ਅਲਬਰਟਾ ਦੇ ਕੈਂਪਗ੍ਰਾਊਂਡ ਵਿੱਚ ਚੱਕਰਵਾਤੀ ਤੂਫ਼ਾਨ ਦੀ ਤਬਾਹੀ, 5 ਲੋਕ ਜ਼ਖ਼ਮੀ; ਕਈ ਟ੍ਰੇਲਰ ਤਬਾਹ

ਐਡਮੰਟਨ-ਅਲਬਰਟਾ ਦੇ ਡਿਲਬੈਰੀ ਲੇਕ ਪ੍ਰੋਵਿੰਸ਼ੀਅਲ ਪਾਰਕ ਕੈਂਪਗ੍ਰਾਊਂਡ ਵਿੱਚ ਬੁੱਧਵਾਰ ਸ਼ਾਮ ਆਏ ਇੱਕ ਤਾਕਤਵਰ ਚੱਕਰਵਾਤੀ ਤੂਫ਼ਾਨ ਕਾਰਨ ਘੱਟੋ-ਘੱਟ ਪੰਜ ਲੋਕ ਜ਼ਖ਼ਮੀ ਹੋ ਗਏ, ਜਦਕਿ ਕਈ ਕੈਂਪਿੰਗ ਟ੍ਰੇਲਰ ਬੁਰੀ ਤਰ੍ਹਾਂ ਨੁਕਸਾਨੇ ਗਏ ਅਤੇ ਕੁਝ ਪੂਰੀ ਤਰ੍ਹਾਂ ਤਬਾਹ ਹੋ ਗਏ।ਇਹ ਚੱਕਰਵਾਤੀ ਤੂਫ਼ਾਨ ਸ਼ਾਮ ਕਰੀਬ 8:30 ਵਜੇ ਡਿਲਬੈਰੀ ਲੇਕ ਪ੍ਰੋਵਿੰਸ਼ੀਅਲ ਪਾਰਕ ਕੈਂਪਗ੍ਰਾਊਂਡ ਵਿੱਚ ਆਇਆ, ਜੋ ਐਡਮੰਟਨ ਤੋਂ ਲਗਭਗ 300 ਕਿਲੋਮੀਟਰ ਦੱਖਣ-ਪੂਰਬ ਅਤੇ ਸਸਕੈਚਵਨ ਦੀ ਸਰਹੱਦ ਨੇੜੇ ਸਥਿਤ ਹੈ।

RCMP ਮੁਤਾਬਕ ਐਮਰਜੈਂਸੀ ਸੇਵਾਵਾਂ ਨੇ ਤੁਰੰਤ ਕੈਂਪਗ੍ਰਾਊਂਡ ਨੂੰ ਖਾਲੀ ਕਰਵਾ ਕੇ ਸਾਰੇ ਕੈਂਪਰਾਂ ਨੂੰ ਨੇੜਲੇ ਪਿੰਡ ਚੌਵਿਨ (Chauvin) ਭੇਜ ਦਿੱਤਾ। ਉਸ ਸਮੇਂ ਕੈਂਪਗ੍ਰਾਊਂਡ ਵਿੱਚ 42 ਕੈਂਪਿੰਗ ਸਾਈਟਾਂ 'ਤੇ ਲੋਕ ਮੌਜੂਦ ਸਨ।ਚੌਵਿਨ ਕਮਿਊਨਿਟੀ ਸੈਂਟਰ ਵਿੱਚ ਰਿਸੈਪਸ਼ਨ ਸੈਂਟਰ ਸਥਾਪਤ ਕਰਨ ਤੋਂ ਲਗਭਗ ਤਿੰਨ ਘੰਟਿਆਂ ਬਾਅਦ, ਰਾਤ 1:30 ਵਜੇ ਤੱਕ ਸਾਰੇ ਕੈਂਪਰਾਂ ਦੀ ਸੁਰੱਖਿਅਤ ਗਿਣਤੀ ਪੂਰੀ ਕਰ ਲਈ ਗਈ।ਵੇਨਰਾਈਟ ਮਿਊਂਸਪਲ ਡਿਸਟ੍ਰਿਕਟ ਦੇ ਸਹਾਇਕ ਪ੍ਰਸ਼ਾਸਕ ਨੀਲ ਲੂਨਨ ਨੇ ਦੱਸਿਆ ਕਿ ਇਸ ਘਟਨਾ ਵਿੱਚ ਪੰਜ ਲੋਕ ਜ਼ਖ਼ਮੀ ਹੋਏ ਹਨ। RCMP ਅਨੁਸਾਰ ਤਿੰਨ ਜ਼ਖ਼ਮੀਆਂ ਨੂੰ ਹਸਪਤਾਲ ਪਹੁੰਚਾਇਆ ਗਿਆ ਹੈ, ਹਾਲਾਂਕਿ ਉਨ੍ਹਾਂ ਦੀਆਂ ਸੱਟਾਂ ਦੀ ਗੰਭੀਰਤਾ ਬਾਰੇ ਅਜੇ ਜਾਣਕਾਰੀ ਨਹੀਂ ਦਿੱਤੀ ਗਈ।

ਚੱਕਰਵਾਤੀ ਤੂਫ਼ਾਨ ਦੇ ਖਤਰੇ ਨੂੰ ਦੇਖਦੇ ਹੋਏ ਅਲਬਰਟਾ ਐਮਰਜੈਂਸੀ ਅਲਰਟ ਨੇ ਸ਼ਾਮ 7:22 ਵਜੇ ਵੇਨਰਾਈਟ, ਪ੍ਰੋਵੋਸਟ ਅਤੇ ਚੌਵਿਨ ਖੇਤਰਾਂ ਲਈ ਚੇਤਾਵਨੀ ਜਾਰੀ ਕੀਤੀ ਸੀ, ਜਿਸ ਨੂੰ ਬਾਅਦ ਵਿੱਚ ਰੱਦ ਕਰ ਦਿੱਤਾ ਗਿਆ।

Environment Canada ਨੇ ਇਸ ਚੱਕਰਵਾਤੀ ਤੂਫ਼ਾਨ ਨੂੰ 30 ਕਿਲੋਮੀਟਰ ਪ੍ਰਤੀ ਘੰਟਾ ਦੀ ਰਫ਼ਤਾਰ ਨਾਲ ਅੱਗੇ ਵਧਦਾ ਹੋਇਆ "ਬਹੁਤ ਹੀ ਖਤਰਨਾਕ ਅਤੇ ਜਾਨਲੇਵਾ ਸਥਿਤੀ" ਕਰਾਰ ਦਿੱਤਾ।ਘਟਨਾ ਤੋਂ ਬਾਅਦ ਵੇਨਰਾਈਟ RCMP, ਆਸ-ਪਾਸ ਦੀਆਂ ਪੁਲਿਸ ਟੀਮਾਂ, ਵਿਸ਼ੇਸ਼ ਐਮਰਜੈਂਸੀ ਦਸਤੇ ਅਤੇ ਐਡਮੰਟਨ ਪੁਲਿਸ ਦਾ ਹੈਲੀਕਾਪਟਰ ਵੀ ਮੌਕੇ 'ਤੇ ਭੇਜਿਆ ਗਿਆ। ਅਲਬਰਟਾ RCMP ਦੇ ਡਿਵੀਜ਼ਨਲ ਐਮਰਜੈਂਸੀ ਆਪਰੇਸ਼ਨ ਸੈਂਟਰ (DEOC) ਨੂੰ ਵੀ ਸਰਗਰਮ ਕਰਕੇ ਵਾਧੂ ਸਰੋਤ ਤਾਇਨਾਤ ਕੀਤੇ ਗਏ।

RCMP ਨੇ ਦੱਸਿਆ ਕਿ ਪਹਿਲੀ ਸੂਚਨਾ ਮਿਲਣ ਤੋਂ ਦੋ ਘੰਟਿਆਂ ਦੇ ਅੰਦਰ ਹੀ ਮੌਕੇ 'ਤੇ ਸਾਂਝਾ ਕਮਾਂਡ ਸੈਂਟਰ ਸਥਾਪਤ ਕਰ ਦਿੱਤਾ ਗਿਆ ਅਤੇ ਖੋਜ ਤੇ ਬਚਾਅ ਮੁਹਿੰਮ ਸ਼ੁਰੂ ਕਰ ਦਿੱਤੀ ਗਈ।ਵੇਨਰਾਈਟ ਮਿਊਂਸਪਲ ਡਿਸਟ੍ਰਿਕਟ ਨੇ ਲੋਕਾਂ ਨੂੰ ਅਪੀਲ ਕੀਤੀ ਕਿ ਉਹ ਪ੍ਰਭਾਵਿਤ ਖੇਤਰ ਤੋਂ ਦੂਰ ਰਹਿਣ ਤਾਂ ਜੋ ਐਮਰਜੈਂਸੀ ਟੀਮਾਂ ਆਪਣਾ ਕੰਮ ਬਿਨਾਂ ਰੁਕਾਵਟ ਜਾਰੀ ਰੱਖ ਸਕਣ।ਇਸ ਦੌਰਾਨ Northern Tornadoes Project (NTP) ਨੇ ਵੀਡੀਓ ਅਤੇ ਤਸਵੀਰਾਂ ਦੇ ਆਧਾਰ 'ਤੇ ਪੁਸ਼ਟੀ ਕੀਤੀ ਹੈ ਕਿ ਐਡਮੰਟਨ ਦੇ ਦੱਖਣ-ਪੂਰਬੀ ਖੇਤਰ ਵਿੱਚ ਦੋ ਚੱਕਰਵਾਤੀ ਤੂਫ਼ਾਨ ਆਏ ਸਨ। ਇੱਕ ਡਿਲਬੈਰੀ ਲੇਕ ਕੈਂਪਗ੍ਰਾਊਂਡ ਵਿੱਚ ਅਤੇ ਦੂਜਾ ਪੈਰਾਡਾਈਜ਼ ਵੈਲੀ ਦੇ ਦੱਖਣ-ਪੱਛਮ ਵਿੱਚ ਆਇਆ।ਸੰਸਥਾ ਅਨੁਸਾਰ ਡਿਲਬੈਰੀ ਲੇਕ ਵਾਲਾ ਚੱਕਰਵਾਤੀ ਤੂਫ਼ਾਨ ਕੈਂਪਗ੍ਰਾਊਂਡ ਵਿੱਚੋਂ ਲੰਘਿਆ, ਜਿਸ ਕਾਰਨ ਟ੍ਰੇਲਰ ਉਲਟ ਗਏ, ਦਰੱਖਤ ਡਿੱਗ ਗਏ ਅਤੇ ਕੁਝ ਲੋਕ ਜ਼ਖ਼ਮੀ ਹੋਏ। ਇਸ ਤੋਂ ਬਾਅਦ ਇਹ ਚੱਕਰਵਾਤੀ ਤੂਫ਼ਾਨ ਸਸਕੈਚਵਨ ਵੱਲ ਵਧ ਗਿਆ।Northern Tornadoes Project ਨੇ ਦੱਸਿਆ ਕਿ ਉਸ ਦੀ ਨੁਕਸਾਨ ਮੁਲਾਂਕਣ ਟੀਮ ਡਿਲਬੈਰੀ ਲੇਕ ਪਹੁੰਚ ਕੇ ਘਟਨਾ ਦੀ ਵਿਸਥਾਰ ਨਾਲ ਜਾਂਚ ਕਰੇਗੀ।