24 ਘੰਟਿਆਂ ਵਿੱਚ 47 ਹਜ਼ਾਰ ਤੋਂ ਵੱਧ ਰੁੱਖ ਲਗਾ ਕੇ ਕੈਨੇਡੀਅਨ ਨੌਜਵਾਨ ਨੇ ਬਣਾਇਆ ਵਿਸ਼ਵ ਰਿਕਾਰਡ
ਕੈਨੇਡਾ-ਕੈਨੇਡਾ ਦੇ ਪਰਿਆਵਰਨ ਪ੍ਰੇਮੀ ਅਤੇ ਟਰੀ ਪਲਾਂਟਰ ਐਂਟੋਇਨ ਮੋਸੇਸ ਨੇ ਕੀਨੀਆ ਦੇ ਮੋਮਬਾਸਾ ਤੱਟੀ ਇਲਾਕੇ ਵਿੱਚ ਸਿਰਫ਼ 24 ਘੰਟਿਆਂ ਦੌਰਾਨ 47,460 ਮੈਨਗਰੋਵ ਬੂਟੇ ਲਗਾ ਕੇ ਨਵਾਂ ਗਿਨੀਜ਼ ਵਰਲਡ ਰਿਕਾਰਡ ਆਪਣੇ ਨਾਮ ਕਰ ਲਿਆ ਹੈ। ਇਹ ਕਾਰਨਾਮਾ 30 ਅਪ੍ਰੈਲ ਨੂੰ ਕੀਤਾ ਗਿਆ, ਜਿਸ ਨੇ ਵਿਸ਼ਵ ਪੱਧਰ ’ਤੇ ਪਰਿਆਵਰਨ ਸੰਭਾਲ ਅਤੇ ਵਣਰੋਪਣ ਵੱਲ ਲੋਕਾਂ ਦਾ ਧਿਆਨ ਖਿੱਚਿਆ ਹੈ।ਸਮੁੰਦਰੀ ਕਿਨਾਰੇ ਦੇ ਚਿੱਬੜੇ ਅਤੇ ਖਾਰੇ ਇਲਾਕੇ ਵਿੱਚ ਲਗਾਤਾਰ ਘੰਟਿਆਂ ਤੱਕ ਕੰਮ ਕਰਨਾ ਬਹੁਤ ਮੁਸ਼ਕਲ ਮੰਨਿਆ ਜਾਂਦਾ ਹੈ। ਐਂਟੋਇਨ ਮੋਸੇਸ ਨੇ ਆਪਣੀ ਟੀਮ ਨਾਲ ਦਿਨ-ਰਾਤ ਬਿਨਾਂ ਵੱਡੇ ਵਿਰਾਮ ਦੇ ਇਹ ਮੁਹਿੰਮ ਜਾਰੀ ਰੱਖੀ ਅਤੇ ਹਜ਼ਾਰਾਂ ਬੂਟਿਆਂ ਨੂੰ ਮਿੱਟੀ ਵਿੱਚ ਲਗਾਇਆ।
ਇਹ ਪਹਿਲਾ ਮੌਕਾ ਨਹੀਂ ਹੈ ਜਦੋਂ ਐਂਟੋਇਨ ਮੋਸੇਸ ਨੇ ਅਜਿਹਾ ਰਿਕਾਰਡ ਬਣਾਇਆ ਹੋਵੇ। ਇਸ ਤੋਂ ਪਹਿਲਾਂ 2021 ਵਿੱਚ ਕੈਨੇਡਾ ਦੇ ਉੱਤਰੀ ਅਲਬਰਟਾ ਖੇਤਰ ਵਿੱਚ ਉਹ ਇੱਕ ਦਿਨ ਵਿੱਚ 23 ਹਜ਼ਾਰ ਤੋਂ ਵੱਧ ਰੁੱਖ ਲਗਾ ਕੇ ਵੀ ਰਿਕਾਰਡ ਬਣਾ ਚੁੱਕੇ ਹਨ।
ਉਹ ਕਈ ਸਾਲਾਂ ਤੋਂ ਕੈਨੇਡਾ ਵਿੱਚ ਵਪਾਰਕ ਪੱਧਰ ’ਤੇ ਰੁੱਖ ਲਗਾਉਣ ਵਾਲੀਆਂ ਮੁਹਿੰਮਾਂ ਨਾਲ ਜੁੜੇ ਹੋਏ ਹਨ। ਲੰਬੇ ਸਮੇਂ ਤੱਕ ਕੀਤੀ ਮਿਹਨਤ ਅਤੇ ਤਜਰਬੇ ਨੇ ਉਨ੍ਹਾਂ ਨੂੰ ਤੇਜ਼ ਅਤੇ ਵੱਡੇ ਪੱਧਰ ’ਤੇ ਵਣਰੋਪਣ ਕਰਨ ਵਿੱਚ ਮਾਹਿਰ ਬਣਾਇਆ ਹੈ। ਮੈਨਗਰੋਵ ਰੁੱਖ ਸਮੁੰਦਰੀ ਕਿਨਾਰਿਆਂ ਦੀ ਮਿੱਟੀ ਨੂੰ ਖਿਸਕਣ ਤੋਂ ਬਚਾਉਣ ਵਿੱਚ ਮਹੱਤਵਪੂਰਨ ਭੂਮਿਕਾ ਨਿਭਾਉਂਦੇ ਹਨ। ਇਹ ਤੂਫ਼ਾਨਾਂ ਅਤੇ ਸਮੁੰਦਰੀ ਲਹਿਰਾਂ ਤੋਂ ਤੱਟੀ ਇਲਾਕਿਆਂ ਦੀ ਰੱਖਿਆ ਕਰਨ ਦੇ ਨਾਲ-ਨਾਲ ਸਮੁੰਦਰੀ ਜੀਵਾਂ ਲਈ ਵੀ ਇੱਕ ਕੁਦਰਤੀ ਆਸਰਾ ਮੁਹੱਈਆ ਕਰਦੇ ਹਨ।
ਪਰਿਆਵਰਨ ਮਾਹਿਰਾਂ ਮੁਤਾਬਕ ਮੈਨਗਰੋਵ ਜੰਗਲ ਮੌਸਮੀ ਤਬਦੀਲੀ ਨਾਲ ਲੜਨ ਵਿੱਚ ਵੀ ਕਾਫ਼ੀ ਮਦਦਗਾਰ ਹਨ, ਕਿਉਂਕਿ ਇਹ ਵਾਤਾਵਰਣ ਵਿੱਚੋਂ ਵੱਡੀ ਮਾਤਰਾ ਵਿੱਚ ਕਾਰਬਨ ਸੋਖਦੇ ਹਨ। ਐਂਟੋਇਨ ਮੋਸੇਸ ਦੀ ਸੋਸ਼ਲ ਮੀਡੀਆ ’ਤੇ ਵੀ ਕਾਫ਼ੀ ਵੱਡੀ ਫਾਲੋਇੰਗ ਹੈ। ਲੱਖਾਂ ਲੋਕ ਉਨ੍ਹਾਂ ਦੇ ਵਣਰੋਪਣ ਪ੍ਰੋਜੈਕਟਾਂ ਅਤੇ ਪਰਿਆਵਰਨ ਸੰਭਾਲ ਸੰਬੰਧੀ ਵੀਡੀਓਜ਼ ਨੂੰ ਦੇਖਦੇ ਹਨ। ਉਹ “Antomos” ਨਾਮਕ ਪ੍ਰੋਜੈਕਟ ਵੀ ਚਲਾ ਰਹੇ ਹਨ, ਜਿਸ ਰਾਹੀਂ ਦੁਨੀਆ ਭਰ ਵਿੱਚ ਰੁੱਖ ਲਗਾਉਣ ਦੀਆਂ ਮੁਹਿੰਮਾਂ ਨੂੰ ਪ੍ਰੋਤਸਾਹਿਤ ਕੀਤਾ ਜਾਂਦਾ ਹੈ।
ਪਰਿਆਵਰਨ ਪ੍ਰੇਮੀਆਂ ਦਾ ਮੰਨਣਾ ਹੈ ਕਿ ਐਂਟੋਇਨ ਮੋਸੇਸ ਵਰਗੇ ਲੋਕ ਨੌਜਵਾਨ ਪੀੜ੍ਹੀ ਲਈ ਪ੍ਰੇਰਣਾ ਬਣ ਰਹੇ ਹਨ ਅਤੇ ਕੁਦਰਤ ਦੀ ਸੰਭਾਲ ਲਈ ਵਿਸ਼ਵ ਪੱਧਰ ’ਤੇ ਸਕਾਰਾਤਮਕ ਸੰਦੇਸ਼ ਦੇ ਰਹੇ ਹਨ।
