ਬੀ.ਸੀ. ਦੇ ਕਈ ਇਲਾਕਿਆਂ ਵਿੱਚ ਟੁੱਟੇ ਗਰਮੀ ਦੇ ਰਿਕਾਰਡ, 14 ਥਾਵਾਂ 'ਤੇ ਨਵੇਂ ਉੱਚ ਤਾਪਮਾਨ ਦਰਜ

ਵੈਨਕੂਵਰ-ਬ੍ਰਿਟਿਸ਼ ਕੋਲੰਬੀਆ (ਬੀ.ਸੀ.) ਵਿੱਚ ਪਿਛਲੇ ਦੋ ਦਿਨਾਂ ਦੌਰਾਨ ਪੈ ਰਹੀ ਤਿੱਖੀ ਗਰਮੀ ਕਾਰਨ ਕਈ ਇਲਾਕਿਆਂ ਵਿੱਚ ਤਾਪਮਾਨ ਦੇ ਪੁਰਾਣੇ ਰਿਕਾਰਡ ਟੁੱਟ ਗਏ ਹਨ। ਵਾਤਾਵਰਨ ਕੈਨੇਡਾ ਮੁਤਾਬਕ ਸੋਮਵਾਰ ਅਤੇ ਮੰਗਲਵਾਰ ਨੂੰ ਸੂਬੇ ਦੇ ਘੱਟੋ-ਘੱਟ 14 ਖੇਤਰਾਂ ਵਿੱਚ ਨਵੇਂ ਰੋਜ਼ਾਨਾ ਤਾਪਮਾਨ ਰਿਕਾਰਡ ਬਣੇ ਹਨ।ਨਵੇਂ ਰਿਕਾਰਡ ਬਣਾਉਣ ਵਾਲੇ ਖੇਤਰਾਂ ਵਿੱਚ ਸੀਸ਼ੈਲਟ, ਬੈਲਾ ਬੈਲਾ ਅਤੇ ਵਿਕਟੋਰੀਆ ਸਮੇਤ ਲੋਅਰ ਮੇਨਲੈਂਡ ਦੇ ਕਈ ਸ਼ਹਿਰ ਸ਼ਾਮਲ ਹਨ। ਵੈਸਟ ਵੈਨਕੂਵਰ, ਐਬਟਸਫੋਰਡ ਅਤੇ ਵ੍ਹਾਈਟ ਰੌਕ ਵਿੱਚ ਵੀ ਗਰਮੀ ਨੇ ਪੁਰਾਣੇ ਅੰਕੜਿਆਂ ਨੂੰ ਪਿੱਛੇ ਛੱਡ ਦਿੱਤਾ।

ਐਬਟਸਫੋਰਡ ਵਿੱਚ ਤਾਪਮਾਨ 33 ਡਿਗਰੀ ਸੈਲਸੀਅਸ ਤੱਕ ਪਹੁੰਚ ਗਿਆ, ਜਿਸ ਨਾਲ 1992 ਵਿੱਚ ਬਣਿਆ 30.2 ਡਿਗਰੀ ਸੈਲਸੀਅਸ ਦਾ ਰਿਕਾਰਡ ਟੁੱਟ ਗਿਆ। ਇਸੇ ਤਰ੍ਹਾਂ ਵੈਸਟ ਵੈਨਕੂਵਰ ਵਿੱਚ 32.1 ਡਿਗਰੀ ਸੈਲਸੀਅਸ ਤਾਪਮਾਨ ਦਰਜ ਕੀਤਾ ਗਿਆ, ਜੋ 1989 ਦੇ 29.5 ਡਿਗਰੀ ਸੈਲਸੀਅਸ ਦੇ ਰਿਕਾਰਡ ਨਾਲੋਂ 2.6 ਡਿਗਰੀ ਵੱਧ ਹੈ।

ਵ੍ਹਾਈਟ ਰੌਕ ਵਿੱਚ ਪਾਰਾ 31 ਡਿਗਰੀ ਸੈਲਸੀਅਸ ਤੱਕ ਚੜ੍ਹ ਗਿਆ, ਜਦਕਿ ਇਸ ਤੋਂ ਪਹਿਲਾਂ 1936 ਵਿੱਚ 28.3 ਡਿਗਰੀ ਸੈਲਸੀਅਸ ਦਾ ਰਿਕਾਰਡ ਬਣਿਆ ਸੀ। ਸਕੁਐਮਿਸ਼ ਵਿੱਚ ਵੀ ਤਾਪਮਾਨ 34.1 ਡਿਗਰੀ ਸੈਲਸੀਅਸ ਤੱਕ ਪਹੁੰਚ ਗਿਆ, ਜਿਸ ਨਾਲ 1960 ਦਾ 29.6 ਡਿਗਰੀ ਸੈਲਸੀਅਸ ਦਾ ਰਿਕਾਰਡ ਪਿੱਛੇ ਰਹਿ ਗਿਆ।ਸੂਬੇ ਦੀ ਰਾਜਧਾਨੀ ਵਿਕਟੋਰੀਆ ਵਿੱਚ 30.4 ਡਿਗਰੀ ਸੈਲਸੀਅਸ ਤਾਪਮਾਨ ਦਰਜ ਕੀਤਾ ਗਿਆ, ਜੋ 2017 ਦੇ 26.6 ਡਿਗਰੀ ਸੈਲਸੀਅਸ ਦੇ ਪੁਰਾਣੇ ਰਿਕਾਰਡ ਨਾਲੋਂ ਕਾਫ਼ੀ ਵੱਧ ਹੈ। ਉੱਥੇ ਹੀ ਬੈਲਾ ਬੈਲਾ ਖੇਤਰ ਵਿੱਚ 27.6 ਡਿਗਰੀ ਸੈਲਸੀਅਸ ਤਾਪਮਾਨ ਰਿਕਾਰਡ ਕੀਤਾ ਗਿਆ, ਜਦਕਿ 1977 ਵਿੱਚ ਇੱਥੇ 25.1 ਡਿਗਰੀ ਸੈਲਸੀਅਸ ਦਾ ਰਿਕਾਰਡ ਬਣਿਆ ਸੀ।

ਸੋਮਵਾਰ ਨੂੰ ਕੈਨੇਡਾ ਦਾ ਸਭ ਤੋਂ ਗਰਮ ਸਥਾਨ ਲਿਟਨ ਪਿੰਡ ਰਿਹਾ, ਜਿੱਥੇ ਤਾਪਮਾਨ 34.2 ਡਿਗਰੀ ਸੈਲਸੀਅਸ ਦਰਜ ਕੀਤਾ ਗਿਆ। ਹਾਲਾਂਕਿ ਇਹ ਲਿਟਨ ਲਈ ਕੋਈ ਨਵਾਂ ਰਿਕਾਰਡ ਨਹੀਂ ਸੀ, ਕਿਉਂਕਿ ਇਹ ਖੇਤਰ ਅਕਸਰ ਕੈਨੇਡਾ ਦੇ ਸਭ ਤੋਂ ਗਰਮ ਇਲਾਕਿਆਂ ਵਿੱਚ ਗਿਣਿਆ ਜਾਂਦਾ ਹੈ ਅਤੇ ਇੱਥੇ ਤਾਪਮਾਨ ਕਈ ਵਾਰ 40 ਡਿਗਰੀ ਸੈਲਸੀਅਸ ਦੇ ਨੇੜੇ ਪਹੁੰਚ ਜਾਂਦਾ ਹੈ।ਮੌਸਮ ਵਿਗਿਆਨੀ ਮਾਈਕਲ ਕੱਸ ਦਾ ਕਹਿਣਾ ਹੈ ਕਿ ਹਫ਼ਤੇ ਦੇ ਅੰਤ ਵੱਲ ਤਾਪਮਾਨ ਵਿੱਚ ਗਿਰਾਵਟ ਆਉਣ ਦੀ ਸੰਭਾਵਨਾ ਹੈ। ਉਨ੍ਹਾਂ ਅਨੁਸਾਰ ਵੀਰਵਾਰ ਤੱਕ ਤਾਪਮਾਨ ਘੱਟ ਕੇ 20 ਡਿਗਰੀ ਸੈਲਸੀਅਸ ਦੇ ਸ਼ੁਰੂਆਤੀ ਪੱਧਰ ਤੱਕ ਆ ਸਕਦਾ ਹੈ। ਇਸ ਦੌਰਾਨ ਬੱਦਲਾਂ ਦੀ ਮਾਤਰਾ ਵਧੇਗੀ ਅਤੇ ਕੁਝ ਖੇਤਰਾਂ ਵਿੱਚ ਦੇਰ ਸ਼ਾਮ ਮੀਂਹ ਪੈਣ ਦੀ ਵੀ ਸੰਭਾਵਨਾ ਹੈ।