ਦਫ਼ਤਰੀ ਥਾਂ ਦੀ ਕਮੀ ਕਾਰਨ ਗਲੋਬਲ ਅਫੇਅਰਜ਼ ਕੈਨੇਡਾ ਨੇ 4 ਦਿਨਾਂ ਦੀ ਹਾਜ਼ਰੀ ਨੀਤੀ ਵਿੱਚ ਦਿੱਤੀ ਰਾਹਤ

ਓਟਵਾ-ਗਲੋਬਲ ਅਫੇਅਰਜ਼ ਕੈਨੇਡਾ ਨੇ ਦਫ਼ਤਰਾਂ ਵਿੱਚ ਥਾਂ ਦੀ ਕਮੀ ਕਾਰਨ ਕੁਝ ਕਰਮਚਾਰੀਆਂ ਲਈ ਹਫ਼ਤੇ ਵਿੱਚ ਚਾਰ ਦਿਨ ਦਫ਼ਤਰ ਹਾਜ਼ਰੀ ਦੀ ਨਵੀਂ ਨੀਤੀ ਨੂੰ ਅਸਥਾਈ ਤੌਰ ‘ਤੇ ਟਾਲ ਦਿੱਤਾ ਹੈ।ਟਰੇਜ਼ਰੀ ਬੋਰਡ ਆਫ ਕੈਨੇਡਾ ਸੈਕਟਰੀਏਟ ਵੱਲੋਂ ਜਾਰੀ ਨਵੀਆਂ ਹਦਾਇਤਾਂ ਮੁਤਾਬਕ, 4 ਮਈ ਤੋਂ ਉੱਚ ਅਧਿਕਾਰੀਆਂ (ਐਗਜ਼ੈਕਟਿਵਜ਼) ਲਈ ਹਫ਼ਤੇ ਦੇ ਪੰਜੇ ਦਿਨ ਦਫ਼ਤਰ ਵਿੱਚ ਹਾਜ਼ਰੀ ਲਾਜ਼ਮੀ ਹੋਵੇਗੀ, ਜਦਕਿ ਹੋਰ ਸਰਕਾਰੀ ਕਰਮਚਾਰੀਆਂ ਲਈ 6 ਜੁਲਾਈ ਤੋਂ ਘੱਟੋ-ਘੱਟ ਚਾਰ ਦਿਨ ਦਫ਼ਤਰ ਆਉਣਾ ਲਾਜ਼ਮੀ ਕੀਤਾ ਗਿਆ ਸੀ।ਹਾਲਾਂਕਿ, ਗਲੋਬਲ ਅਫੇਅਰਜ਼ ਕੈਨੇਡਾ ਨੇ ਦੱਸਿਆ ਕਿ ਇਸਦੇ ਮੁੱਖ ਦਫ਼ਤਰ ਅਤੇ ਹੋਰ ਇਮਾਰਤਾਂ ਵਿੱਚ ਚੱਲ ਰਹੇ ਮਰੰਮਤ ਪ੍ਰੋਜੈਕਟਾਂ ਕਾਰਨ ਦਫ਼ਤਰੀ ਥਾਂ ਪੂਰੀ ਤਰ੍ਹਾਂ ਉਪਲਬਧ ਨਹੀਂ ਹੈ। ਇਸ ਕਾਰਨ ਕੁਝ ਕਰਮਚਾਰੀਆਂ ਲਈ ਹਾਜ਼ਰੀ ਦੀ ਨੀਤੀ ਵਿੱਚ ਤਬਦੀਲੀ ਕੀਤੀ ਗਈ ਹੈ।

ਨਵੇਂ ਬੰਦੋਬਸਤ ਅਨੁਸਾਰ 4 ਮਈ ਤੋਂ ਸਾਰੇ ਉੱਚ ਅਧਿਕਾਰੀ ਪੂਰਾ ਸਮਾਂ ਦਫ਼ਤਰ ਵਿੱਚ ਕੰਮ ਕਰਨਗੇ, ਮੈਨੇਜਰ ਅਤੇ ਡਿਪਟੀ ਡਾਇਰੈਕਟਰ 6 ਜੁਲਾਈ ਤੋਂ 15 ਸਤੰਬਰ ਦਰਮਿਆਨ ਹਫ਼ਤੇ ਵਿੱਚ 4 ਦਿਨ ਦਫ਼ਤਰ ਆਉਣਗੇ, ਹੋਰ ਕਰਮਚਾਰੀ ਹਫ਼ਤੇ ਵਿੱਚ 3 ਦਿਨ ਦਫ਼ਤਰ ਵਿੱਚ ਹਾਜ਼ਰ ਰਹਿਣਗੇ। ਦੂਜੇ ਪਾਸੇ, ਪਬਲਿਕ ਸਰਵਿਸ ਅਲਾਇੰਸ ਆਫ ਕੈਨੇਡਾ ਦੀ ਪ੍ਰਧਾਨ Sharon DeSousa ਨੇ ਸਰਕਾਰ ਦੀ ਇਸ ਨੀਤੀ ਦੀ ਆਲੋਚਨਾ ਕਰਦਿਆਂ ਕਿਹਾ ਕਿ ਇਹ ਫੈਸਲਾ ਬਿਨਾਂ ਢੰਗ ਦੀ ਯੋਜਨਾ ਦੇ ਲਿਆ ਗਿਆ ਹੈ ਅਤੇ ਇਸ ਨਾਲ ਕਰਮਚਾਰੀਆਂ ਨੂੰ ਮੁਸ਼ਕਲਾਂ ਪੈਦਾ ਹੋ ਰਹੀਆਂ ਹਨ।ਵਿਭਾਗ ਵੱਲੋਂ ਕਿਹਾ ਗਿਆ ਹੈ ਕਿ ਜਿਵੇਂ-ਜਿਵੇਂ ਨਵੀਆਂ ਦਫ਼ਤਰੀ ਥਾਵਾਂ ਤਿਆਰ ਹੁੰਦੀਆਂ ਜਾਣਗੀਆਂ, ਹਾਜ਼ਰੀ ਦੀਆਂ ਸ਼ਰਤਾਂ ਨੂੰ ਹੌਲੀ-ਹੌਲੀ ਵਧਾਇਆ ਜਾਵੇਗਾ।