ਅਮਰੀਕਾ ਜਾਣ ਵਾਲੇ ਬੀ.ਸੀ. ਦੇ ਯਾਤਰੀਆਂ ਦੀ ਗਿਣਤੀ ਵਿੱਚ ਹਲਕਾ ਵਾਧਾ
ਲੈਂਗਲੀ-ਬ੍ਰਿਟਿਸ਼ ਕੋਲੰਬੀਆ (ਬੀ.ਸੀ.) ਤੋਂ ਅਮਰੀਕਾ ਜਾਣ ਵਾਲੇ ਯਾਤਰੀਆਂ ਦੀ ਗਿਣਤੀ ਵਿੱਚ ਹਾਲ ਹੀ ਵਿੱਚ ਕੁਝ ਵਾਧਾ ਦੇਖਣ ਨੂੰ ਮਿਲਿਆ ਹੈ, ਪਰ ਸਰਹੱਦ ਪਾਰ ਆਵਾਜਾਈ ਅਜੇ ਵੀ 2024 ਦੇ ਪੱਧਰ ਤੋਂ ਕਾਫ਼ੀ ਹੇਠਾਂ ਹੈ।ਸਟੈਟਿਸਟਿਕਸ ਕੈਨੇਡਾ ਦੇ ਅੰਕੜਿਆਂ ਅਨੁਸਾਰ ਮਈ 2026 ਦੌਰਾਨ ਕੈਨੇਡੀਅਨ ਨਿਵਾਸੀਆਂ ਵੱਲੋਂ ਅਮਰੀਕਾ ਦੀਆਂ ਯਾਤਰਾਵਾਂ ਵਿੱਚ 9.5 ਫੀਸਦੀ ਵਾਧਾ ਦਰਜ ਕੀਤਾ ਗਿਆ। ਹਾਲਾਂਕਿ ਮਾਹਿਰਾਂ ਦਾ ਕਹਿਣਾ ਹੈ ਕਿ ਇਹ ਵਾਧਾ ਪਿਛਲੇ ਸਮੇਂ ਤੋਂ ਟਲੀਆਂ ਹੋਈਆਂ ਯਾਤਰਾਵਾਂ ਦਾ ਨਤੀਜਾ ਹੋ ਸਕਦਾ ਹੈ, ਨਾ ਕਿ ਸਰਹੱਦ ਪਾਰ ਯਾਤਰਾ ਪ੍ਰਤੀ ਰੁਝਾਨ ਵਿੱਚ ਵੱਡੀ ਤਬਦੀਲੀ ਦਾ।
ਬੀ.ਸੀ. ਅਤੇ ਵਾਸ਼ਿੰਗਟਨ ਰਾਜ ਦੀਆਂ ਆਵਾਜਾਈ ਏਜੰਸੀਆਂ ਵੱਲੋਂ ਜਾਰੀ ਅੰਕੜਿਆਂ ਮੁਤਾਬਕ, ਐਲਡਰਗਰੋਵ-ਲਿੰਡਨ ਸਰਹੱਦੀ ਚੌਕੀ 'ਤੇ ਵਿਕਟੋਰੀਆ ਡੇ ਲੰਬੇ ਵੀਕਐਂਡ ਦੌਰਾਨ ਬੀ.ਸੀ. ਨੰਬਰ ਪਲੇਟ ਵਾਲੇ ਵਾਹਨਾਂ ਦੀ ਗਿਣਤੀ 2025 ਦੇ 409 ਤੋਂ ਵੱਧ ਕੇ 2026 ਵਿੱਚ 567 ਹੋ ਗਈ। ਪਰ ਇਹ ਗਿਣਤੀ 2024 ਵਿੱਚ ਦਰਜ ਕੀਤੇ ਗਏ 1,511 ਵਾਹਨਾਂ ਦੇ ਮੁਕਾਬਲੇ ਅਜੇ ਵੀ ਕਾਫ਼ੀ ਘੱਟ ਹੈ।ਪੀਸ ਆਰਚ, ਪੈਸੀਫਿਕ ਹਾਈਵੇ, ਲਿੰਡਨ ਅਤੇ ਸੁਮਾਸ ਸਰਹੱਦੀ ਚੌਕੀਆਂ ਦੇ ਕੁੱਲ ਅੰਕੜਿਆਂ ਅਨੁਸਾਰ ਮਈ 2026 ਵਿੱਚ ਬੀ.ਸੀ. ਪਲੇਟਾਂ ਵਾਲੇ 1,34,992 ਵਾਹਨ ਅਮਰੀਕਾ ਗਏ। ਇਹ ਗਿਣਤੀ 2025 ਦੇ ਮੁਕਾਬਲੇ 18 ਫੀਸਦੀ ਵੱਧ ਹੈ, ਪਰ 2024 ਦੇ 2,13,356 ਵਾਹਨਾਂ ਦੇ ਮੁਕਾਬਲੇ 37 ਫੀਸਦੀ ਘੱਟ ਹੈ।
ਗ੍ਰੇਟਰ ਲੈਂਗਲੀ ਚੈਂਬਰ ਆਫ ਕਾਮਰਸ ਦੇ ਮੁੱਖ ਕਾਰਜਕਾਰੀ ਅਧਿਕਾਰੀ Cory Redekop ਦਾ ਮੰਨਣਾ ਹੈ ਕਿ ਹਾਲੀਆ ਵਾਧੇ ਦਾ ਕਾਰਨ ਉਹ ਯਾਤਰਾਵਾਂ ਹਨ ਜੋ ਲੋਕਾਂ ਨੇ ਲੰਬੇ ਸਮੇਂ ਤੋਂ ਟਾਲੀਆਂ ਹੋਈਆਂ ਸਨ।ਉਨ੍ਹਾਂ ਕਿਹਾ ਕਿ ਪਰਿਵਾਰਕ ਸਮਾਗਮਾਂ, ਕਾਰੋਬਾਰੀ ਮੀਟਿੰਗਾਂ ਅਤੇ ਰਿਸ਼ਤੇਦਾਰਾਂ ਨਾਲ ਮੁਲਾਕਾਤਾਂ ਲਈ ਲੋਕ ਮੁੜ ਯਾਤਰਾ ਕਰ ਰਹੇ ਹਨ। "ਆਖ਼ਰਕਾਰ ਦਾਦਾ-ਦਾਦੀ ਆਪਣੇ ਪੋਤਰੇ-ਪੋਤਰੀਆਂ ਨੂੰ ਮਿਲਣਾ ਚਾਹੁੰਦੇ ਹਨ ਅਤੇ ਸਰਹੱਦ ਦੇ ਦੋਵਾਂ ਪਾਸਿਆਂ ਰਹਿੰਦੇ ਪਰਿਵਾਰਾਂ ਅਤੇ ਦੋਸਤਾਂ ਦੇ ਰਿਸ਼ਤੇ ਬਹੁਤ ਪੁਰਾਣੇ ਹਨ," ਉਨ੍ਹਾਂ ਕਿਹਾ।ਹਾਲਾਂਕਿ, ਖਰੀਦਦਾਰੀ ਅਤੇ ਸੈਰ-ਸਪਾਟੇ ਦੇ ਮਾਮਲੇ ਵਿੱਚ ਬਹੁਤ ਸਾਰੇ ਬੀ.ਸੀ. ਵਾਸੀ ਅਜੇ ਵੀ ਸਥਾਨਕ ਕਾਰੋਬਾਰਾਂ ਅਤੇ ਕੈਨੇਡੀਅਨ ਸੈਰ-ਸਪਾਟਾ ਸਥਾਨਾਂ ਨੂੰ ਤਰਜੀਹ ਦੇ ਰਹੇ ਹਨ।
ਰੇਡੇਕੋਪ ਨੇ ਕਿਹਾ ਕਿ ਕੈਨੇਡਾ ਅਤੇ ਅਮਰੀਕਾ ਦੇ ਲੋਕਾਂ ਅਤੇ ਕਾਰੋਬਾਰਾਂ ਵਿਚਾਲੇ ਰਿਸ਼ਤੇ ਕਾਫ਼ੀ ਡੂੰਘੇ ਅਤੇ ਪੁਰਾਣੇ ਹਨ। ਉਨ੍ਹਾਂ ਆਸ ਪ੍ਰਗਟਾਈ ਕਿ ਵਪਾਰਕ ਵਿਵਾਦਾਂ ਦਾ ਹੱਲ ਨਿਕਲਣ ਨਾਲ ਦੋਵਾਂ ਦੇਸ਼ਾਂ ਵਿਚਾਲੇ ਸੰਬੰਧ ਮੁੜ ਮਜ਼ਬੂਤ ਹੋਣਗੇ ਅਤੇ ਸਰਹੱਦ ਪਾਰ ਆਵਾਜਾਈ ਵਿੱਚ ਵੀ ਵਾਧਾ ਹੋਵੇਗਾ।ਮਾਹਿਰਾਂ ਅਨੁਸਾਰ ਅਮਰੀਕੀ ਰਾਸ਼ਟਰਪਤੀ Donald Trump ਵੱਲੋਂ ਵਪਾਰਕ ਟਕਰਾਅ ਅਤੇ ਕੈਨੇਡਾ ਸਬੰਧੀ ਦਿੱਤੇ ਗਏ ਵਿਵਾਦਿਤ ਬਿਆਨਾਂ ਤੋਂ ਬਾਅਦ ਬਹੁਤ ਸਾਰੇ ਕੈਨੇਡੀਅਨਾਂ ਨੇ ਅਮਰੀਕਾ ਦੀਆਂ ਯਾਤਰਾਵਾਂ ਘਟਾ ਦਿੱਤੀਆਂ ਸਨ, ਜਿਸਦਾ ਅਸਰ ਅਜੇ ਵੀ ਅੰਕੜਿਆਂ ਵਿੱਚ ਸਪੱਸ਼ਟ ਤੌਰ 'ਤੇ ਨਜ਼ਰ ਆ ਰਿਹਾ ਹੈ।
