ਕੈਲੋਨਾ ਵਿੱਚ ਬੇਰੁਜ਼ਗਾਰੀ ਦਰ ਮੁੜ ਕੈਨੇਡਾ ਵਿੱਚ ਸਭ ਤੋਂ ਉੱਚੀ
ਕੈਲੋਨਾ-ਸਟੈਟਿਸਟਿਕਸ ਕੈਨੇਡਾ ਵੱਲੋਂ ਜਾਰੀ ਮਈ ਮਹੀਨੇ ਦੀ ਰੋਜ਼ਗਾਰ ਰਿਪੋਰਟ ਅਨੁਸਾਰ ਕੈਲੋਨਾ ਵਿੱਚ ਬੇਰੁਜ਼ਗਾਰੀ ਦੀ ਸਥਿਤੀ ਹੋਰ ਗੰਭੀਰ ਹੋ ਗਈ ਹੈ। ਸ਼ਹਿਰ ਦੀ ਬੇਰੁਜ਼ਗਾਰੀ ਦਰ 8 ਫੀਸਦੀ ਤੋਂ ਵੱਧ ਕੇ 9 ਫੀਸਦੀ ਤੱਕ ਪਹੁੰਚ ਗਈ ਹੈ, ਜੋ ਇਸ ਸਮੇਂ ਕੈਨੇਡਾ ਵਿੱਚ ਸਭ ਤੋਂ ਉੱਚੀ ਦਰ ਮੰਨੀ ਜਾ ਰਹੀ ਹੈ।ਰਿਪੋਰਟ ਮੁਤਾਬਕ ਮਈ ਦੌਰਾਨ ਹੋਰ 1,500 ਲੋਕ ਬੇਰੁਜ਼ਗਾਰਾਂ ਦੀ ਸੂਚੀ ਵਿੱਚ ਸ਼ਾਮਲ ਹੋਏ, ਜਿਸ ਨਾਲ ਕੰਮ ਦੀ ਭਾਲ ਕਰ ਰਹੇ ਲੋਕਾਂ ਦੀ ਗਿਣਤੀ ਵੱਧ ਕੇ 12,100 ਹੋ ਗਈ ਹੈ।
ਹਾਲਾਂਕਿ ਕੁੱਲ ਰੋਜ਼ਗਾਰ ਵਿੱਚ ਹਲਕਾ ਵਾਧਾ ਵੀ ਦਰਜ ਕੀਤਾ ਗਿਆ। ਅਪ੍ਰੈਲ ਵਿੱਚ 121,900 ਲੋਕ ਰੁਜ਼ਗਾਰ ਵਿੱਚ ਸਨ, ਜੋ ਮਈ ਵਿੱਚ ਵੱਧ ਕੇ 122,600 ਹੋ ਗਏ। ਇਸਦੇ ਨਾਲ ਹੀ ਮਜ਼ਦੂਰ ਬਲ ਵਿੱਚ ਵੀ 2,200 ਲੋਕਾਂ ਦਾ ਵਾਧਾ ਹੋਇਆ, ਜਿਸ ਨਾਲ ਇਹ ਗਿਣਤੀ 132,500 ਤੋਂ ਵੱਧ ਕੇ 134,700 ਤੱਕ ਪਹੁੰਚ ਗਈ। ਮਾਹਿਰਾਂ ਦਾ ਮੰਨਣਾ ਹੈ ਕਿ ਕਈ ਲੋਕਾਂ ਨੇ ਮੁੜ ਨੌਕਰੀ ਦੀ ਭਾਲ ਸ਼ੁਰੂ ਕੀਤੀ, ਪਰ ਉਨ੍ਹਾਂ ਨੂੰ ਹਾਲੇ ਤੱਕ ਰੁਜ਼ਗਾਰ ਨਹੀਂ ਮਿਲ ਸਕਿਆ।ਕੈਲੋਨਾ ਮਿਸ਼ਨ ਤੋਂ ਬੀ.ਸੀ. ਕੰਜ਼ਰਵੇਟਿਵ ਐਮ.ਐਲ.ਏ. ਗੈਵਿਨ ਡਿਊ ਨੇ ਕਿਹਾ ਕਿ ਉੱਚੀ ਬੇਰੁਜ਼ਗਾਰੀ ਦਾ ਅਸਰ ਸਥਾਨਕ ਅਰਥਚਾਰੇ ’ਤੇ ਸਾਫ਼ ਨਜ਼ਰ ਆ ਰਿਹਾ ਹੈ। ਉਨ੍ਹਾਂ ਕਿਹਾ ਕਿ ਆਰਥਿਕ ਦਬਾਅ ਦਾ ਸਾਹਮਣਾ ਕਰ ਰਹੇ ਲੋਕ ਖਰਚ ਘਟਾ ਰਹੇ ਹਨ, ਜਿਸ ਨਾਲ ਕਾਰੋਬਾਰ ਪ੍ਰਭਾਵਿਤ ਹੋ ਰਹੇ ਹਨ।
ਉਨ੍ਹਾਂ ਇਹ ਵੀ ਦੱਸਿਆ ਕਿ ਪਿਛਲੇ ਇੱਕ ਸਾਲ ਦੌਰਾਨ ਬੀ.ਸੀ. ਵਿੱਚ ਸਰਕਾਰੀ ਖੇਤਰ ਵਿੱਚ 17,300 ਨੌਕਰੀਆਂ ਵਧੀਆਂ ਹਨ, ਜਦਕਿ ਨਿੱਜੀ ਖੇਤਰ ਵਿੱਚ 30,500 ਅਤੇ ਸਵੈ-ਰੋਜ਼ਗਾਰ ਵਿੱਚ 16,300 ਨੌਕਰੀਆਂ ਦੀ ਕਮੀ ਆਈ ਹੈ।ਡਿਊ ਨੇ ਦਾਅਵਾ ਕੀਤਾ ਕਿ 7,000 ਤੋਂ ਵੱਧ ਨੌਜਵਾਨ ਪਿਛਲੇ ਸਾਲ ਦੌਰਾਨ ਬੀ.ਸੀ. ਛੱਡ ਚੁੱਕੇ ਹਨ।ਦੂਜੇ ਪਾਸੇ ਬੀ.ਸੀ. ਦੇ ਜੌਬਜ਼ ਮੰਤਰੀ ਰਵੀ ਕਾਹਲੋਨ ਨੇ ਕਿਹਾ ਕਿ ਸੂਬਾ ਵੱਡੇ ਸੂਬਿਆਂ ਵਿੱਚ ਜੀ.ਡੀ.ਪੀ. ਵਾਧੇ ਵਿੱਚ ਅੱਗੇ ਹੈ ਅਤੇ ਕੈਨੇਡਾ ਵਿੱਚ ਸਭ ਤੋਂ ਉੱਚੀ ਔਸਤ ਘੰਟਾਵਾਰ ਤਨਖ਼ਾਹ 38.65 ਡਾਲਰ ਪ੍ਰਤੀ ਘੰਟਾ ਬੀ.ਸੀ. ਵਿੱਚ ਮਿਲ ਰਹੀ ਹੈ।
ਉਨ੍ਹਾਂ ਕਿਹਾ ਕਿ ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਵੱਲੋਂ ਲਗਾਏ ਜਾ ਰਹੇ ਟੈਰਿਫ਼ ਅਤੇ ਇਰਾਨ ਯੁੱਧ ਵਰਗੀਆਂ ਵਿਸ਼ਵ ਪੱਧਰੀ ਸਥਿਤੀਆਂ ਕਾਰਨ ਆਰਥਿਕ ਅਣਸ਼ਚਿਤਤਾ ਵਧੀ ਹੈ, ਪਰ ਇਸਦੇ ਬਾਵਜੂਦ ਬੀ.ਸੀ. ਇੱਕ ਮਜ਼ਬੂਤ ਅਤੇ ਲਚਕੀਲੀ ਅਰਥਵਿਵਸਥਾ ਤਿਆਰ ਕਰਨ ਲਈ ਕੰਮ ਕਰ ਰਿਹਾ ਹੈ।ਮਈ ਮਹੀਨੇ ਦੌਰਾਨ ਬੀ.ਸੀ. ਵਿੱਚ ਕੁੱਲ 25,200 ਨਵੀਆਂ ਨੌਕਰੀਆਂ ਸ਼ਾਮਲ ਹੋਈਆਂ, ਜਿਨ੍ਹਾਂ ਵਿੱਚੋਂ 14,800 ਨਿੱਜੀ ਖੇਤਰ ਨਾਲ ਸੰਬੰਧਿਤ ਸਨ।ਇਸੇ ਹਫ਼ਤੇ ਕੈਲੋਨਾ ਦੇ ਮੇਅਰ ਟੌਮ ਡਾਇਸ ਦੀ “ਟਾਸਕ ਫੋਰਸ ਆਨ ਇਕਨਾਮਿਕ ਪ੍ਰੋਸਪੈਰਿਟੀ” ਨੇ ਆਪਣੀਆਂ ਪਹਿਲੀਆਂ ਸਿਫਾਰਸ਼ਾਂ ਵੀ ਜਾਰੀ ਕੀਤੀਆਂ ਹਨ। ਟਾਸਕ ਫੋਰਸ ਨੇ ਸ਼ਹਿਰ ਨੂੰ ਸੈਂਟਰਲ ਓਕਾਨਾਗਨ ਇਕਨਾਮਿਕ ਡਿਵੈਲਪਮੈਂਟ ਕਮਿਸ਼ਨ ਤੋਂ ਵੱਖ ਹੋ ਕੇ ਆਪਣੀ ਵੱਖਰੀ ਏਜੰਸੀ ਬਣਾਉਣ ਅਤੇ ਨਵੇਂ ਕਾਨਫਰੰਸ ਸੈਂਟਰ ਦੀ ਸੰਭਾਵਨਾ ਦਾ ਅਧਿਐਨ ਕਰਨ ਦੀ ਸਿਫਾਰਸ਼ ਕੀਤੀ ਹੈ।ਰਾਸ਼ਟਰੀ ਪੱਧਰ ’ਤੇ ਕੈਨੇਡਾ ਵਿੱਚ ਮਈ ਦੌਰਾਨ 88,000 ਨਵੀਆਂ ਨੌਕਰੀਆਂ ਪੈਦਾ ਹੋਈਆਂ ਅਤੇ ਦੇਸ਼ ਦੀ ਬੇਰੁਜ਼ਗਾਰੀ ਦਰ 6.9 ਫੀਸਦੀ ਤੋਂ ਘਟ ਕੇ 6.6 ਫੀਸਦੀ ਰਹਿ ਗਈ।
