤਮ ਕਰਨਾ ਚਾਹੁੰਦੇ ਹਨ। ਉਨ੍ਹਾਂ ਕਿਹਾ ਕਿ ਉਨ੍ਹਾਂ ਦੀ ਨਿੱਜੀ ਰਾਏ ਅਨੁਸਾਰ ਨਵੀਂ ਫ਼ਿਲਮ ‘ਦ੍ਰਿਸ਼ਯਮ 2’ ਨਾਲੋਂ ਵੀ ਬਿਹਤਰ ਹੈ।‘ਦ੍ਰਿਸ਼ਯਮ 3’ ਵਿਚ ਅਜੇ ਦੇਵਗਨ ਤੋਂ ਇਲਾਵਾ ਸ਼੍ਰੀਆ ਸਰਨ, ਇਸ਼ਿਤਾ ਦੱਤਾ, ਤੱਬੂ ਅਤੇ ਰਜਤ ਕਪੂਰ ਮੁੜ ਨਜ਼ਰ ਆਉਣਗੇ। ਜੈਦੀਪ ਅਹਲਾਵਤ ਅਤੇ ਪ੍ਰਕਾਸ਼ ਰਾਜ ਫ਼ਿਲਮ ਦੀ ਨਵੀਂ ਕਾਸਟ ਵਿਚ ਸ਼ਾਮਲ ਹਨ। ਫ਼ਿਲਮ 2 ਅਕਤੂਬਰ ਨੂੰ ਸਿਨੇਮਾਘਰਾਂ ਵਿਚ ਰਿਲੀਜ਼ ਹੋਣੀ ਹੈ।