ਅਸਥਾਈ ਵਿਦੇਸ਼ੀ ਕਾਮਿਆਂ ਦੇ ਪ੍ਰੋਗਰਾਮ ਨੂੰ ਰੱਦ ਕਰ ਦੇਣਾ ਚਾਹੀਦੈ ਜਾਂ ਸੁਧਾਰਿਆ ਜਾਣਾ ਚਾਹੀਦੈ: ਪ੍ਰੀਮੀਅਰ ਈਬੀ

ਵਿਕਟੋਰੀਆ-ਬੀਤੇ ਦਿਨੀਂ ਕੰਜ਼ਰਵੇਟਿਵ ਨੇਤਾ ਪੀਅਰੇ ਪੋਇਲੀਵਰ ਨੇ ਅਸਥਾਈ ਵਿਦੇਸ਼ੀ ਕਾਮੇ ਪ੍ਰੋਗਰਾਮ ਨੂੰ ਖਤਮ ਕਰਨ ਦੀ ਮੰਗ ਕੀਤੀ ਜਿੱਥੇ ਉਹਨਾਂ ਨੌਜਵਾਨ ਕੈਨੇਡੀਅਨਾਂ ਵਿੱਚ ਰੁਜ਼ਗਾਰ ਸੰਕਟ ਲਈ ਪ੍ਰੋਗਰਾਮ ਨੂੰ ਜ਼ਿੰਮੇਵਾਰ ਠਹਿਰਾਇਆ ਅਤੇ ਇਸਨੂੰ ਖਤਮ ਕਰਨ ਦੀ ਮੰਗ ਕੀਤੀ। ਜਿਸ ਤੋਂ ਇੱਕ ਦਿਨ ਬਾਅਦ ਬ੍ਰਿਟਿਸ਼ ਕੋਲੰਬੀਆ ਦੇ ਪ੍ਰੀਮੀਅਰ ਡੇਵਿਡ ਈਬੀ ਦਾ ਬਿਆਨ ਸਾਹਮਣੇ ਆਇਆ ਜਿਸ ਵਿੱਚ ਉਹਨਾਂ ਨੇ ਕਿਹਾ ਕਿ ਅਸਥਾਈ ਵਿਦੇਸ਼ੀ ਕਾਮਿਆਂ ਦੇ ਪ੍ਰੋਗਰਾਮ ਨੂੰ “ਰੱਦ ਜਾਂ ਮਹੱਤਵਪੂਰਨ ਤੌਰ ’ਤੇ ਸੁਧਾਰਿਆ ਜਾਣਾ ਚਾਹੀਦਾ ਹੈ”ਕਿਉਂਕਿ ਸੂਬੇ ਵਿੱਚ ਅਜਿਹਾ ਇਮੀਗ੍ਰੇਸ਼ਨ ਸਿਸਟਮ ਨਹੀਂ ਹੋ ਸਕਦਾ ਜੋ ਉੱਚ ਨੌਜਵਾਨ ਬੇਰੁਜ਼ਗਾਰੀ ਨਾਲ ਜੁੜਿਆ ਹੋਵੇ, ਜਦੋਂ ਕਿ ਬੇਘਰ ਆਸਰਾ-ਘਰਾਂ ਅਤੇ ਫੂਡ ਬੈਂਕਾਂ ’ਤੇ ਦਬਾਅ ਪਾਇਆ ਜਾ ਸਕੇ। ਜਾਣਕਾਰੀ ਮੁਤਾਬਕ ਪ੍ਰੀਮੀਅਰ ਈਬੀ ਨੇ ਵੀਰਵਾਰ ਨੂੰ ਕਿਹਾ ਕਿ ਸੂਬੇ ਨੂੰ ਮਹੱਤਵਪੂਰਨ ਵਿੱਤੀ ਮੁਸ਼ਕਲਾਂ” ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ, ਇਸਦਾ ਇੱਕ ਕਾਰਨ ਨੌਜਵਾਨਾਂ ਵਿੱਚ “ਬਹੁਤ ਉੱਚ ਬੇਰੁਜ਼ਗਾਰੀ ਦਰ” ਹੈ, ਜਿਸਨੂੰ ਉਸਨੇ ਅਸਥਾਈ ਵਿਦੇਸ਼ੀ ਕਾਮਿਆਂ ਦੇ ਪ੍ਰੋਗਰਾਮ ਅਤੇ ਅੰਤਰਰਾਸ਼ਟਰੀ ਵਿਦਿਆਰਥੀ ਪ੍ਰੋਗਰਾਮ ਦੋਵਾਂ ਨਾਲ ਜੋੜਿਆ। ਉਹਨਾਂ ਕਿਹਾ ਕਿ ਸਾਡੇ ਕੋਲ ਅਜਿਹਾ ਇਮੀਗ੍ਰੇਸ਼ਨ ਸਿਸਟਮ ਨਹੀਂ ਹੋ ਸਕਦਾ ਜੋ ਸਕੂਲ ਅਤੇ ਰਿਹਾਇਸ਼ ਬਣਾਉਣ ਦੀ ਸਾਡੀ ਯੋਗਤਾ ਤੋਂ ਵੱਧ ਹੋਵੇ ਅਤੇ ਸਾਡੇ ਕੋਲ ਅਜਿਹਾ ਇਮੀਗ੍ਰੇਸ਼ਨ ਪ੍ਰੋਗਰਾਮ ਨਹੀਂ ਹੋ ਸਕਦਾ ਜਿਸਦੇ ਨਤੀਜੇ ਵਜੋਂ ਉੱਚ ਬੇਰੁਜ਼ਗਾਰੀ ਹੋਵੇ। ਇਸ ਮੌਕੇ ਪ੍ਰੀਮੀਅਰ ਈਬੀ ਨੇ ਕਿਹਾ ਕਿ ਬੀ.ਸੀ. “ਇਸ ਮੁੱਦੇ ਵਿੱਚ ਦਿਲਚਸਪੀ ਰੱਖਣ ਵਾਲੇ ਸੂਬਿਆਂ ਨੂੰ ਬੁਲਾਉਣ ਲਈ ਤਿਆਰ ਸੀ ਤਾਂ ਜੋ ਕੈਨੇਡਾ ਵਿੱਚ ਇਮੀਗ੍ਰੇਸ਼ਨ ਅਤੇ ਰਿਹਾਇਸ਼ ਅਤੇ ਸਕੂਲਾਂ ਵਰਗੇ ਮਹੱਤਵਪੂਰਨ ਬੁਨਿਆਦੀ ਢਾਂਚੇ ’ਤੇ ਇਸਦੇ ਪ੍ਰਭਾਵ ਬਾਰੇ “ਗੰਭੀਰ, ਵੱਡੇ” ਗੱਲਬਾਤ ਕੀਤੀ ਜਾ ਸਕੇ।  ਸਟੈਟਿਸਟਿਕਸ ਕੈਨੇਡਾ ਦੇ ਅੰਕੜੇ ਦਰਸਾਉਂਦੇ ਹਨ ਕਿ ਜੁਲਾਈ ਵਿੱਚ ਬੀ.ਸੀ. ਦੀ 15 ਤੋਂ 24 ਸਾਲ ਦੀ ਉਮਰ ਦੇ ਲੋਕਾਂ ਲਈ ਨੌਜਵਾਨ ਬੇਰੁਜ਼ਗਾਰੀ ਦਰ 12.1 ਪ੍ਰਤੀਸ਼ਤ ਸੀ, ਜੋ ਕਿ ਕੈਨੇਡੀਅਨ ਦਰ 14.6 ਪ੍ਰਤੀਸ਼ਤ ਤੋਂ ਘੱਟ ਹੈ ਅਤੇ 2011 ਵਿੱਚ ਕੈਨੇਡਾ ਵਿੱਚ 356,000 ਅਸਥਾਈ ਵਿਦੇਸ਼ੀ ਕਾਮੇ ਸਨ, ਜੋ 2021 ਵਿੱਚ ਵੱਧ ਕੇ 845,000 ਹੋ ਗਏ ਹਨ। ਕੈਨੇਡਾ ਨੇ ਇਸ ਸਾਲ 82,000 ਨਵੇਂ ਅਸਥਾਈ ਵਿਦੇਸ਼ੀ ਕਾਮਿਆਂ ਨੂੰ ਦਾਖਲ ਕਰਨ ਦਾ ਟੀਚਾ ਰੱਖਿਆ ਹੈ।