ਕੈਨੇਡਾ ਵਿੱਚ ਮਈ ਦੌਰਾਨ 88 ਹਜ਼ਾਰ ਨਵੀਆਂ ਨੌਕਰੀਆਂ ਪੈਦਾ

ਓਟਵਾ-ਸਟੈਟਿਸਟਿਕਸ ਕੈਨੇਡਾ ਵੱਲੋਂ ਜਾਰੀ ਨਵੇਂ ਅੰਕੜਿਆਂ ਅਨੁਸਾਰ ਮਈ ਮਹੀਨੇ ਦੌਰਾਨ ਕੈਨੇਡਾ ਦੇ ਰੋਜ਼ਗਾਰ ਬਾਜ਼ਾਰ ਵਿੱਚ ਮਜ਼ਬੂਤ ਸੁਧਾਰ ਦੇਖਣ ਨੂੰ ਮਿਲਿਆ ਹੈ। ਦੇਸ਼ ਵਿੱਚ 88,000 ਨਵੀਆਂ ਨੌਕਰੀਆਂ ਪੈਦਾ ਹੋਈਆਂ, ਜਿਸ ਨਾਲ ਬੇਰੁਜ਼ਗਾਰੀ ਦਰ ਘਟ ਕੇ 6.6 ਫੀਸਦੀ ਰਹਿ ਗਈ ਹੈ।ਰਿਪੋਰਟ ਮੁਤਾਬਕ ਨਵੰਬਰ 2025 ਤੋਂ ਬਾਅਦ ਇਹ ਰੋਜ਼ਗਾਰ ਵਿੱਚ ਪਹਿਲਾ ਵੱਡਾ ਵਾਧਾ ਹੈ। ਇਸ ਤੋਂ ਪਹਿਲਾਂ 2026 ਦੇ ਪਹਿਲੇ ਚਾਰ ਮਹੀਨਿਆਂ ਦੌਰਾਨ ਕੈਨੇਡਾ ਦੀ ਅਰਥਵਿਵਸਥਾ 112,000 ਨੈੱਟ ਨੌਕਰੀਆਂ ਗੁਆ ਚੁੱਕੀ ਸੀ।

ਅਰਥਸ਼ਾਸਤਰੀਆਂ ਨੇ ਮਈ ਵਿੱਚ ਸਿਰਫ਼ 10,000 ਨੌਕਰੀਆਂ ਵਧਣ ਦੀ ਉਮੀਦ ਜਤਾਈ ਸੀ, ਪਰ ਅਸਲ ਅੰਕੜੇ ਉਮੀਦਾਂ ਤੋਂ ਕਾਫ਼ੀ ਵੱਧ ਰਹੇ।ਨਵੀਆਂ ਨੌਕਰੀਆਂ ਵਿੱਚ ਵੱਡਾ ਹਿੱਸਾ ਫੁੱਲ-ਟਾਈਮ ਅਸਾਮੀਆਂ ਦਾ ਰਿਹਾ। ਨਿਰਮਾਣ ਖੇਤਰ ਵਿੱਚ ਸਭ ਤੋਂ ਵੱਧ 27,000 ਨਵੀਆਂ ਨੌਕਰੀਆਂ ਜੋੜੀਆਂ ਗਈਆਂ। ਇਸ ਤੋਂ ਇਲਾਵਾ ਜਾਣਕਾਰੀ, ਸੱਭਿਆਚਾਰ ਅਤੇ ਮਨੋਰੰਜਨ, ਆਵਾਜਾਈ ਅਤੇ ਵੇਅਰਹਾਊਸਿੰਗ ਖੇਤਰਾਂ ਵਿੱਚ ਵੀ ਰੋਜ਼ਗਾਰ ਵਧਿਆ। ਟੈਰਿਫ਼ ਪ੍ਰਭਾਵਿਤ ਮੈਨੂਫੈਕਚਰਿੰਗ ਸੈਕਟਰ ਵਿੱਚ ਵੀ ਨਵੀਆਂ ਅਸਾਮੀਆਂ ਸ਼ਾਮਲ ਹੋਈਆਂ।

ਦੂਜੇ ਪਾਸੇ ਹੋਲਸੇਲ ਅਤੇ ਰਿਟੇਲ ਵਪਾਰ ਖੇਤਰ ਵਿੱਚ 35,000 ਨੌਕਰੀਆਂ ਦੀ ਕਮੀ ਦਰਜ ਕੀਤੀ ਗਈ।ਰਿਪੋਰਟ ਅਨੁਸਾਰ ਔਸਤ ਘੰਟਾਵਾਰ ਤਨਖ਼ਾਹ ਵਿੱਚ ਸਾਲਾਨਾ ਆਧਾਰ ’ਤੇ 3 ਫੀਸਦੀ ਵਾਧਾ ਹੋਇਆ ਹੈ, ਜੋ ਅਪ੍ਰੈਲ ਦੇ 4.5 ਫੀਸਦੀ ਵਾਧੇ ਨਾਲੋਂ ਘੱਟ ਹੈ।ਨੌਜਵਾਨਾਂ ਲਈ ਵੀ ਮਈ ਮਹੀਨਾ ਸਕਾਰਾਤਮਕ ਰਿਹਾ। 15 ਤੋਂ 24 ਸਾਲ ਦੇ ਨੌਜਵਾਨਾਂ ਨੂੰ 99,000 ਫੁੱਲ-ਟਾਈਮ ਨੌਕਰੀਆਂ ਮਿਲੀਆਂ ਅਤੇ ਇਸ ਵਰਗ ਦੀ ਬੇਰੁਜ਼ਗਾਰੀ ਦਰ ਵਿੱਚ ਜਨਵਰੀ ਤੋਂ ਬਾਅਦ ਪਹਿਲੀ ਵਾਰ ਕਮੀ ਦਰਜ ਕੀਤੀ ਗਈ। ਹਾਲਾਂਕਿ ਨੌਜਵਾਨਾਂ ਦੀ ਬੇਰੁਜ਼ਗਾਰੀ ਦਰ 13.4 ਫੀਸਦੀ ਰਹੀ, ਜੋ ਮਹਾਂਮਾਰੀ ਤੋਂ ਪਹਿਲਾਂ ਦੇ 10.8 ਫੀਸਦੀ ਔਸਤ ਨਾਲੋਂ ਅਜੇ ਵੀ ਵੱਧ ਹੈ।

ਇਹ ਰਿਪੋਰਟ ਬੈਂਕ ਆਫ ਕੈਨੇਡਾ ਦੇ ਅਗਲੇ ਵਿਆਜ ਦਰ ਫੈਸਲੇ ਤੋਂ ਪਹਿਲਾਂ ਸਾਹਮਣੇ ਆਈ ਹੈ। ਕਈ ਅਰਥਸ਼ਾਸਤਰੀਆਂ ਦਾ ਮੰਨਣਾ ਹੈ ਕਿ ਮਜ਼ਬੂਤ ਰੋਜ਼ਗਾਰ ਅੰਕੜੇ ਦਰਸਾਉਂਦੇ ਹਨ ਕਿ ਮੰਦੀ ਦੇ ਖ਼ਤਰੇ ਦੇ ਬਾਵਜੂਦ ਕੈਨੇਡਾ ਦੀ ਅਰਥਵਿਵਸਥਾ ਲਚਕੀਲਾਪਣ ਦਿਖਾ ਰਹੀ ਹੈ।ਮਾਹਿਰਾਂ ਅਨੁਸਾਰ ਇਹ ਅੰਕੜੇ ਸੰਕੇਤ ਦਿੰਦੇ ਹਨ ਕਿ ਕੈਨੇਡਾ ਦੀ ਅਰਥਵਿਵਸਥਾ ਨਾ ਤਾਂ ਤੇਜ਼ੀ ਨਾਲ ਵਧ ਰਹੀ ਹੈ ਅਤੇ ਨਾ ਹੀ ਮੰਦੀ ਵੱਲ ਵਧ ਰਹੀ ਹੈ, ਸਗੋਂ ਚੁਣੌਤੀਆਂ ਦੇ ਬਾਵਜੂਦ ਸਥਿਰਤਾ ਬਣਾਈ ਹੋਈ ਹੈ।