ਫਿਸ਼ ਕ੍ਰੀਕ ਪਾਰਕ ਵਿੱਚ ਲੜੀਵਾਰ ਜਿਨਸੀ ਹਮਲਿਆਂ ਨਾਲ ਦਹਿਸ਼ਤ
ਕੈਲਗਰੀ-ਕੈਲਗਰੀ ਦੇ ਫਿਸ਼ ਕ੍ਰੀਕ ਪਾਰਕ ਵਿੱਚ ਹੋਏ ਲੜੀਵਾਰ ਜਿਨਸੀ ਹਮਲਿਆਂ ਨੇ ਲੋਕਾਂ ਵਿੱਚ ਚਿੰਤਾ ਦਾ ਮਾਹੌਲ ਪੈਦਾ ਕਰ ਦਿੱਤਾ ਹੈ। ਕੈਲਗਰੀ ਪੁਲਿਸ ਦਾ ਮੰਨਣਾ ਹੈ ਕਿ ਪਾਰਕ ਵਿੱਚ ਹੋਈਆਂ ਕਈ ਘਟਨਾਵਾਂ ਦੇ ਪਿੱਛੇ ਇੱਕੋ ਹੀ ਸ਼ੱਕੀ ਵਿਅਕਤੀ ਦਾ ਹੱਥ ਹੋ ਸਕਦਾ ਹੈ।
ਪੁਲਿਸ ਅਨੁਸਾਰ ਸਭ ਤੋਂ ਤਾਜ਼ਾ ਘਟਨਾ ਸ਼ਨੀਵਾਰ ਦੁਪਹਿਰ ਕਰੀਬ 2:30 ਵਜੇ ਵਾਪਰੀ, ਜਦੋਂ ਇੱਕ ਮਹਿਲਾ ਸੂ ਹਿਗਿਨਜ਼ ਬ੍ਰਿਜ ਅਤੇ ਮੈਲਾਰਡ ਪੌਇੰਟ ਨੇੜੇ ਜੌਗਿੰਗ ਕਰ ਰਹੀ ਸੀ। ਦੋਸ਼ ਹੈ ਕਿ ਕਾਲੇ ਰੰਗ ਦੀ BMX ਸਾਈਕਲ ’ਤੇ ਸਵਾਰ ਇੱਕ ਵਿਅਕਤੀ ਪਿੱਛੋਂ ਆਇਆ ਅਤੇ ਉਸ ਨਾਲ ਜਿਨਸੀ ਹਮਲਾ ਕੀਤਾ।
ਜਾਂਚ ਅਧਿਕਾਰੀਆਂ ਦਾ ਮੰਨਣਾ ਹੈ ਕਿ ਇਹ ਘਟਨਾ ਫਿਸ਼ ਕ੍ਰੀਕ ਪਾਰਕ ਵਿੱਚ ਪਹਿਲਾਂ ਹੋਏ ਘੱਟੋ-ਘੱਟ ਦੋ ਹੋਰ ਹਮਲਿਆਂ ਨਾਲ ਜੁੜੀ ਹੋ ਸਕਦੀ ਹੈ।ਪਹਿਲੀ ਘਟਨਾ 20 ਅਪ੍ਰੈਲ ਦੀ ਸ਼ਾਮ ਕਰੀਬ 5:30 ਵਜੇ ਵਾਪਰੀ ਸੀ, ਜਦੋਂ ਮੈਲਾਰਡ ਪੌਇੰਟ ਨੇੜੇ ਦੌੜ ਰਹੀ ਇੱਕ ਮਹਿਲਾ ’ਤੇ ਹਮਲਾ ਕੀਤਾ ਗਿਆ। ਪੁਲਿਸ ਮੁਤਾਬਕ ਹਮਲਾਵਰ ਪਹਿਲਾਂ ਪਾਰਕ ਦੇ ਵਾਸ਼ਰੂਮ ਨੇੜੇ ਮਹਿਲਾ ਨੂੰ ਦੇਖਦਾ ਰਿਹਾ ਅਤੇ ਬਾਅਦ ਵਿੱਚ ਈ-ਸਕੂਟਰ ’ਤੇ ਆ ਕੇ ਉਸ ਨਾਲ ਜਿਨਸੀ ਹਮਲਾ ਕੀਤਾ। ਪੁਲਿਸ ਦਾ ਕਹਿਣਾ ਹੈ ਕਿ ਇਸ ਘਟਨਾ ਤੋਂ ਲਗਭਗ 20 ਮਿੰਟ ਪਹਿਲਾਂ ਵੀ ਉਸੇ ਸ਼ੱਕੀ ਨੇ ਪਾਰਕ ਵਿੱਚ ਇੱਕ ਹੋਰ ਮਹਿਲਾ ਨੂੰ ਨਿਸ਼ਾਨਾ ਬਣਾਇਆ ਸੀ।
ਕੈਲਗਰੀ ਪੁਲਿਸ ਚੀਫ਼ ਕੇਟੀ ਮੈਕਲੇਲਨ ਨੇ ਇਸ ਮਾਮਲੇ ਨੂੰ ਬਹੁਤ ਹੀ ਚਿੰਤਾਜਨਕ ਕਰਾਰ ਦਿੰਦਿਆਂ ਕਿਹਾ ਕਿ ਜਾਂਚ ਨੂੰ ਸਭ ਤੋਂ ਉੱਚੀ ਤਰਜੀਹ ਦਿੱਤੀ ਜਾ ਰਹੀ ਹੈ। ਉਨ੍ਹਾਂ ਕਿਹਾ ਕਿ ਪੁਲਿਸ ਦੀਆਂ ਟੀਮਾਂ ਇਸ ਕੇਸ ’ਤੇ ਪੂਰਾ ਸਮਾਂ ਕੰਮ ਕਰ ਰਹੀਆਂ ਹਨ ਅਤੇ ਲੋਕਾਂ ਦੀ ਸੁਰੱਖਿਆ ਯਕੀਨੀ ਬਣਾਉਣ ਲਈ ਹਰ ਸੰਭਵ ਕੋਸ਼ਿਸ਼ ਕੀਤੀ ਜਾ ਰਹੀ ਹੈ।
ਸ਼ੱਕੀ ਵਿਅਕਤੀ ਦੀ ਉਮਰ ਦੇਰ ਨਾਲੀ ਕਿਸ਼ੋਰ ਅਵਸਥਾ ਤੋਂ ਲੈ ਕੇ 20 ਸਾਲ ਦੇ ਸ਼ੁਰੂਆਤੀ ਦੌਰ ਵਿੱਚ ਦੱਸੀ ਜਾ ਰਹੀ ਹੈ। ਉਹ ਲਗਭਗ ਛੇ ਫੁੱਟ ਲੰਬਾ, ਗੋਰੇ ਰੰਗ ਅਤੇ ਛੋਟੇ ਸੁਨਹਿਰੇ ਵਾਲਾਂ ਵਾਲਾ ਹੈ। ਆਖਰੀ ਵਾਰ ਉਸ ਨੂੰ ਕਾਲੀ ਹੁੱਡੀ, ਜਿਸ ਦੇ ਪਾਸੇ ਰੰਗੀਨ ਡਿਜ਼ਾਈਨ ਸੀ, ਅਤੇ ਨੀਲੀ ਜੀਨਸ ਪਹਿਨੇ ਦੇਖਿਆ ਗਿਆ।ਪੁਲਿਸ ਨੇ ਲੋਕਾਂ ਨੂੰ ਅਪੀਲ ਕੀਤੀ ਹੈ ਕਿ ਜੇ ਕਿਸੇ ਨਾਲ ਇਸ ਤਰ੍ਹਾਂ ਦੀ ਕੋਈ ਘਟਨਾ ਵਾਪਰੀ ਹੈ ਤਾਂ ਉਹ ਬਿਨਾਂ ਡਰ ਦੇ ਅੱਗੇ ਆ ਕੇ ਜਾਣਕਾਰੀ ਸਾਂਝੀ ਕਰਨ। ਪੁਲਿਸ ਨੇ ਇਹ ਵੀ ਕਿਹਾ ਕਿ ਕਿਸੇ ਵੀ ਤਰ੍ਹਾਂ ਦੀ ਜਾਣਕਾਰੀ ਰੱਖਣ ਵਾਲੇ ਲੋਕ 403-266-1234 ’ਤੇ ਸੰਪਰਕ ਕਰ ਸਕਦੇ ਹਨ ਜਾਂ ਗੁਪਤ ਤੌਰ ’ਤੇ ਕ੍ਰਾਈਮ ਸਟਾਪਰਜ਼ ਨੂੰ ਸੂਚਨਾ ਦੇ ਸਕਦੇ ਹਨ।
ਇਸ ਘਟਨਾ ਤੋਂ ਬਾਅਦ ਫਿਸ਼ ਕ੍ਰੀਕ ਪਾਰਕ ਵਿੱਚ ਆਉਣ ਵਾਲੇ ਲੋਕਾਂ ਵਿੱਚ ਡਰ ਅਤੇ ਚਿੰਤਾ ਦਾ ਮਾਹੌਲ ਬਣਿਆ ਹੋਇਆ ਹੈ, ਜਦਕਿ ਪੁਲਿਸ ਵੱਲੋਂ ਇਲਾਕੇ ਵਿੱਚ ਗਸ਼ਤ ਅਤੇ ਜਾਂਚ ਹੋਰ ਤੇਜ਼ ਕਰ ਦਿੱਤੀ ਗਈ ਹੈ।
