2050 ਦੇ ਜ਼ੀਰੋ ਕਾਰਬਨ ਟੀਚੇ ਵੱਲ ਕੈਨੇਡਾ ਦਾ ਵੱਡਾ ਕਦਮ

ਓਟਵਾ-ਕੈਨੇਡਾ ਨੇ ਸਾਫ਼ ਊਰਜਾ ਅਤੇ ਊਰਜਾ ਸੁਰੱਖਿਆ ਨੂੰ ਮਜ਼ਬੂਤ ਕਰਨ ਲਈ ਵੱਡਾ ਕਦਮ ਚੁੱਕਦਿਆਂ ਅਗਲੇ 15 ਸਾਲਾਂ ਦੌਰਾਨ 10 ਨਵੇਂ ਵੱਡੇ ਪਰਮਾਣੂ ਰਿਐਕਟਰ ਸਥਾਪਤ ਕਰਨ ਦੀ ਯੋਜਨਾ ਦਾ ਐਲਾਨ ਕੀਤਾ ਹੈ। ਸਰਕਾਰ ਦਾ ਟੀਚਾ 2050 ਤੱਕ ਜ਼ੀਰੋ ਕਾਰਬਨ ਨਿਕਾਸੀ ਹਾਸਲ ਕਰਨਾ ਅਤੇ ਦੇਸ਼ ਦੀ ਬਿਜਲੀ ਉਤਪਾਦਨ ਸਮਰੱਥਾ ਨੂੰ ਲਗਭਗ ਦੁੱਗਣਾ ਕਰਨਾ ਹੈ।ਫ਼ੈਡਰਲ ਊਰਜਾ ਮੰਤਰੀ Tim Hodgson ਨੇ ਸੋਮਵਾਰ ਨੂੰ ਕੈਨੇਡਾ ਦੀ ਨਵੀਂ ਰਾਸ਼ਟਰੀ ਪਰਮਾਣੂ ਰਣਨੀਤੀ ਜਾਰੀ ਕਰਦਿਆਂ ਇਸ ਨੂੰ “ਸਿਵਿਲੀਅਨ ਪਰਮਾਣੂ ਪੁਨਰਜਾਗਰਣ” ਦੀ ਸ਼ੁਰੂਆਤ ਕਰਾਰ ਦਿੱਤਾ। ਉਨ੍ਹਾਂ ਕਿਹਾ ਕਿ ਵਧ ਰਹੀ ਬਿਜਲੀ ਦੀ ਮੰਗ ਅਤੇ ਜਲਵਾਯੂ ਪਰਿਵਰਤਨ ਦੀਆਂ ਚੁਣੌਤੀਆਂ ਨਾਲ ਨਜਿੱਠਣ ਲਈ ਪਰਮਾਣੂ ਊਰਜਾ ਇੱਕ ਮਹੱਤਵਪੂਰਨ ਭੂਮਿਕਾ ਨਿਭਾਏਗੀ।

ਨਵੀਂ ਰਣਨੀਤੀ ਤਹਿਤ ਕੈਨੇਡਾ ਨਾ ਸਿਰਫ਼ ਆਪਣੇ ਦੇਸ਼ ਵਿੱਚ ਪਰਮਾਣੂ ਊਰਜਾ ਉਤਪਾਦਨ ਦਾ ਵਿਸਥਾਰ ਕਰੇਗਾ, ਸਗੋਂ ਹੋਰ ਦੇਸ਼ਾਂ ਨੂੰ ਕੈਨੇਡੀਅਨ ਤਕਨਾਲੋਜੀ ਅਧਾਰਿਤ ਰਿਐਕਟਰ ਵੇਚਣ ਅਤੇ ਯੂਰੇਨੀਅਮ ਦੇ ਨਿਰਯਾਤ ਨੂੰ ਵੀ ਦੁੱਗਣਾ ਕਰਨ ਦੀ ਯੋਜਨਾ ਬਣਾ ਰਿਹਾ ਹੈ।

ਮਾਹਿਰਾਂ ਦਾ ਮੰਨਣਾ ਹੈ ਕਿ ਇਹ ਯੋਜਨਾ ਕੈਨੇਡਾ ਨੂੰ ਸਾਫ਼ ਊਰਜਾ ਉਤਪਾਦਨ ਵਿੱਚ ਵਿਸ਼ਵ ਪੱਧਰ ’ਤੇ ਮਜ਼ਬੂਤ ਸਥਿਤੀ ਦਿਵਾ ਸਕਦੀ ਹੈ। ਉਨ੍ਹਾਂ ਅਨੁਸਾਰ ਪਰਮਾਣੂ ਊਰਜਾ ਲੰਬੇ ਸਮੇਂ ਲਈ ਭਰੋਸੇਯੋਗ ਅਤੇ ਘੱਟ ਕਾਰਬਨ ਨਿਕਾਸੀ ਵਾਲਾ ਸਰੋਤ ਹੈ, ਜੋ ਦੇਸ਼ ਨੂੰ ਆਪਣੇ ਜਲਵਾਯੂ ਟੀਚਿਆਂ ਦੀ ਪ੍ਰਾਪਤੀ ਵਿੱਚ ਮਦਦ ਕਰੇਗਾ।ਹਾਲਾਂਕਿ, ਕੁਝ ਵਾਤਾਵਰਨ ਮਾਹਿਰਾਂ ਅਤੇ ਨਾਗਰਿਕ ਗਰੁੱਪਾਂ ਵੱਲੋਂ ਪਰਮਾਣੂ ਕਚਰੇ ਦੇ ਪ੍ਰਬੰਧਨ, ਲਾਗਤਾਂ ਅਤੇ ਸੁਰੱਖਿਆ ਨਾਲ ਜੁੜੇ ਮੁੱਦਿਆਂ ਬਾਰੇ ਚਿੰਤਾਵਾਂ ਵੀ ਜ਼ਾਹਰ ਕੀਤੀਆਂ ਜਾ ਰਹੀਆਂ ਹਨ। ਇਸ ਦੇ ਬਾਵਜੂਦ ਫੈਡਰਲ ਸਰਕਾਰ ਦਾ ਕਹਿਣਾ ਹੈ ਕਿ ਨਵੀਂ ਪੀੜ੍ਹੀ ਦੇ ਰਿਐਕਟਰ ਉੱਚ ਸੁਰੱਖਿਆ ਮਾਪਦੰਡਾਂ ਅਨੁਸਾਰ ਤਿਆਰ ਕੀਤੇ ਜਾਣਗੇ ਅਤੇ ਦੇਸ਼ ਦੇ ਸਾਫ਼ ਊਰਜਾ ਭਵਿੱਖ ਦੀ ਨੀਂਹ ਬਣਨਗੇ।