ਕੈਲਗਰੀ ਦੀ ਪਾਣੀ ਸਪਲਾਈ ਲਾਈਨ ਦੀ ਜਾਂਚ ਰਿਪੋਰਟ ਜਾਰੀ, ਪ੍ਰਬੰਧਕੀ ਖਾਮੀਆਂ ਅਤੇ ਜਵਾਬਦੇਹੀ ਦੀ ਕਮੀ ਆਈ ਸਾਹਮਣੇ
Alberta has released an independent inspection report into Calgary’s Bearspaw South Feeder Main failures, identifying long-standing weaknesses in governance, infrastructure risk management and accountability. The report found that capital spending between 2006 and 2024 averaged 35% below approved budgets.
ਕੈਲਗਰੀ-ਅਲਬਰਟਾ ਸਰਕਾਰ ਨੇ ਕੈਲਗਰੀ ਸ਼ਹਿਰ ਦੀ ਬੀਅਰਸਪਾਅ ਸਾਊਥ ਫੀਡਰ ਮੇਨ ਪਾਣੀ ਸਪਲਾਈ ਲਾਈਨ ਵਿੱਚ ਹੋਈਆਂ ਦੋ ਵੱਡੀਆਂ ਖਰਾਬੀਆਂ ਸਬੰਧੀ ਸੁਤੰਤਰ ਜਾਂਚ ਰਿਪੋਰਟ ਜਨਤਕ ਕਰ ਦਿੱਤੀ ਹੈ। ਜਾਂਚਕਰਤਾ ਡੇਵਿਡ ਗੋਲਡੀ ਵੱਲੋਂ ਤਿਆਰ ਕੀਤੀ ਰਿਪੋਰਟ ਵਿੱਚ ਸ਼ਹਿਰ ਦੇ ਬੁਨਿਆਦੀ ਢਾਂਚੇ ਦੀ ਦੇਖ-ਰੇਖ, ਜੋਖਮ ਪ੍ਰਬੰਧਨ, ਪ੍ਰਬੰਧਕੀ ਜਵਾਬਦੇਹੀ ਅਤੇ ਵਿਕਾਸ ਕਾਰਜਾਂ ਨੂੰ ਲਾਗੂ ਕਰਨ ਵਿੱਚ ਲੰਬੇ ਸਮੇਂ ਤੋਂ ਚੱਲ ਰਹੀਆਂ ਖਾਮੀਆਂ ਦਾ ਖੁਲਾਸਾ ਕੀਤਾ ਗਿਆ ਹੈ। ਰਿਪੋਰਟ ਵਿੱਚ ਪਾਣੀ ਸਪਲਾਈ ਪ੍ਰਣਾਲੀ ਦੇ ਪ੍ਰਬੰਧਨ ਅਤੇ ਨਿਗਰਾਨੀ ਨੂੰ ਬਿਹਤਰ ਬਣਾਉਣ ਲਈ 20 ਸਿਫ਼ਾਰਸ਼ਾਂ ਕੀਤੀਆਂ ਗਈਆਂ ਹਨ।
ਰਿਪੋਰਟ ਅਨੁਸਾਰ, ਸਾਲ 2006 ਤੋਂ 2024 ਦਰਮਿਆਨ ਕੈਲਗਰੀ ਸ਼ਹਿਰ ਵੱਲੋਂ ਪੂੰਜੀਗਤ ਵਿਕਾਸ ਕਾਰਜਾਂ ਉੱਤੇ ਅਸਲ ਖਰਚ ਮਨਜ਼ੂਰਸ਼ੁਦਾ ਬਜਟ ਨਾਲੋਂ ਔਸਤਨ 35 ਫ਼ੀਸਦੀ ਘੱਟ ਰਿਹਾ। ਇਸ ਤੋਂ ਇਲਾਵਾ, ਸਾਲ 2016 ਤੋਂ 2020 ਦਰਮਿਆਨ ਕੈਲਗਰੀ ਦੇ ਜਲ ਵਿਭਾਗ ਦਾ ਪੂੰਜੀਗਤ ਖਰਚ ਕੌਮੀ ਔਸਤ ਨਾਲੋਂ 46 ਫ਼ੀਸਦੀ ਘੱਟ ਸੀ। ਜਾਂਚਕਰਤਾ ਮੁਤਾਬਕ ਯੋਜਨਾਬੱਧ ਕੰਮਾਂ ਅਤੇ ਅਸਲ ਵਿੱਚ ਕੀਤੇ ਗਏ ਕੰਮਾਂ ਵਿਚਕਾਰ ਲੰਬੇ ਸਮੇਂ ਤੱਕ ਰਹੇ ਇਸ ਅੰਤਰ ਨੇ ਬੁਨਿਆਦੀ ਢਾਂਚੇ ਦੇ ਜੋਖਮ ਵਧਾਏ ਅਤੇ ਪਾਣੀ ਸਪਲਾਈ ਲਾਈਨ ਦੀ ਖਰਾਬ ਹਾਲਤ ਵਿੱਚ ਯੋਗਦਾਨ ਪਾਇਆ ਹੋ ਸਕਦਾ ਹੈ।
ਜਾਂਚ ਵਿੱਚ ਇਹ ਵੀ ਸਾਹਮਣੇ ਆਇਆ ਕਿ ਸਾਬਕਾ ਮੇਅਰ ਨਾਹੀਦ ਨੇਨਸ਼ੀ ਅਤੇ ਉਨ੍ਹਾਂ ਦੇ ਚੀਫ਼ ਆਫ਼ ਸਟਾਫ਼ ਨੂੰ ਸਾਲ 2015-16 ਵਿੱਚ ਤਿਆਰ ਕੀਤੀ ਗਈ ਰੈਫਟੇਲਿਸ ਰਿਪੋਰਟ ਦਾ ਅਗਾਊਂ ਵੇਰਵਾ ਦਿੱਤਾ ਗਿਆ ਸੀ। ਹਾਲਾਂਕਿ, ਇਸ ਰਿਪੋਰਟ ਦੀਆਂ ਜ਼ਿਆਦਾਤਰ ਸਿਫ਼ਾਰਸ਼ਾਂ ਅਤੇ ਪੂਰੀ ਰਿਪੋਰਟ ਬਾਅਦ ਵਿੱਚ ਸਿਟੀ ਕੌਂਸਲ ਸਾਹਮਣੇ ਪੇਸ਼ ਨਹੀਂ ਕੀਤੀਆਂ ਗਈਆਂ। ਨੌਂ ਮੁੱਖ ਸਿਫ਼ਾਰਸ਼ਾਂ ਵਿੱਚੋਂ ਪੰਜ ਕੌਂਸਲ ਤੱਕ ਨਹੀਂ ਪਹੁੰਚੀਆਂ। ਇਨ੍ਹਾਂ ਵਿੱਚ ਵਿੱਤੀ ਜਵਾਬਦੇਹੀ ਅਤੇ ਸੁਤੰਤਰ ਮਾਹਿਰਾਂ ਦੀ ਨਿਗਰਾਨੀ ਨਾਲ ਜੁੜੀਆਂ ਸਿਫ਼ਾਰਸ਼ਾਂ ਵੀ ਸ਼ਾਮਲ ਸਨ।
ਰਿਪੋਰਟ ਮੁਤਾਬਕ, ਪਾਣੀ ਸਪਲਾਈ ਲਾਈਨ ਨਾਲ ਜੁੜੇ ਖਤਰਿਆਂ ਬਾਰੇ ਪਹਿਲਾਂ ਵੀ ਸਮੀਖਿਆਵਾਂ ਅਤੇ ਮੁਲਾਂਕਣਾਂ ਰਾਹੀਂ ਚਿਤਾਵਨੀਆਂ ਦਿੱਤੀਆਂ ਗਈਆਂ ਸਨ, ਪਰ ਉਨ੍ਹਾਂ ਦੇ ਆਧਾਰ ’ਤੇ ਸਮੇਂ ਸਿਰ ਜਾਂਚ, ਲੋੜੀਂਦੇ ਫੰਡਾਂ ਦੀ ਵਿਵਸਥਾ ਅਤੇ ਸੁਧਾਰਾਤਮਕ ਕਾਰਵਾਈ ਨਹੀਂ ਕੀਤੀ ਗਈ। ਸ਼ਹਿਰ ਦੀ ਪ੍ਰਬੰਧਕੀ ਪ੍ਰਣਾਲੀ ਵੀ ਬੁਨਿਆਦੀ ਢਾਂਚੇ ਦੀ ਹਾਲਤ, ਸੇਵਾਵਾਂ ਦੀ ਭਰੋਸੇਯੋਗਤਾ, ਵਿੱਤੀ ਸਮਰੱਥਾ ਅਤੇ ਜੋਖਮਾਂ ਬਾਰੇ ਜਾਣਕਾਰੀ ਨੂੰ ਇਕੱਠਾ ਕਰਕੇ ਫ਼ੈਸਲੇ ਲੈਣ ਵਿੱਚ ਅਸਫਲ ਰਹੀ।
ਜ਼ਿਕਰਯੋਗ ਹੈ ਕਿ ਬੀਅਰਸਪਾਅ ਸਾਊਥ ਫੀਡਰ ਮੇਨ ਵਿੱਚ ਪਹਿਲੀ ਵੱਡੀ ਖਰਾਬੀ 5 ਜੂਨ 2024 ਅਤੇ ਦੂਜੀ 30 ਦਸੰਬਰ 2025 ਨੂੰ ਆਈ ਸੀ। ਇਨ੍ਹਾਂ ਘਟਨਾਵਾਂ ਕਾਰਨ ਕੈਲਗਰੀ ਅਤੇ ਇਸ ਦੀ ਪਾਣੀ ਸਪਲਾਈ ’ਤੇ ਨਿਰਭਰ ਗੁਆਂਢੀ ਭਾਈਚਾਰਿਆਂ ਦੇ ਲੋਕਾਂ ਨੂੰ ਮੁਸ਼ਕਲਾਂ ਦਾ ਸਾਹਮਣਾ ਕਰਨਾ ਪਿਆ ਸੀ। ਇਨ੍ਹਾਂ ਘਟਨਾਵਾਂ ਤੋਂ ਬਾਅਦ ਮਾਰਚ ਵਿੱਚ ਡੇਵਿਡ ਗੋਲਡੀ ਨੂੰ ਸੁਤੰਤਰ ਜਾਂਚਕਰਤਾ ਨਿਯੁਕਤ ਕੀਤਾ ਗਿਆ ਸੀ।
ਜਾਂਚ ਰਿਪੋਰਟ ਵਿੱਚ ਸ਼ਹਿਰ ਵੱਲੋਂ ਪਹਿਲਾਂ ਹੀ ਸ਼ੁਰੂ ਕੀਤੇ ਕੁਝ ਸੁਧਾਰਾਂ ਦਾ ਵੀ ਜ਼ਿਕਰ ਹੈ, ਜਿਨ੍ਹਾਂ ਵਿੱਚ ਵਾਟਰ ਯੂਟਿਲਿਟੀ ਓਵਰਸਾਈਟ ਬੋਰਡ ਦੀ ਸਥਾਪਨਾ ਅਤੇ ਕਾਰਜਕਾਰੀ ਮੁੱਖ ਸੰਚਾਲਨ ਅਧਿਕਾਰੀ ਦੀ ਨਿਯੁਕਤੀ ਸ਼ਾਮਲ ਹੈ। ਹੁਣ ਅਲਬਰਟਾ ਦੇ ਮਿਊਂਸਪਲ ਅਫੇਅਰਜ਼ ਮੰਤਰੀ ਡੈਨ ਵਿਲੀਅਮਜ਼ ਰਿਪੋਰਟ ਦੀਆਂ ਸਿਫ਼ਾਰਸ਼ਾਂ ਦੀ ਸਮੀਖਿਆ ਕਰਨਗੇ ਅਤੇ ਫ਼ੈਸਲਾ ਲੈਣਗੇ ਕਿ ਸ਼ਹਿਰ ਖ਼ਿਲਾਫ਼ ਅਗਲੀ ਕੋਈ ਕਾਰਵਾਈ ਕਰਨ ਦੀ ਲੋੜ ਹੈ ਜਾਂ ਨਹੀਂ। ਸਰਕਾਰ ਨੇ ਸਪੱਸ਼ਟ ਕੀਤਾ ਹੈ ਕਿ ਰਿਪੋਰਟ ਜਨਤਕ ਕਰਨ ਦਾ ਮਤਲਬ ਕਿਸੇ ਅਗਲੀ ਕਾਰਵਾਈ ਦਾ ਫ਼ੈਸਲਾ ਲੈਣਾ ਨਹੀਂ ਹੈ।
