ਕੈਲਗਰੀ ਯੂਨੀਵਰਸਿਟੀ ਦੇ ਖੋਜਕਰਤਾ ਨੇ ਸੰਤੁਲਨ ਵਿਗਾੜ ਦੀ ਸਮੱਸਿਆ ਦੇ ਇਲਾਜ ਲਈ ਵਿਕਸਿਤ ਕੀਤੀ ਨਵੀਂ ਤਕਨੀਕ
Researchers at the University of Calgary are developing a new balance rehabilitation approach using a robotic Hexapod platform and a wearable electrical stimulation device called Neurvesta.
ਕੈਲਗਰੀ-ਕੈਨੇਡਾ ਦੀ ਕੈਲਗਰੀ ਯੂਨੀਵਰਸਿਟੀ ਦੇ ਕਾਇਨੀਸਿਓਲੋਜੀ ਵਿਭਾਗ ਵੱਲੋਂ ਸਰੀਰ ਦਾ ਸੰਤੁਲਨ ਬਣਾਈ ਰੱਖਣ ਵਿੱਚ ਆਉਣ ਵਾਲੀਆਂ ਸਮੱਸਿਆਵਾਂ ਦੇ ਇਲਾਜ ਲਈ ਨਵੀਂ ਤਕਨੀਕ ’ਤੇ ਖੋਜ ਕੀਤੀ ਜਾ ਰਹੀ ਹੈ। ਇਸ ਖੋਜ ਵਿੱਚ ਇੱਕ ਵਿਸ਼ੇਸ਼ ਰੋਬੋਟਿਕ ਯੰਤਰ ਅਤੇ ਕੰਨਾਂ ਰਾਹੀਂ ਬਿਜਲਈ ਉਤੇਜਨਾ ਦੇਣ ਵਾਲੇ ਪਹਿਨਣਯੋਗ ਉਪਕਰਨ ਦੀ ਵਰਤੋਂ ਕੀਤੀ ਜਾ ਰਹੀ ਹੈ।
ਯੂਨੀਵਰਸਿਟੀ ਦੇ ਐਸੋਸੀਏਟ ਪ੍ਰੋਫੈਸਰ ਅਤੇ ਖੋਜ ਦੇ ਮੁਖੀ ਰਿਆਨ ਪੀਟਰਜ਼ ਅਨੁਸਾਰ, ਇਸ ਤਕਨੀਕ ਦਾ ਮੁੱਖ ਉਦੇਸ਼ ਬਜ਼ੁਰਗਾਂ ਵਿੱਚ ਸੰਤੁਲਨ ਅਤੇ ਚੱਲਣ-ਫਿਰਨ ਦੀ ਸਮਰੱਥਾ ਨੂੰ ਬਿਹਤਰ ਬਣਾਉਣਾ ਹੈ। ਉਨ੍ਹਾਂ ਦੱਸਿਆ ਕਿ ਇਸ ਖੋਜ ਦੇ ਨਤੀਜੇ ਕਾਫ਼ੀ ਉਤਸ਼ਾਹਜਨਕ ਰਹੇ ਹਨ ਅਤੇ ਭਵਿੱਖ ਵਿੱਚ ਇਸ ਦੀ ਵਰਤੋਂ ਹੋਰ ਉਮਰ ਵਰਗਾਂ ਦੇ ਲੋਕਾਂ ਲਈ ਵੀ ਕੀਤੀ ਜਾ ਸਕਦੀ ਹੈ।
ਖੋਜ ਵਿੱਚ ਵਰਤੇ ਜਾ ਰਹੇ ਰੋਬੋਟਿਕ ਯੰਤਰ ਨੂੰ 'ਹੈਕਸਾਪੌਡ ਪਲੇਟਫਾਰਮ' ਕਿਹਾ ਜਾਂਦਾ ਹੈ। ਇਹ ਛੇ ਮੋਟਰਾਂ ਨਾਲ ਚੱਲਣ ਵਾਲੀਆਂ ਲੱਤਾਂ ਉੱਤੇ ਟਿਕਿਆ ਸ਼ਹਿਦ ਦੇ ਛੱਤੇ ਵਰਗੀ ਬਣਤਰ ਵਾਲਾ ਸਮਤਲ ਪਲੇਟਫਾਰਮ ਹੈ। ਇਸ ਉੱਤੇ ਵਿਅਕਤੀ ਨੂੰ ਸੁਰੱਖਿਆ ਬੈਲਟ ਨਾਲ ਖੜ੍ਹਾ ਕੀਤਾ ਜਾਂਦਾ ਹੈ ਅਤੇ ਮਸ਼ੀਨ ਅਚਾਨਕ ਵੱਖ-ਵੱਖ ਦਿਸ਼ਾਵਾਂ ਵਿੱਚ ਹਿੱਲਦੀ ਹੈ। ਇਸ ਰਾਹੀਂ ਖੋਜਕਰਤਾ ਇਹ ਦੇਖਦੇ ਹਨ ਕਿ ਸਰੀਰ ਦੀਆਂ ਮਾਸਪੇਸ਼ੀਆਂ ਅਤੇ ਸਰੀਰਕ ਮੁਦਰਾ ਅਚਾਨਕ ਹਿਲਜੁਲ ਦੌਰਾਨ ਕਿਵੇਂ ਪ੍ਰਤੀਕਿਰਿਆ ਕਰਦੀਆਂ ਹਨ ਅਤੇ ਵਿਅਕਤੀ ਆਪਣਾ ਸੰਤੁਲਨ ਕਿਵੇਂ ਬਣਾਈ ਰੱਖਦਾ ਹੈ।
ਇਸ ਦੇ ਨਾਲ 'ਨਿਊਰਵੈਸਟਾ' ਨਾਮਕ ਪਹਿਨਣਯੋਗ ਉਪਕਰਨ ਦੀ ਵਰਤੋਂ ਕੀਤੀ ਜਾਂਦੀ ਹੈ, ਜਿਸ ਨੂੰ ਗਰਦਨ ਦੁਆਲੇ ਪਾਇਆ ਜਾਂਦਾ ਹੈ। ਇਸ ਦੀਆਂ ਤਾਰਾਂ ਕੰਨਾਂ ਦੇ ਪਿੱਛੇ ਲਗਾਈਆਂ ਜਾਂਦੀਆਂ ਹਨ, ਜੋ ਅੰਦਰਲੇ ਕੰਨ ਵਿੱਚ ਮੌਜੂਦ ਸੰਤੁਲਨ ਨਾਲ ਸਬੰਧਤ ਅੰਗਾਂ ਨੂੰ ਬਿਜਲਈ ਉਤੇਜਨਾ ਦਿੰਦੀਆਂ ਹਨ। ਉਮਰ ਵਧਣ ਨਾਲ ਇਨ੍ਹਾਂ ਅੰਗਾਂ ਦੀ ਕਾਰਜਕੁਸ਼ਲਤਾ ਘਟਣ ਕਾਰਨ ਲੋਕਾਂ ਨੂੰ ਸੰਤੁਲਨ ਬਣਾਈ ਰੱਖਣ ਵਿੱਚ ਮੁਸ਼ਕਲ ਆਉਣ ਲੱਗਦੀ ਹੈ।
ਖੋਜਕਰਤਾਵਾਂ ਅਨੁਸਾਰ, 20 ਮਿੰਟ ਦੇ ਛੋਟੇ ਸੈਸ਼ਨਾਂ ਰਾਹੀਂ ਛੇ ਹਫ਼ਤਿਆਂ ਤੱਕ ਕੀਤੇ ਗਏ ਅਧਿਐਨ ਵਿੱਚ ਬਜ਼ੁਰਗਾਂ ਦੇ ਸੰਤੁਲਨ ਅਤੇ ਚੱਲਣ-ਫਿਰਨ ਦੀ ਸਮਰੱਥਾ ਵਿੱਚ ਸੁਧਾਰ ਦੇਖਣ ਨੂੰ ਮਿਲਿਆ ਹੈ। ਪਲੇਟਫਾਰਮ ਦੀ ਵਰਤੋਂ ਇਲਾਜ ਤੋਂ ਪਹਿਲਾਂ, ਇਲਾਜ ਦੌਰਾਨ ਅਤੇ ਬਾਅਦ ਵਿੱਚ ਸੰਤੁਲਨ ਦੀ ਜਾਂਚ ਕਰਨ ਲਈ ਵੀ ਕੀਤੀ ਜਾ ਸਕਦੀ ਹੈ।
ਕੈਨੇਡਾ ਦੀ ਪਬਲਿਕ ਹੈਲਥ ਏਜੰਸੀ ਦੀ 2022 ਦੀ ਰਿਪੋਰਟ ਅਨੁਸਾਰ, 65 ਸਾਲ ਜਾਂ ਇਸ ਤੋਂ ਵੱਧ ਉਮਰ ਦੇ ਲੋਕਾਂ ਵਿੱਚ ਸੱਟਾਂ ਕਾਰਨ ਹਸਪਤਾਲ ਦਾਖ਼ਲ ਹੋਣ ਅਤੇ ਮੌਤਾਂ ਦਾ ਸਭ ਤੋਂ ਵੱਡਾ ਕਾਰਨ ਡਿੱਗਣਾ ਹੈ। ਖੋਜਕਰਤਾਵਾਂ ਦਾ ਕਹਿਣਾ ਹੈ ਕਿ ਇਹ ਤਕਨੀਕ ਭਵਿੱਖ ਵਿੱਚ ਚੱਕਰ ਆਉਣ, ਸੜਕ ਹਾਦਸਿਆਂ ਜਾਂ ਖੇਡਾਂ ਦੌਰਾਨ ਸਿਰ ਵਿੱਚ ਸੱਟ ਲੱਗਣ ਕਾਰਨ ਸੰਤੁਲਨ ਦੀ ਸਮੱਸਿਆ ਨਾਲ ਜੂਝ ਰਹੇ ਲੋਕਾਂ ਲਈ ਵੀ ਲਾਭਦਾਇਕ ਹੋ ਸਕਦੀ ਹੈ।
ਫਿਲਹਾਲ ਇਹ ਤਕਨੀਕ ਮੁੱਢਲੇ ਖੋਜ ਪੜਾਅ ਵਿੱਚ ਹੈ ਅਤੇ ਇਸ ਦੀ ਵਰਤੋਂ ਹਸਪਤਾਲਾਂ, ਕਲੀਨਿਕਾਂ ਅਤੇ ਬਜ਼ੁਰਗਾਂ ਦੀ ਦੇਖਭਾਲ ਕਰਨ ਵਾਲੇ ਕੇਂਦਰਾਂ ਵਿੱਚ ਕੀਤੇ ਜਾਣ ਦੀ ਸੰਭਾਵਨਾ ਹੈ।
