ਵਿਰਾਟ ਕੋਹਲੀ ਦੇ 2027 ਵਰਲਡ ਕੱਪ ਨੂੰ ਲੈ ਕੇ ਸੰਕੇਤਾਂ ਨੇ ਵਧਾਈ ਚਰਚਾ, ਟੀਮ ਮੈਨੇਜਮੈਂਟ ਨਾਲ ਦੂਰੀਆਂ ਦੇ ਇਸ਼ਾਰੇ
ਨਵੀਂ ਦਿੱਲੀ-ਭਾਰਤੀ ਕ੍ਰਿਕਟ ਟੀਮ ਦੇ ਸਟਾਰ ਬੱਲੇਬਾਜ਼ ਵਿਰਾਟ ਕੋਹਲੀ ਦੇ ਹਾਲੀਆ ਬਿਆਨਾਂ ਨੇ ਟੀਮ ਮੈਨੇਜਮੈਂਟ ਅਤੇ ਚੋਣ ਕਮੇਟੀ ਨਾਲ ਉਨ੍ਹਾਂ ਦੇ ਰਿਸ਼ਤਿਆਂ ਨੂੰ ਲੈ ਕੇ ਨਵੀਆਂ ਚਰਚਾਵਾਂ ਨੂੰ ਜਨਮ ਦੇ ਦਿੱਤਾ ਹੈ। ਕੋਹਲੀ ਦੇ ਬਿਆਨਾਂ ਤੋਂ ਇਹ ਅਹਿਸਾਸ ਹੁੰਦਾ ਹੈ ਕਿ 2027 ਵਨਡੇ ਵਰਲਡ ਕੱਪ ਨੂੰ ਲੈ ਕੇ ਉਹ ਖੁਦ ਨੂੰ ਪੂਰੀ ਤਰ੍ਹਾਂ ਨਿਸ਼ਚਿੰਤ ਮਹਿਸੂਸ ਨਹੀਂ ਕਰ ਰਹੇ।
ਹਾਲ ਹੀ ਵਿੱਚ ਆਰਸੀਬੀ ਨੂੰ ਆਈਪੀਐਲ ਪਲੇਆਫ਼ ਤੱਕ ਲੈ ਜਾਣ ਤੋਂ ਬਾਅਦ ਇੱਕ ਪੋਡਕਾਸਟ ਦੌਰਾਨ ਵਿਰਾਟ ਕੋਹਲੀ ਨੇ ਬਿਨਾਂ ਕਿਸੇ ਦਾ ਨਾਮ ਲਏ ਟੀਮ ਮੈਨੇਜਮੈਂਟ ਅਤੇ ਚੋਣਕਰਤਾਵਾਂ ‘ਤੇ ਅਪਰੋਕਸ਼ ਤੌਰ ‘ਤੇ ਸਵਾਲ ਖੜ੍ਹੇ ਕੀਤੇ। ਉਨ੍ਹਾਂ ਕਿਹਾ ਕਿ ਜੇਕਰ ਟੀਮ ਦਾ ਮਾਹੌਲ ਇਹ ਮਹਿਸੂਸ ਕਰਵਾਏ ਕਿ ਉਹ ਹਾਲੇ ਵੀ ਟੀਮ ਲਈ ਮੁੱਲ ਜੋੜ ਸਕਦੇ ਹਨ ਤਾਂ ਉਹ ਖੇਡਣਾ ਜਾਰੀ ਰੱਖਣਗੇ, ਪਰ ਜੇਕਰ ਹਰ ਵੇਲੇ ਆਪਣੀ ਕਾਬਲੀਅਤ ਸਾਬਤ ਕਰਨ ਲਈ ਕਿਹਾ ਗਿਆ ਤਾਂ ਉਹ ਉਸ ਸਥਿਤੀ ਵਿੱਚ ਨਹੀਂ ਰਹਿਣਾ ਚਾਹੁੰਦੇ।
ਕੋਹਲੀ ਦੇ ਇਹ ਬਿਆਨ ਮੁੱਖ ਕੋਚ ਗੌਤਮ ਗੰਭੀਰ ਅਤੇ ਚੋਣ ਕਮੇਟੀ ਦੇ ਚੇਅਰਮੈਨ ਅਜੀਤ ਅਗਰਕਰ ਨਾਲ ਉਨ੍ਹਾਂ ਦੇ ਤਣਾਅਪੂਰਨ ਸੰਬੰਧਾਂ ਵੱਲ ਇਸ਼ਾਰਾ ਕਰਦੇ ਦਿਖਾਈ ਦੇ ਰਹੇ ਹਨ। ਇਹ ਵੀ ਮੰਨਿਆ ਜਾ ਰਿਹਾ ਹੈ ਕਿ ਟੀਮ ਮੈਨੇਜਮੈਂਟ ਹਾਲੇ ਤੱਕ 2027 ਵਰਲਡ ਕੱਪ ਲਈ ਵਿਰਾਟ ਕੋਹਲੀ ਅਤੇ ਰੋਹਿਤ ਸ਼ਰਮਾ ਨੂੰ ਲੈ ਕੇ ਪੂਰੀ ਤਰ੍ਹਾਂ ਫੈਸਲਾ ਨਹੀਂ ਕਰ ਸਕੀ।ਸੂਤਰਾਂ ਮੁਤਾਬਕ ਚੋਣ ਕਮੇਟੀ ਦੇ ਕੁਝ ਮੈਂਬਰ ਅਫਗਾਨਿਸਤਾਨ ਖ਼ਿਲਾਫ਼ ਸੀਰੀਜ਼ ਲਈ ਸੀਨੀਅਰ ਖਿਡਾਰੀਆਂ ਨੂੰ ਆਰਾਮ ਦੇਣ ਦੇ ਹੱਕ ਵਿੱਚ ਸਨ, ਪਰ ਆਖ਼ਿਰਕਾਰ ਵਿਰਾਟ ਅਤੇ ਰੋਹਿਤ ਨੂੰ ਟੀਮ ਵਿੱਚ ਸ਼ਾਮਲ ਕੀਤਾ ਗਿਆ। ਟੈਸਟ ਅਤੇ ਟੀ-20 ਤੋਂ ਸਨਿਆਸ ਲੈ ਚੁੱਕੇ ਦੋਵੇਂ ਖਿਡਾਰੀ ਹੁਣ ਸਿਰਫ਼ ਵਨਡੇ ਕ੍ਰਿਕਟ ‘ਤੇ ਧਿਆਨ ਕੇਂਦਰਿਤ ਕਰ ਰਹੇ ਹਨ।
ਕੋਹਲੀ ਨੇ ਆਪਣੇ ਬਿਆਨਾਂ ਵਿੱਚ ਪੁਰਾਣੇ ਕੋਚ ਰਾਹੁਲ ਦ੍ਰਾਵਿੜ ਅਤੇ ਬੱਲੇਬਾਜ਼ੀ ਕੋਚ ਵਿਕਰਮ ਰਾਠੌਰ ਦੀ ਖੁੱਲ੍ਹ ਕੇ ਤਾਰੀਫ਼ ਕੀਤੀ। ਉਨ੍ਹਾਂ ਕਿਹਾ ਕਿ ਦੋਵੇਂ ਕੋਚਾਂ ਨੇ ਹਮੇਸ਼ਾ ਉਨ੍ਹਾਂ ਨੂੰ ਸਹਿਯੋਗੀ ਅਤੇ ਸਹਾਰਾ ਦੇਣ ਵਾਲਾ ਮਾਹੌਲ ਦਿੱਤਾ, ਜਿਸ ਕਾਰਨ ਉਹ ਖੁਦ ਨੂੰ ਟੀਮ ਲਈ ਹੋਰ ਵੱਧ ਸਮਰਪਿਤ ਮਹਿਸੂਸ ਕਰਦੇ ਸਨ।
ਉਨ੍ਹਾਂ ਇਹ ਵੀ ਸਵੀਕਾਰਿਆ ਕਿ ਲੰਮੇ ਕਰੀਅਰ ਦੇ ਬਾਵਜੂਦ ਉਹ ਅੱਜ ਵੀ ਦਬਾਅ ਮਹਿਸੂਸ ਕਰਦੇ ਹਨ। ਕੋਹਲੀ ਨੇ ਕਿਹਾ ਕਿ ਕਈ ਵਾਰ ਉਨ੍ਹਾਂ ਨੂੰ ਇਹ ਡਰ ਰਹਿੰਦਾ ਹੈ ਕਿ ਜੇ ਨੈੱਟਸ ਵਿੱਚ ਮਾੜਾ ਸੈਸ਼ਨ ਹੋ ਗਿਆ ਤਾਂ ਨੌਜਵਾਨ ਖਿਡਾਰੀ ਕੀ ਸੋਚਣਗੇ।ਵਿਰਾਟ ਕੋਹਲੀ ਦੇ ਇਨ੍ਹਾਂ ਬਿਆਨਾਂ ਨੇ ਭਾਰਤੀ ਕ੍ਰਿਕਟ ਵਿੱਚ 2027 ਵਰਲਡ ਕੱਪ ਨੂੰ ਲੈ ਕੇ ਚਰਚਾਵਾਂ ਨੂੰ ਹੋਰ ਤੇਜ਼ ਕਰ ਦਿੱਤਾ ਹੈ।
