ਕੈਲੋਨਾ ਵਿੱਚ ਅਲਜ਼ਾਈਮਰ ਜਾਗਰੂਕਤਾ ਵਾਕ ਦੌਰਾਨ 26 ਹਜ਼ਾਰ ਡਾਲਰ ਤੋਂ ਵੱਧ ਫੰਡ ਇਕੱਠਾ
ਕੈਲੋਨਾ-ਬ੍ਰਿਟਿਸ਼ ਕੋਲੰਬੀਆ ਦੇ ਕੈਲੋਨਾ ਸ਼ਹਿਰ ਵਿੱਚ ਅਲਜ਼ਾਈਮਰ ਅਤੇ ਡਿਮੈਂਸ਼ੀਆ ਪ੍ਰਭਾਵਿਤ ਪਰਿਵਾਰਾਂ ਦੀ ਮਦਦ ਲਈ ਕਰਵਾਏ ਗਏ ‘ਆਈਜੀ ਵੈਲਥ ਮੈਨੇਜਮੈਂਟ ਵਾਕ ਫਾਰ ਅਲਜ਼ਾਈਮਰ’ ਦੌਰਾਨ 26 ਹਜ਼ਾਰ ਡਾਲਰ ਤੋਂ ਵੱਧ ਦੀ ਰਕਮ ਇਕੱਠੀ ਕੀਤੀ ਗਈ।31 ਮਈ ਨੂੰ ਹੋਏ ਇਸ ਸਮਾਗਮ ਵਿੱਚ ਕੈਲੋਨਾ ਅਤੇ ਸੂਬੇ ਦੇ ਹੋਰ ਇਲਾਕਿਆਂ ਤੋਂ ਵੱਡੀ ਗਿਣਤੀ ਵਿੱਚ ਲੋਕਾਂ ਨੇ ਸ਼ਮੂਲੀਅਤ ਕੀਤੀ। ਇਹ ਮੁਹਿੰਮ ਨਾ ਸਿਰਫ਼ ਫੰਡ ਇਕੱਠਾ ਕਰਨ ਲਈ ਸਗੋਂ ਲੋਕਾਂ ਵਿੱਚ ਇਹ ਸੰਦੇਸ਼ ਪਹੁੰਚਾਉਣ ਲਈ ਵੀ ਆਯੋਜਿਤ ਕੀਤੀ ਜਾਂਦੀ ਹੈ ਕਿ ਡਿਮੈਂਸ਼ੀਆ ਦਾ ਸਾਹਮਣਾ ਕਰ ਰਹੇ ਪਰਿਵਾਰ ਇਕੱਲੇ ਨਹੀਂ ਹਨ।
ਅਲਜ਼ਾਈਮਰ ਸੋਸਾਇਟੀ ਬੀ.ਸੀ. ਅਤੇ ਯੂਕੋਨ ਅਨੁਸਾਰ ਲਗਭਗ ਅੱਧੇ ਲੋਕ ਇਹ ਮੰਨਦੇ ਹਨ ਕਿ ਅਲਜ਼ਾਈਮਰ ਦੀ ਤਸ਼ਖੀਸ ਹੋਣ ਤੋਂ ਬਾਅਦ ਜ਼ਿੰਦਗੀ ਦਾ ਅਰਥਪੂਰਨ ਪੱਖ ਖ਼ਤਮ ਹੋ ਜਾਂਦਾ ਹੈ। ਇਹ ਸੋਚ ਬਿਮਾਰੀ ਨਾਲ ਜੂਝ ਰਹੇ ਲੋਕਾਂ ਅਤੇ ਉਨ੍ਹਾਂ ਦੇ ਪਰਿਵਾਰਾਂ ਵਿੱਚ ਡਰ ਅਤੇ ਇਕੱਲੇਪਨ ਦੀ ਭਾਵਨਾ ਨੂੰ ਹੋਰ ਵਧਾ ਸਕਦੀ ਹੈ।ਇਸ ਸਾਲ ਦੀ ਵਾਕ ਦੌਰਾਨ ਬਿੱਲ ਅਤੇ ਵਾਂਡਾ ਗ੍ਰੇਵਾਟ ਨੂੰ ਵਿਸ਼ੇਸ਼ ਤੌਰ ’ਤੇ ਸਨਮਾਨਿਤ ਕੀਤਾ ਗਿਆ। ਜੋੜੇ ਨੇ ਆਪਣੀ ਕਹਾਣੀ ਸਾਂਝੀ ਕਰਦਿਆਂ ਦੱਸਿਆ ਕਿ ਰਿਟਾਇਰਮੈਂਟ ਤੋਂ ਬਾਅਦ ਯਾਤਰਾ ਅਤੇ ਨਵੇਂ ਤਜਰਬਿਆਂ ਦੀਆਂ ਯੋਜਨਾਵਾਂ ਵਾਂਡਾ ਨੂੰ ਡਿਮੈਂਸ਼ੀਆ ਦੀ ਤਸ਼ਖੀਸ ਹੋਣ ਕਾਰਨ ਪ੍ਰਭਾਵਿਤ ਹੋ ਗਈਆਂ।
ਬਿੱਲ ਗ੍ਰੇਵਾਟ ਨੇ ਕਿਹਾ ਕਿ ਪਰਿਵਾਰ ਅਤੇ ਦੋਸਤਾਂ ਨਾਲ ਖੁੱਲ੍ਹ ਕੇ ਗੱਲ ਕਰਨ ਨਾਲ ਉਨ੍ਹਾਂ ਨੂੰ ਕਾਫ਼ੀ ਮਦਦ ਮਿਲੀ।“ਲੋਕਾਂ ਨੂੰ ਹਕੀਕਤ ਬਾਰੇ ਜਾਣਕਾਰੀ ਦੇਣ ਨਾਲ ਉਹਨਾਂ ਦੀ ਸਮਝ ਵਧੀ ਅਤੇ ਸਾਡੇ ਲਈ ਹਾਲਾਤਾਂ ਦਾ ਸਾਹਮਣਾ ਕਰਨਾ ਵੀ ਆਸਾਨ ਹੋ ਗਿਆ,” ਉਨ੍ਹਾਂ ਕਿਹਾ।ਅਲਜ਼ਾਈਮਰ ਸੋਸਾਇਟੀ ਬੀ.ਸੀ. ਅਤੇ ਯੂਕੋਨ ਦਾ ਕਹਿਣਾ ਹੈ ਕਿ ਬਿੱਲ ਅਤੇ ਵਾਂਡਾ ਵਰਗੇ ਲੋਕ ਜਦੋਂ ਆਪਣੀਆਂ ਕਹਾਣੀਆਂ ਸਾਂਝੀਆਂ ਕਰਦੇ ਹਨ ਤਾਂ ਇਹ ਹੋਰ ਪਰਿਵਾਰਾਂ ਲਈ ਪ੍ਰੇਰਣਾ ਬਣਦਾ ਹੈ ਅਤੇ ਮਦਦ ਪ੍ਰਾਪਤ ਕਰਨ ਵਿੱਚ ਆਉਣ ਵਾਲੀਆਂ ਰੁਕਾਵਟਾਂ ਘੱਟ ਹੁੰਦੀਆਂ ਹਨ।
ਸੰਸਥਾ ਨੇ ਕਿਹਾ ਕਿ ਅਜਿਹੀਆਂ ਕਹਾਣੀਆਂ ਡਿਮੈਂਸ਼ੀਆ ਨਾਲ ਜੀਵਨ ਬਤੀਤ ਕਰ ਰਹੇ ਲੋਕਾਂ ਅਤੇ ਉਨ੍ਹਾਂ ਦੀ ਦੇਖਭਾਲ ਕਰਨ ਵਾਲਿਆਂ ਨੂੰ ਇਹ ਅਹਿਸਾਸ ਕਰਵਾਉਂਦੀਆਂ ਹਨ ਕਿ ਉਹ ਇਕੱਲੇ ਨਹੀਂ ਹਨ।ਵਾਕ ਰਾਹੀਂ ਇਕੱਠੀ ਕੀਤੀ ਗਈ ਰਕਮ ਅਲਜ਼ਾਈਮਰ ਅਤੇ ਡਿਮੈਂਸ਼ੀਆ ਪ੍ਰਭਾਵਿਤ ਪਰਿਵਾਰਾਂ ਲਈ ਸਿੱਧੇ ਅਤੇ ਵਰਚੁਅਲ ਪ੍ਰੋਗਰਾਮਾਂ, ਸਲਾਹ-ਮਸ਼ਵਰੇ, ਸਹਾਇਤਾ ਸੇਵਾਵਾਂ ਅਤੇ ਜਾਗਰੂਕਤਾ ਮੁਹਿੰਮਾਂ ਉੱਤੇ ਖਰਚ ਕੀਤੀ ਜਾਵੇਗੀ।ਅਲਜ਼ਾਈਮਰ ਸੋਸਾਇਟੀ ਨੇ ਸਮਾਗਮ ਵਿੱਚ ਹਿੱਸਾ ਲੈਣ ਵਾਲੇ ਸਾਰੇ ਦਾਨੀ, ਵਲੰਟੀਅਰਾਂ ਅਤੇ ਭਾਈਚਾਰੇ ਦੇ ਮੈਂਬਰਾਂ ਦਾ ਧੰਨਵਾਦ ਕਰਦਿਆਂ ਕਿਹਾ ਕਿ ਇਸ ਤਰ੍ਹਾਂ ਦਾ ਸਹਿਯੋਗ ਡਿਮੈਂਸ਼ੀਆ ਪ੍ਰਭਾਵਿਤ ਲੋਕਾਂ ਦੀ ਜ਼ਿੰਦਗੀ ਵਿੱਚ ਵੱਡਾ ਫ਼ਰਕ ਪਾ ਸਕਦਾ ਹੈ।
